بسم الله الرحمن الرحيم
السلام عليكم ورحمة الله وبركاته
عيدكم سعيد و عساكم من عواده
كان عندنا اجتماع اليوم في نادي طنطا بخصوص المشروع بس حصل إن معانا بنات و اعتقد إن في واحدة منهم عندها حساسية من موضوع الذهاب للنادي و طلعت مشكلة إن إحنا مش هنعرف نتقابل .
مشكلة تانية إن إحنا فيه ناس معنا كانت جاية من قرى و الميعاد الساعة العاشرة , يعني مثلا صياد من السنطة و عشان ييجي منها بياخد ساعة , سامي بياخد ساعة إلا ربع عشان يوصل طنطا .
ايه بقا اللي حصل
انا بيتي قريب من النادي باخد حوالي خمس دقائق غير اني كنت لسه مش خلصت اللي مطلوب مني في الشغل و العرض التقديمي عشان ده كنت مستني لآخر لحظة عشان ألحق اخلص الشغل و عشان أنا عارف إن المواعيد دي ايجيبشين مينت , يعني الميعاد الساعة العاشرة العالم هتيجي الساعة عشرة ونصف
بس خير
المهم . . . لقيت ايميل جاي الساعة العاشرة إلا ربع و كانت من فريق الفتيات اللي شغالين معانا بيقولوا ايه ؟ احنا مش جايين و خلاص ياجماعة و كل عامن وانتم بخير .
المهم قولنا نلحق نفسينا . . . اتصلت على سامي و قلتله محدش هييجي النادي تعالى على البيت عندي عشان نعمل الاجتماع عندي في البيت , و اتصلت على الصياد كان في القطر و خبرته بإنه ييجي على البيت عندي .
و قعدنا هناك نشد في شعرنا و قعدنا نتخانق مع بعض ونبعت شوية ايميلات و محدش يرد علينا و احنا لسه بنشد في شعرنا .
وهنا جائنا ايميل من احد الفتيات وتقول إن النموذج اللي هما شغالين عليه لسه مش خلص و إن فيه مشكل و إن هما مش هيعرفوا يكملوا الموديل .
هنا كان آخرنا وصل آخره .
وقولنا جنت على نفسها براقش .
أخذت الإيمل اللي جت منه الرسالة وروحت ضايفه عندي مخترقا جميع المحاذير و الممنوعات و إني ممكن انذبح أو انطخ بالنار و يقام على الحد لتصرف مماثل .
بس خير . . . كله يهون في سبيل العلم و الذي منه .
المهم جلسنا نحدق في الشاشة ثلاثتنا و ننتظر الفرج هنا جاء الفرج وردت علينا صاحبة الميل و كان معها باقي الفتيات و هنا دار حوار طويل بيننا نحن المجتمعين في بيتي و بينهم هم المجتمعون حول حاسوب قديم لا يستطيع الحركة و كانوا يستخدمونه في تصميم النموذج وطلبوا منا المعونة و هنا خاطبنا ثروت بيه حتى يأتي بالنجدة .
الرجل مكدبش خبر , راح داخل على النت و ساب اللي وراه واللي وراه برضه , فتح الياهو ماسنجر و بكل قوة و عنفوان قال : سلام عليكم , ايه الموضوع ياجماعة .
تحدثنا له عن الموضوع ثم تحدث معهم و أخذ منهم الشغل , جزاه الله و جزاهم خيرا .
سامي اتكلم معاهم عبر ميلي السعيد , وتحدثنا حوالين التقابل و إن إحنا ياريت نتقابل , الشغل هيقع منا , وحياتكم عايزين نشتغل , هنا اخبروه انهم سيفكروا و سيردوا علينا يوم الأحد مسا لما يعرفوا ميتا راح نسافر ويعرفوا ايش راح يجرا و في إيش اتكلم الدكتور في تلفونه معانا .
المهم انتهى الحديث عبر الشبكة الدولية للمعلومات بشبه انقماصة من بعضنا بس برضه خير .
المهم . . . جلس اربعتنا يتحدث و يتناقش حول ماذا سيتم ف\حتى لقاء الممول , هنا نشب جدال عنيف بين طرفان من الأفراد الجالسون معنا و كنا الفردان الآخران (انا وفرد آخر) ننتهج منهج الحايد الإيجابي , بالضبط تمام زي ما مصر ما بتعمل (من شابه أباه فما ظلم) يعني انا جالس على اللاب توب بتاع سامي وعمال أكتب في هاي المقالة وهما عمالين يتحدتوا ثم توقفت المجادلة قليلا عندما اتصل دكتور مروان واعلمنا بأن الميعاد سيكون يوم الثلاثاء باكر (باكر ليها معنى مختلف في اللغة العربية غير اللي كلنا هنفهمه) بعد هذا جلس محمد بيه الصياد لكي يرسل بما حدث و ما سيحدث , جزاه الله خير الراجل تعب معانا كتيرو بس انتهى اليوم على هذا و ها انا الآن مستني النت يفتح عشان ابعت ها الإيميل .
خير خير . . . محدش عارف الخير فين .
كان معكم من مقر الإجتماع – تحت الطربيزة
فتوح أبو المفاتيح متخفيا ً
ليست هناك تعليقات:
إرسال تعليق
وخلي بالك من كلامك
حبيبي النبي بيقول:
"إن الرجل ليتكلم بالكلمة من رضوان الله ما كان يظن أن تبلغ ما بلغت ؛ يكتب الله له بها رضوانه إلى يوم يلقاه وإن الرجل ليتكلم بالكلمة من سخط الله كان يظن أن تبلغ ما بلغت ؛ يكتب الله له بها سخطه إلى يوم يلقاه".
إضغط على:
الاشتراك عن طريق البريد الإلكتروني
ليصلك بريد الكتروني عند قيام احد بالتعليق
وشكر