الثلاثاء، أغسطس 05، 2008

الحياء - هذا الحب المفقود





الحياء
حاجة مبقتش موجودة في ثقافتنا , شئ نادر كمن يبحث عن ابرة في كوم قش
زمان
الحياء دا كان من أحلى صفات البنت
دلوقت . . . . بح
بقا عادي جدا انك تلاقي بنوتة حلوة رقيقة بتعمل . . . . و . . . . و . . . . في الشارع أو الكلية أو في الشغل.
مش عارف أقول أيه ؟؟؟ أو أبدأ إزاي أو ايه اللي اتكلم عنه ؟؟؟
اتكلم عن اللي بشوفه واللي بسمع عنه و اللي حصل معايا أو اللي بكرهه وبحس اني هولع لما بشوف حاجة زي دي .
دي بتوصل ببعضهن انهم يتعاملون بدلال ونغج مع اغراب واسترقاق في الحديث و تلطف في الكلام بأسلوب يقترب كأنه اخوها أو أبوها و في بعض الأحيان كأنه زوجها .
أم اتكلم عن اللي مفروض تكون عليه بناتنا ولازم يعملوه ؟؟؟
ممكن واحدة تقول انا ماليش دعوا أو ما شابه .

أنا مش هعرف أرد عليها , أنا مرة كتبت مقالة شديدة اصف فيها بصراحة اللي بفكر فيه في حالات مشابهة , بعدما انهيتها وقرأتها مرة أخرى ارتجفت من هول ما كتبت فيها وما وصفت , ارتجفت فرقا عندما تخيلت ما كتبت , ونحيتها جانبا ولم اعرضها لأحد أو يقرأها.
أو رد اخر سريع ومختصر , ما اصفه و اتخيله هنا هو صفات صغيرتي الحلوة حبيبتي و معشوقتي رائعة الجمال شديدة الحسن , ابنتي الحسناء حبيتي حبيبة , مشابهةً لزوجتي والدتها أم حبيبة – كما كانت زوج رسولي وحبيبي رسول الله .
لييه ؟ لأن النوعية دي شايفة نفسها صح ومبتقبلش أي نقض من أي نوع كان , لأن دا استايل أو لنقل سلو المجتمع اللي هي فيه , و لأن شخصيات مماثلة بتتلقى الدعم بتاعها و القوة من امثالها من المحيطين بها من آفات المجتمع والعالات على الثقافة .
تاني سبب لأني مش عاوز اتكلم عن المشاهدات والممارسات المماثلة , إني مش عاوز حد يعتقد اني اقصده بالكلام دا , حاجة حلوة اتعلمتها من الشيخ مسعود رحمه الله - شهيدا
قالي ايه : النصيحة تكون غير مباشرة و إن كنت عاوز تحذر من شخص أو ناس لا تذكر اسماء , لأن دا يحفظنا من الزلل و الخطأ وقد يولد الضغينة , ولا نريد من أحد انه يعتقد إن في هذا ضعفا , بل هو القوة و منتهى القوة , لأن هذا يتطلب منا عقلا و كظما للغيظ حين تشاهد حدا من حدود الدين تتجاوز و حكمة كبيرة حتى تستطيع أن تنصح و أن تذكر ما تريد .
إلى هنا انتهى كلام الشيخ مسعود رحمه الله – شهيدا .
طب اشمعنا الحياء بالذات , أكيد فيه اخلاقيات كتير غايبة عن المجتمع ؟
نتكلم شوية عن حبيبتي حبيبة ونرجع للسؤال دا .
حبيبة هتتعلم مني كل حاجة , هعلمها كل حرف في حياتها , أهم حقيقة هتتعملها مني و هتعلمها معاها و هصر عليها وهتعيش بها حتى تموت شهيدة .
حبيبة ستكون مع الحق ولا تبالي . . . حتى لو كان العالم كله ضدها .
لأنه ماذا سينفعها إن ربحت الناس و خسرت نفسها
ماذا يستطيع أن يسلبها الناس إن كانت جنتها في صدرها , عند ربها , وهي تعلم أن وعد الله حق وحقيقة كما ترى الشمس في وضح النهار.
دي كانت نقطة .
نقطة تانية , فيه آية حبيبة بتحبها جدا و بتفكر فيها كتير , يقول الله تعالى في سورة الأحزاب -آية 36 : وما كان لمؤمن ولا مؤمنة اذا قضى الله ورسوله امرا ان يكون لهم الخيرة من امرهم .
نرجع للنقطة اللي سبناها , اشمعنى الحياء .
الحياء خلق الاسلام , سيدنا النبي قال : إنَّ لكل دين خلقاً ، وخلق الإسلام الحياء - موطأ مالك ، وسنن ابن ماجه .
وقال أيضا : الحياء لا يأتي إلا بخير – صحيح مسلم , و صحيح البخاري .
وهو من الأخلاق التي يحبها الله ، قال الرسول صلى الله عليه وسلم : إنَّ الله حيي سِتِّير يحب الستر والحياء - سنن أبي داود والنسائي .
وعن عبد الله بن عمر رضي الله عنهما : أن النبي صلى الله عليه وسلم مرَّ على رجل من الأنصار وهو يعظ أخاه في الحياء فقال رسول الله صلى الله عليه وسلم : دعه فإن الحياء من الإيمان – صحيح مسلم , و صحيح البخاري .
الحياء من أروع واجمل الاخلاق .
لأنه بيصد صاحبه عن كل قبيح وذميم من الأخلاق , و يصده عن كل فعل أو تصرف سئ .
يعني , لما تكون حبيبة متصفة بالحياء , هنلاقيها دايما عاقلة و رزينة , محدش هيجرؤ أنه يتطاول عليها , مش هنسمع صوتها بدون سبب , وإن اتسمع صوتها كل الناس هتسكت وتسمعه , لأنه هيكون صوت في الحق بس , مش هتكون ضحكة , أو كلام بلا معنى مع اشخاص بلا معنى .
لما تكون حبيبة متصفة بالحياء , مش هتضيع وقتها في حاجة ملهاش لازمة مش هتقعد تسمع اهات و احزان شاعر أو مغني , مع ملحوظة انها هتقرا أشعار و قصص من دي , بس دا لأنها ثقافة , وليس لأنها عقيدة أو اسلوب في الحياة تنتهجه .
حبيبة مش هتكون منغلقة , هتكون الأكثر ثقافة و الأكثر علما و الأكثر عقلا و الأكثر أناقة .
الحياء هيخلي حبيبة تعرف سكتها الصح و ايه الأفيد ليها و أيه اللي هتقدر بيه تعلى ويعلى معاها الدين .
مع خلق الحياء حبيبة هتكون الأجمل و الأروع و الأكثر سحرا و جمالا .
زي حبيبة هيكون الأكثر حشمة , لأنها عاقلة هتختاره بعقل من أول الطرحة حتى الحذاء , هتعرف ايه اللي يقدر يحميها من الناس ونظراتها و تحفظ نفسها و يحفظ ليها كرامتها و قدرها بين الناس سواء بتصرفات أو بزي .
النهاردة حصل موقف نفسي اقتل نفسي عشانه , انسة محترمة في عمر 19 سنة واقفة في المترو , محتشمة بمقاييس اليومين دول , بلوزة طويلة شبه ضيقة , بنطلون واسع , طرحة معتادة . حتى الآن الموضوع معتاد , فين المشكلة ؟؟
لأن آنستنا تعيش حياتها و يومها المعتاد وتمارس ما اعتادت عليه , كانت واقفة واضعة شنطتها على كتفها وممسكة بعمود عشان تعرف تقف , و لأن الطرحة قصيرة فكانت منحسرة بالكامل من الخلف , عنقها حتى فتحة البلوزة و شعرها منحسرة عنهما الطرحة .
كدت أموت , كيف لأختي أن يحدث لها هذا ؟؟؟ شعرها ظاهر للجميع , اخبرتها بأن طرحتها منحسرة من الخلف , و أنا اكاد أموت من الخجل .
حمدا لله عدلت من وضع الطرحة , و قالت "مرسيه" .
اعتقد انه يوجد الكثير منا من رأي مشهدا مماثلا و آثر الصمت وعدم الحديث , لقد استغرق مني الأمر محطتا مترو حتى استجمع شجاعتي واخبرها بهذا الأمر , ولكم رأينا كثيرا من اخواتانا يظهر شعرها من تحت طرحتها سواء لأنها شفافة , او لأنها انزلقت من فوق شعرها من الأمام , ويشاهد الجميع شعرها و كيانه وهلم جرا , كأي جارية في سوق النخاسة .
حبيبة حبيبتي لن يرى شعرها غريب , لن يراه سوى زوجها , عندما اهديه اياها .
اخبركم بأمر اخر نقلا عن احدى الفتيات .
كانت تقول حين ارى فتاة غير محتشمة , ارى الناس يأكلوناها بأعينهم أشعر كأني عارية و أنهم يلتهمونني مثلها بالظبط , لأني فتاه مثلها و ما يلحق بها من اذى يلحق بي أنا الأخرى .



ساحرتي الصغيرة حبيبة , ستدرك كل هذا و اكثر منذ حداثة سنها و الفضل لن يكون لي لوحدي بل سيكون لولدتها أم حبيبة التي ستكون من القليلات اللاتي يتحلين بهذا الخلق النادر في مجتمعنا ال . . . , فيه مثل شعبي بيقول – أقلب القدرة على فمها تطلع البت لأمها .
اللي فات دا كله بيدعم قول سيدنا النبي : الحياء كله خير - صحيح مسلم .
الأصل أن قول سيدنا النبي صحيح ولا يقبل الجدال , ولكن ما سبق هو نوع من الشرح و التوضيح لفهم أفضل .
عارفين
امنيتي ومناي هي بنتي حبيبة
اتمنى من الله ان تكون كما اتخيل
امنيتي من الله أن تصبح شهيدة في سبيله , و أن تشفع لي يوم القيامة , و أن تكون من عملي الصالح و أن تأخذ بيدي و تدخلني الجنة , و ارجو من ربي سبحانه وتعالي أن كان لي عمل صالح فلا تدخلني إلا بتربيتي لحبيبة أريدها هي من تدخلني الجنة .
اريدها أن يكون حبيبها و قدوتها الأولى حبيبها النبي , أن تعيش عمرها حتى تعلي كلمه الله في الأرض


ولأن خلق المؤمنين الحياء فسيكون هذا الخلق الأول لحبيبتي حبيبة .
اللهم ارزقنا الاخلاص في العمل .
ختاما
سؤال بسيط لكل من يقرأ هذه المقالة جيدا , و أركز على جيدا , لأنها طويلة و معقدة قليلا .
ماذا تعتقد من تصرفات تمارس هي بعيدة عن الحياء , ولماذا ابتعدت اخواتنا عنه بل إنهن في بعض الأحيان يهاجمنه بضراوة كأنه ضرب من الخزي و العار يلحق بهن إن اتصفن بالحياء ؟؟؟
أم أن مجتمعنا بعدما اصبح طبعه العري و انعدام التمييز بين كون الفرد ذكر كان أم انثى , ولولا بقية من عرف وأركز على عرف , لأصبحنا من همجية "بداعي الليبرالية" كما هو حال المجتمعات الغربية .
استغفر الله العظيم .
في بعض الأحيان نستطيع تمييز أين الخير ولكن نرفض التوجه إليه
ولكن نلتمس العذر , سيدنا النبي قال التمس لاخيك بضع وسبعين عذرا فان لم تجد له عذرا فقل لعل له عذرا لا اعرفه .
بس دا لا يعني إن احنا نسكت , بل دا يكون دافع اقوى لينا إن احنا نحاول نهدي اخواتنا .
دا شئ
تاني شئ , إن الحديث دا يقصد انتحال الأعذار في الأمور الدنيوية وليس الأمور الدينية , لأنه كما قال حبيبي وحبيب حبيبة سيدنا النبي : إن الحلال بين وإن الحرام بين وبينهما أمور مشتبهات لا يعلمهن كثير من الناس , فمن اتقى الشبهات فقد استبرأ لدينه وعرضه ومن وقع في الشبهات وقع في الحرام كالراعي يرعى حول الحمى يوشك أن يرتع فيه ألا وإن لكل ملك حمي ألا وإن حمى الله محارمه ألا وإن في الجسد مضغة إذا صلحت صلح الجسد كله وإذا فسدت فسد الجسد كله ألا وهي القلب - صحيح مسلم , و صحيح البخاري .
يعني على ما اعتقد في حالات زي دي ناخد الفعل الأسلم و الأحرص و نبعد عن الشبهات .
لأن القاعدة اللي متمسكة بيها حبيبة بتقول : انها مع الحق ولن تبالي . . . حتى لو كان العالم كله ضدها , لأنه لن ينفعها شئ إن ربحت الناس و خسرت نفسها .
خير . . . خير . . . خير
محدش عارف الخير فين


وشكرا
كان معكم هادئ النفس
فتوح أبو المفاتيح – أبو حبيبة

هناك 14 تعليقًا:

  1. هبة الله جمال5 أغسطس، 2008 2:03 ص

    الحياء
    كلمه سحر
    بجد معناها جمييييييييييل بيدي للبنت سحر جميل زي كده لؤلؤة داخل محاره تحميها
    بس احنا بناتنا مضحوك عليهم
    اصل الناس الي بيتشكر فيهم في بلدنا رعاع المجتمع الفنانات عارف لو يسلطوا الضؤ على الناس الكويسه بنات كتير هياخدهم قدوة ديه حاجه
    ده غير غياب رقابه البيت والقدوة فيها على الاعلام الهباب بتاعنا
    خدشوا حياء كل من يقطن اليابس
    وبعد عن ربنا وعلى فكره ده اهمهم
    لان كل دول ولا كانوا هياثروا لو فيه حب وحياء من ربنا
    الا منكسفيش من الي خلقه هينكسف من حد
    بس يا سجاعي ده مش بس في البنات
    ده كمان للولاد في ولاد يفورا الدم قلتهم احسن معليش يعني بس ربنا يحمينا كلنا ويحميلك حبيبه وتكون جنبها تحرسها وتعلمها كل الي نفسك فيه

    ردحذف
  2. أولا أحب "أرقع" زغرودة على عودتك "المحمدودة" :)
    و إن شاء الله تبقى عودة .... حلوة كده زي زمان ..

    أم هند ...
    نلبس النظارة و نرد ..

    طبعا يا عم محمد.. الحياء ما حدش ينكر إن الحياء صفة محمودة .. في رجلٍ كانت أو امرأة ..
    فكما قال رسول الله : "الحياء خيره كله"
    لكن المشكلة يا عم محمد . إن احنا أصلا مش ملتزمين بالدين بقدر التزامنا بالـ.... بالتقاليد أو العادات ...

    انت عارف البنات مثلا بيلبسوا ضيق و حاجات الواحد ينكسف يلبسها و هو راجل لأن المجتمع بقى يشوف الحاجات دي .. عادية ,
    البنت لسه صغيرة ..
    خليه اتفرح بشبابها ...
    لما تتجوز يبقى جوزها يلبسها "حشمة"
    أو أي حاجة من اللي بتتقال ..

    يعني حاجة حرام , لكنها لا تنكر لأنها أصبحت عادة

    أما مثلا لو لقيت راجل ماشي بشورت من السرة للركبة في الشارع ..
    الشورت ده بس ..

    على الرغم من ان الراجل ساتر عورته .. إلا إنك ستجد من ينكر عليه .. و "يرقعه" علقة علشان ماشي كده ..
    ليه ؟ مع إنه مش حرام ؟؟ إنما العادة

    علشان كده الحياء لما خرج من دائرة العادة و العبادة معا , و صر في دائرة العبادة فقط .. لم يلتفت إليه الناس ..

    و كفاية بقى لأني طولت .. و جتها نيلة اللي عاوزة خلف

    ردحذف
  3. محمد الصياد5 أغسطس، 2008 3:35 م

    الحياء
    كلمه فى حد ذاتها رقيقه عندما ترها
    ترى فيها عينان رقيقتان تغمضان رموشهما خجلا وحياءا

    وحينما ياتى ذكر الحياء دائما اتذكر قوله تعالى فى قصة سيدنا موسى فى سورة القصص
    "فجاءته احداهما تمشى على استحياء قالت ان ابى يدعوك ليجزيك اجر ماسقيت لنا ......."
    وكان الحياء اتى هنا بين المشيه وبين القول
    اتمنى ان تكون الايه مفهومه ولكى لا اطيل
    احاول ان ارد على السؤال الهام الذى تم طرحه فى اخر المقال
    لو كانت هذه المراه المقصوده فى الايه السابقه هى قدوتنا اليوم لفعل بناتنا مثل ما فعلت ولكان سلوك بناتنا مثل سلوكها ولكنا الان فى مجتمع غير المجتمع الذى نعيشه الان

    اما اذا كان قدوتنا هن المغنيات والممثلات والاتى يطلقون عيهن الان لقب الابطال والنجوم والمبدعين
    اذا فحالنا الان هو الطبيعى وليس فيه شئ من الغرابه او العجب
    بل الغريب الان هو من يتمسك بابطال زمااااااااان
    وبقدوة زمان
    من يتمسك بسلوك السيده خديجه وعائشه واسماء بنت ابى بكر
    وغيرهن من النساء اللاتى هن افضل من كل رجال الارض الان

    وايضا لو ان فى رجالنا الان غيرة عمر بن الخطاب
    وردة فعل المسلم الذى قتل اليهودى حينما شبك ذيل ثوب المراه المسلمه براسها فعندما قامت انكشفت سؤتها فصرخت وقالت واااااااا اسلاماه فثار المسلم فقتل اليهودى

    لو اننا تمسكنا بهويتنا لاقتدى بنا العالم كله
    ولكننا تنازلنا عن هويتنا وعن عاداتنا وعن ديننا واقتدينا نحن بهم وبعاداتهم وبملابسهم وبكل شئ قبيح

    الموضوع شيق ورائع
    ولكن نكتفى بهذا لكى لانطيل عليكم

    ومش كتها نيله اللى عايزه خلف

    كتها نيله اللى ما بتاحفظش على خلفها


    محمد الصياد

    ردحذف
  4. لا لسه ف حياء

    بس مش زى زمان

    طبيعة الحياه والعصر واللى بقى فيه

    يمكن شويه عمل طفره وطور حياء البنت

    وحياء الشاب برده

    لان مفروض ان اتنين ليهم حياء

    مش بنت بتخرج تتعلم وبتحتك باصناف البشر

    وممكن الظروف تجبرها تمشى ف شارع لوحدها 9 بليل

    او تركب ميكروباص كله رجاله مثلا

    حجات كتير م دى

    شويه طورت حياء البنت

    بس لسه موجود

    تحياتى

    ويارب بنتك تبقى زى مبتتمنى

    ردحذف
  5. انا حبيت بس اقولك مبرووووووووووووووووك الرجوع للتدوين والمدوناتية تانى
    بس انت قلت 15 -7 اتاخرت ليه بقى؟؟
    معلش اروح اتغدى وارجع اعلق عالتوبك دة ان شاء الله

    ردحذف
  6. هبة الله جمال
    صح
    الحياء لكل مسلم
    والاسباب اللي صقتيها اسباب
    صح
    من اول خطوات حل المشكلة هو ان احنا نعتف إن فيه مشكلة
    وبعد كدا نذكر اسبابها
    يعني مثلا تلاقي
    الواد أو البت من دوول
    تقوول
    اللله
    دا المغني دا كيووت خالص
    شايفة تسريحة شعرهولا مش عارف وهو بيرقص
    وتقع تبص بص ليه
    ياي تجنن
    دا اساسا فعل سئ
    لو كان فيه حياء كان منعهامن حاجة زي دي
    مش مجرد انها تقول
    بل انها تشوف حاجة زي
    او الواد
    يقف ويتكلم عادي
    مع أي حد
    إنما انا شوفت حتة دين كليب ياااد
    بس كانت المغنية
    كيت وكيت وكيت وكيت ولما كنت بترقص
    دا برضه خلق سئ لو كان عنده حياء
    كان قلب القناة احسن له بدل ما يموت قلبه بمناظر زي دي
    ولما واحد ولد يعاكس بنت في الشارع
    بنديه على دماغه
    لا لا
    مبقنياش بندي جد على دماغه
    بنسقفله و نقوله كمان
    ما هي بقت غابة
    وكله بيمشيه حاجة واحدة




    انا من يومين سمعت موقف خلى دمي يغلي

    كنت هنفجر من الغيظ

    ابن خالي بيحكيلي
    مرة كان واقف في ميدان روكسي الساعة عشرة بليل
    بنت معدية في امان الله محترمة
    يعني مش لابسة خليع من الملابس لا بدي كارينا ولا بنطلون محزق
    كل اللي لابساه بلوزة وجيبة
    واد بيكلم صاحبه (ابن خالتي واقف يسمعه)
    بص هعملك ايه في البت دي
    وقام جاااري
    ورافع ليها الجيبة بتاعتها تماما و
    . . . . . . .
    وبعد كدا جري
    وبس
    بقول لأبن خالي وانت عملت ايه
    قالي وانا مالي
    بجد
    بجد
    اللي اختشوا ماتوا
    احنا بقينا في بلد زبالة


    ايه ذنبها البنت المسكينة يحصل فيها كدا في وسط الشارع
    أمال لو كان الشارع فاضي شوية كان عمل فيها ايه ؟؟؟؟؟





    مبقاش فيه حياء
    يمنع الناس انها تعمل السئ و القبيح من الأعمال
    خير
    خير
    يارب

    ردحذف
  7. لا اله الا الله
    انا لله وانا اليه راجعون
    مستعجبين مين اللى مات
    الحياء هو اللى مات يا جماعة
    دة احنا مس مستحيين من ربنا
    حنستحيى من خلقه
    كنت حكتب حاجات كتير
    لكن اخر موقف كتبه فتوح
    خلانى انسى كل حاجة
    يارب سترك

    ردحذف
  8. أتمنى تتقبل تقديرى واحترامى لمدونتك فى اول زيارة ليا وان شاء الله مش هتكون الاخيرة
    وكمان احب اشكر لك مرورك على مدونتى المتواضعة واتمنى دايما تشرفنى بوجودك
    اجى بقى للبوست الجميل بتاعك فعلا الحياء اختفى من حياتنا موجود بس نادرا لما تلاقيه كاننا عايشين فى عالم كله اشبه بمسرح عرايس تصنع فى كل شىء حتى فى المعاملة
    واقسى مايكون اننا حتى مش نستحى من انفسنا ربنا يستر علينا يارب
    تحياتى لك ابو حبيبة
    يويو

    ردحذف
  9. فى الاول كدا عودا احمدا يا باشمهندس المدونه رجعت تنور بوجودك تانى
    ثانيا موضوع جميل جدا كلنا محتاجين نقراه ونعيد حسابتنا فى تصرفات وافعالنا ونتأكد اننا بنتمتع فيها بالحياء
    ثالث حاجه كل الردود اللى قرايتها جميله وعجبتنى
    وبالنسبه لموضوعنا لو بصنا له من زواية تانيه هنشوف ان البيت وخصوصا الاب والام عليهم العبء فى انهم يربوا بنات واولاد بيتمتعوا بالحياء ويبقى عندهم الوعى الكافى للتمييز ازاى انى اربى طفل شجاع وعنده جرأة وفى نفس الوقت عنده حياء ودا يكون على قمة صفاته

    وبشكرك جدا على التوبك الجميل ده

    ردحذف
  10. حمدلله علي سلامتك
    مبسوط اوي انك رجعت للتدوين علي فكرة

    ربنا يوافقك في حياتك

    ردحذف
  11. واضح انك مش هادى النفس خالص
    المهم
    لم تبدأ بالياس ؟
    على العكس تماما ارى ان الحياء ثقافة بدات تعود لمجتمعنا
    بعد غياب
    يتضح ذلك فى اعداد الفتيات الائى عدن للحجاب او بدان به مذ بلغن
    هذه واحدة
    اما الاخرى
    وهى شدة تبسط"او دلع"بغض البنات عند الحديث مع الفتيان
    فهذه واحدة اخطات الوسيلة
    من الواقع ان نقول اننا لن نستطيع ولا نريد فصل الفتيان عن الفتيات مطلقا فهذا مستحيل
    وانما لا بد ان نتعلم ثقافة التعامل المهذب وهو ما نفتقده جميعا فى مجتمعتنا حتى حينما يتعامل الرجل مع مثله
    تحياتى

    ردحذف
  12. السلام عليكم ورحمه الله وبركاته
    -------------------------------
    بسم الله ماشاء الله انا اول مره ادخل عندك وندمانه انى مدخلتش من زمان

    ياترا فى زيك كده كتير "اكيد لا "
    لانه لو فى كتير مكنش ده حال مجتمعنا
    ---------------------------
    سردت الموضوع بسلاسه مطلقه
    واتيت على ذكر حبيبه قلبك وابنتك الغاليه حبيبه

    كمثال حى لكل ما تقول ******

    ولم تنسى ذكر محبوبتك وزوجتك وجعلتها قدوه نتمنى الاقتداء بها لنكن مثلها مع ازواجنا
    بارك الله لك فيهن
    ----------------------------
    بارك الله فيك ونفع بك الاسلام والمسلمين
    فلقد اتيت على ذكر خلق نادر
    ولم يعد يتداول هذه الايام
    وقل منا من يذكره فى مخيلته على الاقل
    ----------------------------

    ماذا تعتقد من تصرفات تمارس هي بعيدة عن الحياء , ولماذا ابتعدت اخواتنا عنه بل إنهن في بعض الأحيان يهاجمنه بضراوة كأنه ضرب من الخزي و العار يلحق بهن إن اتصفن بالحياء ؟

    اجابه سؤالك ليست فينا بل فى ابائنا
    من شب على شيئ شاب عليه

    الاهل اخى الاب والام القدوه الاولى
    التى ان صلحت صلح بعدها الكل
    والام بالاخص فنحن ابناء جيل السبعينات الذين استحلوا كل شيء فى هذا الوقت
    فكنا نرى فى الافلام مايدل على ما وصلوا اليه من تهاون وبعد عن الدين
    وعن الاسلام

    منهم من تلبس ما يقال عنه المينى جيب وتضع الباروكه العاليه ولا اعلم كيف كانوا يعتقدون انهم اكثر جمالا هكذا ومنهم من كانت تصادق وتعاشر وتدعى ان هذا من الحريه

    والشباب كان فى امسخ اشكالهم
    لا ادرى كيف كانوا هكذا
    ونقول انهم احفاد الصحابه
    الله المستعان
    والله انى لاشمئز عندما كنت ارى هذه الصورالبغيضه

    وسبحانه فأنه فطرنا على الحياء والخلق الحميد
    ولكننا ابدلنا كل هذا بالعكس والنقيض وندعى بهذا اننا نتقدم ونتطور ونواكب التحضر

    والله لاتحضر بعد تحضر حبيبنا ورسولنا الكريم "عليه افضل الصلاه والسلام"

    اسفه اخى لاطالتى ولكنى اسعد كثيرا عندما ارى مثل هذه المواضيع واسعد اكثر عندما اجد فى شبابنا من لم تمسخه الثقافه الغبيه
    عفوا الغربيه

    اتمنى التواصل الدئم
    --------------------------------

    ردحذف
  13. ماذا تعتقد من تصرفات تمارس هي بعيدة عن الحياء , ولماذا ابتعدت اخواتنا عنه بل إنهن في بعض الأحيان يهاجمنه بضراوة كأنه ضرب من الخزي و العار يلحق بهن إن اتصفن بالحياء ؟
    البعد عن الفطره هو السبب فالله تعالى خلق الانسان على الفطره الحسنه وقليل مناونكاد نقول نادرامن استطاع الحفاظ على فطرته الحسنه.
    وعن تصرفات البنات والشباب فالشباب تربوا فى مجتمع لا يرى خطأ فى ان يعرف الولد بنتا او اثنان او ثلاثه فهو راجل والراجل لا يسؤه شئ ولا اقصد بذلك المعرفه العاديه من زماله علم او عمل ما دامت قائمه على الاحترام اما عن البنت فقد نشأت فى مجتمع رجاله لا يرون من حسن او جمال سوى فى هيفاء او مثيلاتها ممن هن حجاره النار راكدين فيها ابدا فما كان من البنت الا ان تجعلهن قدوه لها فغاب عنها الدين وغاب عنها الحياء
    ارجوا تقبل مرورى وان لا اكون قد اطلت عليكم

    ردحذف
  14. بعد رحلة سريعه مع حبيبة فى المدونة

    جزاك الله خيراً

    بالنبسه لى كل حكاية مع حبيبة كانت تذكره رائعه
    بجد حسيت انى ربنا خلانى اجى هنا علشان اقرأ و افتكر احلام و نوايا تاهت منى فى زحمة المواصلات

    و افتكر حمزة و حبيبة و كل حاجه كنت بحاول احافظ عليها علشان اعلمهالهم ان شاء الله

    ردحذف

وخلي بالك من كلامك
حبيبي النبي بيقول:
"إن الرجل ليتكلم بالكلمة من رضوان الله ما كان يظن أن تبلغ ما بلغت ؛ يكتب الله له بها رضوانه إلى يوم يلقاه وإن الرجل ليتكلم بالكلمة من سخط الله كان يظن أن تبلغ ما بلغت ؛ يكتب الله له بها سخطه إلى يوم يلقاه".

إضغط على:
الاشتراك عن طريق البريد الإلكتروني
ليصلك بريد الكتروني عند قيام احد بالتعليق
وشكر

توضيح صغنووون خااالص


اقرأ و قول رأيك بحرية – عمري ما هزعل منك