البلد رايحة للكلاب . . . بجد رايحة للكلاب

دا كان تعليقي على مقالة قريتها في مدونة حلوة خالص اسمها حكايات فريدة المقالة كان اسمها أو التدوينة (أنا و الملك 2ثورة الجياع) محتوى المقالة مستفز لدرجة انك عاوز يعني مش عارف بس هتكون عايز حاجة و السلام

دا التعليق اللي طلع مني على هذه التدوينة الجبارة



الثورة مشكلة زي ما انت قولت
مفيش جهة الناس تتلم حواليها
مش موجود في الساحة غير الإخوان
و اعتقد تسعين في المية من المثقفين في البلد رافضينهم تماما
انا مع الحكومة في دي انهم يخلوهم جماعة محظورة
بس في رأيي الحكومة لسه بتستهبلنا على قفا الإخوان
يعني حاجة نفش فيها غلنا و تدينا شوية مسكنات
تقول إن الاخوان محظورين و رغم كل ده بيتكلموا و بيطلعوا في الجرايد و بيخشوا انتخابات و بينجحوا فيها
و عاملين تكتل جوا البرلمان وكل ده و هما محظورين المفروض اللي محظور محظور و السايب سايب
بس ايه
اللي تعرف ديته اقتله
و الحكومة عرفت دية بتوع الإخوان وعرفت دية الشعب
دانا حكومة محترمة شوفوم دا انا سايبة الإخوان يعملوا اللي هما عايزينه دا انا طيبة دا في حرية في البلد
و أطفال الإخوان هبل لا مؤخذه بيسدقوا و يطلعوا و يعملوا شغل العيال الصغيرة اللي بيعملوه دا
تروح الحكومة ماسكاهم و مدخلاهم السجن لاتقولي حصانة و لا دياولوا
دياولوا ماااااات
و احنا الشعب مصدقين الموضوع
و الناس تقول دا الحل في الإخوان
واالإسلام هوا الحل
و هما اللي هيصلحوا البلد
و يخلوا القشرة تروح من الشعر وهلم جرا


بس خير تعرفي حاجة يا فريدة هانم
اللي هينتهي ليه حالنا هو ثورة الرعاع زي ما قال عليها رئيس تحرير الدستور
انفلات امني ما بعده انفلات حالات اغتصاب بالجملة نهب و سرقة و قرصنة
بس البلد هتفضل في ايد آل مبارك
و الموضوع هيبقا اتاوات و بلطجية و شركات حراسة خاصة و الشرطة في خدمة مبارك بس
و خراب و حظر امني و انتشار قوات الجيش
هنعيش كأننا في حالة حرب
وكل مدينة مستقلة بذاتها
وهينتشر القراصنة على الطرق بين القرى و المدن
يعني المحور مش هنعرف نعدي منه
و عشان تروحي من بلد لتانية لازم تروحي بالطيارة
و كل الناس هتركب عربيات مصفحة
هتبقى الحياة عاملة زي الأفلام الأمريكاني
بس خير
هتبقى حياة سودة اللهم احفظنا
دستوووور يا اسيادنا دستور
دستوووور يا مبارك دستور
و ختاما كتها نيلة اللي عايزة خلف

خلف هييجي يشتغل بلطجي
ونعم الخلف يا خلف