السبت، ديسمبر 22، 2007

الحب هو الاحتواء - بسكوتة


انا كده دلوقت كسرت الحظر المعمول عليا . . .انا كده كتبت مقالة . . . بس دي آخر مقالة بجد حتى أخلص الامتحانات تماما , بس انا مقدرتش مكتبش المقالة دي وانزلها مع الصور بتاعتها . . . تاني مرة بطلب السماح و دي آخر مقالة .


الدافع
لكل حاجة دوافع
في رأيي
الغرض من الحب هو إن شخص يتملكك
يحتويك
تكون ملكه (يعني بتاعه)
تديله صك عبوديتك يكون ليه للأبد


ليه بقا ؟؟
الواحد لما يكون معاه حاجة بتاعته بيخاف عليها . . . بيحافظ عليها . . . بياخدها معاه في كل حتة .
بيحب يطمن عليها
يمسحها بفوطة
يحط عليها ملاية عشان مش تلم تراب
يخاف عليها من الهوا اللي بيعدي جنبها
لو يطول يحطها جواه كان حطها . . . بس خير . . . يا خسارة مش يعرف


و اعتقد إن هوا دا الدافع اللي بيخلي حد يحب أو يفكر في الحب
انه يكون ملك لشخص آخر
يضع لجامه في يده , يقوده كيفما شاء
و اينما اراد – في أي حتة يروح وراه

خير
محدش عارف الخير فين . . .
بس يا جماعة دا رأي خاص بيا (مستر فتوح) .
فيه كلمة انا اعتز بها جدا
وحاططها قدم عيني دايماً
"الحب هو الاحتواء . . . أن تحتوي أحد أو أن يحتويك"


الحب هو الاحتواء
تاخده جواك
الحب
مش بس بتكلم عن حب الرجل لزوجته


لأ
انا بتكلم عن الحب عموماً
حب ربنا لينا , وحبنا لربنا
حبنا لسيدنا و معلمنا ورسولنا ونبينا محمد صلى الله عليه وسلم
وحبه لينا وخوفه علينا

حب ماما ليا وحبي ليها


حب الأم لولادها

, وحب الأب لأولاده

, وحب الصديق لصديقه


, وحب الشخص لكرسيه و الموبايل بتاعه و سريره وغرفته


, حب الشخص للشغل بتاعه و المشروع اللي شغال فيه



, حبك للدكتور اللي علمك

, وحبك للأطفال اللي انت بتربيهم وتعلمهم , وحبك لحبهم ليك وطريقة نداهم لأسمك


الحب في ذات نفسه
شعور دافي رائع جميل , بتحس جواه بمشاعر كتيرة , دفيان وسقعان في نفس الوقت , بس سقعة حلوة لذيذة , اللي تخلي جسمك يقشعر , اللي تخليك مبسوط و بتتنطط في كل مكان حواليك .
المشاعر اللي تخليك في عز ما انت زعلان , تبتسم وتضحك , وتخليك تبص لكل المواقف اللي حواليك و تضحك منها و تبقى مبسوط منها حتى لو كانت مواقف سودة وزي الزفت .

الواحد لما بيحب , بيبقى عليه إطار و غشاء من الروعة و الجمال و البهاء , تلاقيه ماشي بيلمع في كل حتة , لدرجة انه ممكن يوصل انه ينور و هو ماشي , يوزع نور وسعادة حواليه و هو بيتحرك .

ما هو خلاص دا شخص شعر بالحب واحس بيه , واحيط به , مفيش حاجة هتوصله , بقا عارف سكته ومصيره وهو ناوي يعمل ايه , محدش قده , ربنا يسعده ويهنيه كمان وكمان .


آآآآآه

ربنا يوفقنا جميعا و يهدينا لكل حاجة فيها الخير و الهنا و السعادة ويوفقنا لآخرتنا ولكل حاجة تساعدنا فيها
يااااااااارب



لقيت لكم قصة انجليزي حلوة
هي كانت مترجمة , بس انا عربتها بأسلوبي
بتتكلم عن سببية الحب


اسباب الحب (معرب بتصرف كتييير)

المرأة : عاوزة اعرف انت ليه بتحبني ؟ ايه اللي خلاك تحبني ؟


الرجل : مقدرش اقولك سبب معين . . . بس انا فعلاً بحبك .


المرأة : انت متقدرش حتى تقولي السبب !! امال ليه بتقول انك بتحبني وانت مش عارف السبب ؟
الرجل : بجد صدقيني . . . انا مش عارف سبب غير إني بحبك موووت .


المرأة : لأ مليش دعوا . . . لازم اعرف السبب . . . جوز صاحبتي دايماً بيقولها هو بيحبها ليه . . . ولا انت متعرفش ؟

الرجل : خلاص خلاص .. انا بحبك لأنك حلوة جدا - صوتك رائع - ولأنك مهتمة بيا وبتحبيني - ولأنك دايما مليانة أمل وتفاؤل - ولأن ضحتك دي اجمل ضحكة في العالم - وبعشق كل حركة بتعمليها و كل خطوة بتمشيها




لسوء الحظ .. بعد بضعة ايام حصل للمرأة حادث بليغ واصيبت فيه اصابات بالغه
عندما اتى زوجها لزيارتها .. وضع بجانبها رسالة قصيره كتب فيها




زوجتي العزيزة :

لروعة صوتك احببتك ..ولكن الآن هل تستطيعين الكلام؟

كلا

اذن . . . أنا لا استطيع ان احبك .

ولإهتمامك بيا و حبك ليا .. احببتك ، ولكن هل تستطيعين اظهار هذه المشاعر الآن ؟

كلا

اذن . . . فأنا لا استطيع ان احبك .

ولضحكتك الرائعة .. احببتكِ .. و لكل حركة تتحركينها كنت احبكِ

ولكن .. الآن

هل تستطيعين الضحك ؟ ؟ ؟ هل تقدرين على الحركة ؟

كلا

لهذا السبب فانا لا استطيع ان احبك .

زوجتى العزيزة ।

لوكان الحب يتطلب أسباباً . . . فأنت الآن لا تملكي أي سبب لكي أحبك من أجله

إذن ..فهل يحتاج الحب أسباباً ؟؟..أبداً

فأنا لا أزال احبك . . . وسأظل أحبكِ ماحييت . . . زوجتي الحبيبة



هناك 5 تعليقات:

  1. شكرا جزيلا وبشدة ...
    عبرت بإسلوب واقعي جدا عن معان موجودة كلنا فاهمنها كويس ومدركينها
    شكرا جزيلا لك

    ردحذف
  2. غير معرف واحد

    مرسي جدا جدا جدا ليك
    الحمد لله انه وفقني أني اعبر عن معاني موجودة جواك و جوا ناس كتير تانية حوالينا
    ليك سلاااامي
    سلااااااام

    ردحذف
  3. اجمل شئ فى الحب انك تحب ومتكنش عارف بتحب حبيبك ليه سيبك من جمال الشكل ولا أناقه المظهر ولا جاذبية الاسلوب بجد سعيد جدا من كلامك سعاده لاتوصف لاننا محتاجين نحب ونحب كما قال الشاعر
    (إنه الحبُ الخالصُ والنقي.. إنه العشق للروح لا للجسد.. إنها العاطفة الجيّاشة.. التي تحدّها الأخلاق ويقوّمها الدين..
    ويصدق القائل حين يقول
    للحب رائحةٌ وليس بوسعها أن لا تفوح مزارع الـدرّاق
    )

    ردحذف
  4. بجد الكلمة الوحيدة اللي ممكن تتقال هي

    الحب هو الاحتواء ان تحتوي احد او ان يحتويك

    ونك تصبر عليه في كل وقت وتفضل معاه وتدعمه وتساعده وانتع ارف ومتأكد انه في امس الحاجة اليك

    يارب وفق كل الناس
    يارب

    ردحذف
  5. فعلا ماشاء الله روعة فى التذكير بكل شىء
    تحياتى / مؤمن الشهير ب ( مؤمنكو )

    ردحذف

وخلي بالك من كلامك
حبيبي النبي بيقول:
"إن الرجل ليتكلم بالكلمة من رضوان الله ما كان يظن أن تبلغ ما بلغت ؛ يكتب الله له بها رضوانه إلى يوم يلقاه وإن الرجل ليتكلم بالكلمة من سخط الله كان يظن أن تبلغ ما بلغت ؛ يكتب الله له بها سخطه إلى يوم يلقاه".

إضغط على:
الاشتراك عن طريق البريد الإلكتروني
ليصلك بريد الكتروني عند قيام احد بالتعليق
وشكر

توضيح صغنووون خااالص


اقرأ و قول رأيك بحرية – عمري ما هزعل منك