كيف تصبح كئيباً
مستوحيا من استاتيو واحد صاحبي اسمه مستر احمد بيت
أقدم لكم . . .
: : : : :
أقدم لكم . . .
: : : : :
كيف تصبح كئيباً
لو عاوز تبقا مكتئب اقعد فكر نفسك باللي بيجرى حواليك
و أنك هتتخرج مش هتلاقي شغلانة
و إن البلد معدش فيها امان , فأنت تخاف تتجوز و تخلف ليحصل في أهلك حاجة أو إن ولادك يضيعوا او يجيلهم مرض وحش "بعد الشر طبعاُ" و انهم يطلعوا بيضربوا مخدرات ضرباً مبرحاً
و إن التعليم بقا مستواه زي الزفت فهما مش هيتعلموا تعليم كويس إلا لو انت طلعت تاجر مخدرات او مهرب آثار و تدخلهم مدارس انترناشيونال او على الجانب الاخر تدخلهم مدارس الحكومة و مش هتعرف تصرف عليهم هدوم ولبس و دروس خصوصية و هدية عيد الأم للمس و الأبلة.
وفكر نفسك انك اساسا مش هتعرف تتجوز لأنك معكش فلوس شبكة و شقة و جهاز و فرح
وانك هتقضي العشر سنين الجايين تجري ورا نفسك عشان تحوش على أمل انه فيه واحدة ممكن ترضى بيك بعد ما كبرت و بقيت شايبان و ضاربك السلك.
وفكر نفسك بأن العرب عموما و المصريين خصوصا معدش ليهم كرامة لا جو بلدهم ولا برا البلد فأنت لو عاوز تعيش بأحترامك و رافع راسك و محدش يهينك في قسم شرطة او في اشارة مرور خدلك جنسية اجنبية و حبذاَ كانت امريكية
فكر نفسك بالحاجات دي لو عاوز تبقى مكتئب و تعيش في تعاسة ابدية.
أما لو عاوز تكئب الاخرين و تخليهم يكرهوا اليوم اللي شافوك فيه و يكرهوا نفسهم بل ربما تدفع بعضهم للانتحار
فكرهم بالحاجات دي و انت مبتسم ابتسامة عريضة جداً مظهراً كافة اسنانك و ياريت تكون سنانك صفرا
وتأكد ليهم بعد كل دا إن البلد لسا بخير و انه لسا فيه رجالة في البلد ممكن يعملوا تغيير و انه ليس كما يشاع ان الرجالة كلهم ماتوا في اكتوبر 73
خير خير خير
محدش عارف الخير فين
كان معكم ناصحاً
فتوح ابو المفاتيح - مبتسماً
فتوح ابو المفاتيح - مبتسماً
التسميات: أحوال فتووح
مرسلة بواسطة فتوح أبو المفاتيح @ مارس 18, 2010
2 تعليقات
