الجمعة، نوفمبر 19، 2010

عبقرية اللحن


صباحكم نادي
معكم في ها الصباح المشرق فتوح ابو المفاتيح , من راديو مراسيل
هتكلم معاكم النهاردة في موضوع انا مستغلسه و بزعل كتير لما بشوفه او بيقابلني
:)
بس لازم الأول مقدمة عشان الناس تفهمني صح
اللحن بعتبره أروع حاجة في أي أغنية أو نشيد بسمعه لدرجة انك سعات متقدرش تقول كلماته من غير لحنها و اوقات تانية كتيرة بتنسى الكلمات نظرا لهايفتها بس بيفضل اللحن عالق في دماغك من قوة و روعة اللحن و مش بعيد تمشي تدندن بيه.
في الأول بس نفرق بين اللحن و التوزيع الموزيكي , اللحن هو تنغيم الكلمات سواء كانت شعرا او نثرا او زجلاً , بحب الزجل انا , زي بالضبط لما تسمع اغنية او نشيد و تغنيها لوحدك من غير موسيقى بنفس طريقتها , هو دا اللحن
أما التوزيع الموسيقى هو إنهم يحطوا الموسيقى المصاحبة للكلام طبقا لللحن و اختيار الآلات الموسيقية المناسبة طبقا للسياق النفسي بقا و المعنوي للكلام , و دا محتاجة واحد عبقري عشان ميعملش اي عك و يحط أي آلات و نلاقي في الآخر حاجة بزرميط , وتلاقى طبله بترزع في ودنك في عز ما انت مستغرق مع الغنيوة


بالنسبالي , اللحن يعتبر جزء رئيسي و مساهم كبير في حالتي المعنوية و المعدنية
يعني مثلا كارمينا بيورانا بتاعة كارل اوورف , مذهلة جدا , رغم انها بالأيطالي وانا مش فاهم هي بتقول ايه لحد دلوقت
Carl Orff - Carmina Burana
بس لو شغال في حاجة و لاقيت نفسي حماسي قل و بدأت اسقط و معدلي قل , اشغلها واسمعها وانا شغال على طول حالة تانية , , , وهكذا


المهم , , , معانا حالة مريت بيها حكيلكم عنها , , , انتقادي هنا لتدني مستوى التلحين و عدم توافقه مع المعنى الخاص للشعر و النتيجة المرجوة منه
هبط عليا اليومين دول حالة من البلادة العقلية و بطلت مذاكرة و تضافر معاها عوامل تانية , انا لو كنت في حالتي العادية مكانتش فرقت معايا
المهم . . . بتوصية من شخص عزيز بحترمه , سمعت نشيد اسمه "سوف نبقى هنا – عادل المشيطي" , النشيد كلماته مذهلة ,قوية جدا , شعر عمودي فيه معاني حلوة جدا , و اداني افكار قوية كتير , فشكرا كتير خالص مالص للشخص دا.
أنا قريت القصيدة الأول قبل ما انزل و اسمع النشيد , و دا جزء من القصيدة:


سوف نبقي هنا
كي يزول الالم
سوف نحيا هنا
سوف يحلو النغم

موطني **موطني
موطني **ذا الابا
موطني **موطني
موطني **يا انا

رغم كل العدا رغم كل النقم
سوف نسعي الي ان تعم النعم
سوف نرنو الي رفع كل الهمم
بالمسير للعلا ومناجاة القمم

الكلام قوي جدا , , , و اداني احساس اني هسمع لحن حماسي قوي , من اللي بيقولوا عليه يجري الدم في العروق و يخليك تقوم من مكانك تجري في الأوضة لحد ما تدوب السجادة تحتيك , دا غير اني اساسا تحمست من قراءة القصيدة و وقفت في نص الأوضة و عملت ليها إلقاء لطيف لدرجة إن زمايلي في السكن كانوا هييجوا يتخانقوا معايا
^_^

المهم
نزلت النشيد و سمعته , , , بس للأسف لقيت لحن ضعيف جدا , اول ما سمعته فكرني بلحنين اعرفهم كويس لأني سمعتهم كتير لحد ما حفظتهم
الأول : نشيد لسوف اعود يا أمي – بتاع حامد بو خاطر
التاني : أغنية – أحن إلى خبز أمي – بتاعة مارسيل خليفة

اللحن بيدي نفس الأحساس بتاعهم , اللحن المسحوب , الرقيق اللطيف اللي مفروض يخليك في حالة استرخاء عشان تعيش في المشاعر الرقيقة بتاعة كلمات الأغنية و مفيش مشكلة انك تعيط يا عيني عليك بعيد عن أمك يا غلبان و هكذا.
تقول زي ما جدي بيقول , آه ياني يامه تعاليلي يامه.
ودا متعاكس تماماً مع القوة و المبادرة و الحماس جوا الشعر نفسه.

تخيل معايا أغنية خلي السلاح صاحي لما تغنيها على نفس اللحن اللي فات , انا جربت ولقيت انها تمشي بس لما تكون نايم على ضهرك و مغمض عنيك و عاوز تنام , بس انا دايما و لحد دلوقت بحب أغني خلي السلاح صاحي لما اكون في اي تدريب بخلي العيال تغنيه معايا او ننشد على أسم مصر , بحس بقشعريرة في جسمي و كم رائع من الحماس و الفخر و القوة و دا نتيجة للأسلوب و اللحن المصاحب لخلي السلاح صاحي , جرب كدا تقول النشيد بلحنه الرئيسي و انت نايم على ضهرك وعاوز تنام – مش هتعرف , اللحن نفسه بيهيئك لحالة نفسية و جسمانية معينة.

على الجانب الآخر , بيقولك لبس البوصة تبقا عروسة , يعني فيه كلمات مش حلوة و غير مترابطة و معاناها ضعيف جدا كمثال
أغنيه هندوس – محمد العسيلي , اللحن بتاعها قوي جدا و حماسي و سريع الرتم يلائم الحالة النفسية اللي مفروض المستمع يكون فيها , و هنا تلاقي إن الكلمات خفيفة جدا ضعيفة المعنى و ركيكة
يعني الإغنية بتقول:
هندوس , ميهمناش كلام , الناس و لا الفلوس , و ادينا اهو عايشين , مافيش جرح مالوش دوا
طلعت بأيه يا فندم من الكوبليه اللي فات ؟؟؟ و لا حاجة , بس اللحن قوي جدا و هو اللي خلى الاغنية دي حلوة
في مشروع التخرج بتاع الأنا , كان فيه ناس معانا لما بيفتر حماسها بيسمعوا أغنيه هندوس و يشغلوها جمبهم و هما شغالين و تلاقي نفسيتهم بقت احسن , و هو متخذ شعاره كلمه هندوس و بقية الكلام ولا في دماغه هو معجب بكلمة هندوس و باقي اللحن

المشكلة بقا
المشكلة هنا دلوقت إن معظم الأناشيد الدينية , بتنتهج من اللحن المسحوب الممطوط دا اسلوب ليها و استايل عام متقارب بينهم بشدة و يطلع واحد يقول انا لحنت نشيد , و كله نفس الأسلوب ترقيق الصوت و مده و بضع آهات بالصوت و كفى الله المؤمنين شر القتال.
ويطلع في الأخر لحن مش متوافق كلياً مع الكلام و بيديك شعور مختلف عن الشعور اللي مفروض تحسه مع الكلام دا بالتالي بيتم تشتيتك و بتفقد الاستمتاع و الأثر المصاحب اللي سمعت عشانه النشيد او الأغنية.
وعليه فقدامك خيارين يا اما تبوظ ودنك وتسمع الحاجات دي و دا رغبة منك في معرفة فحوى الكلام بتاعها.
خصوصا إن الأناشيد صاحبة المعاني و الأفكار بحب اسمعها كتير بشكل متتالي , يعني مرة فضلت اسمع نشيد لا تحزن أكتر من اسبوع بشكل متواصل , كل ما اقعد على الجهاز اشغلها هي بس.
الحل التاني انك تقراها , و انا الصراحة بحب القراية جدا , فبفضل إني اقراها على اني اسمعها لما تكون من نوعية االلحن الأسطمبة.

اسمعوا الاغنية دي , لحنها جميل و قوي , مش مستخدم فيه اي آلات موسيقية , التوزيع المصاحب معمول بالأصوات الآدمية .
هو دا اللي بنسميه عبقرية اللحن

للي مش عارف , انا كان عندي شركة إعلام للأطفال , عملت قبل كدا أكتر من أغنية لطيفة جدا تحمل معاني دينية و عملية و حماسية , اديتهم لواحد اعرفه كان بيغني اناشيد دينية و ما شابه , عملي لحن انا كنت هنام جمبه و انا بسمعه.
شكرته كتير , خدت الأغاني و لحنتها أنا بأسلوب الراب , عجبت الأطفال أوي و حفظوها معايا و كانوا مبسوطين بيها جدا , كانوا بيتنططوا و يسقفوا معاها, و لسا حافظينها لحد دلوقت , بس محصلش توفيق إننا نكملها.

المهم , , , الحاجات دي محتاجة لحن قوي و اللحن القوي محتاج فلوس , و الناس دي معهاش فلوس و نرجع لفكرة البيضة الاول و لا الفرخة الاول , وجحا كان راكن حماره تحت أنهي سحابة.

يلا خير , , , محدش عارف الخير فين
عساكم تكونوا مستمتعين , و هنستنتى مكالمتكم عشان تقولوا لينا رأيكم في اللي إحنا قلناه دا , , , وطبعا إحنا بنذيع على الهوا فاللي ملحقش وقت الإذاعة بتاعتنا عشان يسمع فيها الأناشيد و الأغاني دي يقدر يدور على النت و يحملها
تحياااتي الكثر لكم جميعا

^_^

كان معكم مستمعاً لكارل اورف

فتوح أبو المفاتيح
:)))

الثلاثاء، أكتوبر 12، 2010

مصر و حالها , , , مصر و ناسها



عشان نعرف إحنا فين من أرض مصر
عشان نعرف إحنا منين من أهل مصر
عشان تعرف إحنا مين في اهل مصر
عشان تسمع و تشوف الناس اللي عايشة في مصر
وعشان نعرف بعض و نعرف إحنا فين بالضبط
أنصحكم , , , و دي نصيحة أخوية خالصة من أعمق معاميق قلبي , و النصيحة دي موجهة بشكل شخصي لكل فرد فيكم
إقروا كتاب . . . السكان الأصليين لمصر – لمؤلفه بلال فضل

أنا بقدم النصيحة دي بنية صافية و معترفاً و مقراً بأني طيب و غلبان و مش قصدي حاجة خالص
بس عشان خاطري . . . بلاش تعيطوا . . . و بلاش بعد ما تعيطوا تضحكوا و بعد ما تضحكوا بلاش تقوموا من على الكتاب تلفوا في الأوضة و كأنك لن تجلس قط , و اللي فيكم عنده شعر بلاش يشده.

خير خير خير . . . محدش عارف الخير فين

لمدعيي الواقعية . . . ورافضي الاعتقاد بأن أهم معتقد هو أن تعيش مؤمنا بفكرة محاولاً تنفيذها , متتعبش نفسك و تجيب الكتاب و تقعد تقراه , لأنها مش هتفرق معاك , دي برضه نصيحة أخوية تانية عشان متضيعش 4 ساعات قدام الكتاب يا فندم.

لنك التحميل هتلاقوه في الآخر . . . دوس عليه و نزل الكتاب.
بس بشرط وحيد . . . إياك ثم إياك تنزله غير بعدما تتخذ الاحتياطات اللازمة و قد أزعر من زنجر.

بلاش تخرج من البيت لمدة يوم كامل بعد قراية الكتاب , اقطع صلتك بالعالم الخارجي , بلاش تلفونات او أخبار , اقفل التلفزيون و متشتريش جرايد و قاطع الجزيرة و العربية و البي بي سي و صباح الخير يا ريس
انعزل مع نفسك لحد ما تستقر نفسيا و تلم شتات نفسك اللي اتبعترت و اتقطعت مليون حتة و راحت في كل سكة أثناء قراية الكتاب , فكر كتير فكر غزير , إزاي و ليه , إزاي وصل الحال كدا , ليه السكوت لحد ما وصل كدا , لا تمتعض و تقرف و تقول ياي بلدي , الموضوع كبير يا سيدي الفاضل , الموضوع تخين بجد و مكلبظ أوي

اعمل ليك مج كبير , شاي بحليب مع عود نعنع أخضر , عندك خيارين , ادلقه على نفسك علك تفوق , أو اشربه و انت بتفكر هتعمل ايه

إياك و التواصل مع العالم بعد قراية الكتاب , انا تواصلت و جت قشة دمرتني نفسيا و رمتني في جرف , شق في الأرض , حفرة , بير , المهم حاجة لتحت غويطة أوي أوي , وقت فيها و اصابني شلل و خرس و بله استمر أكثر من 4 ساعات

يلا خير . . . محدش عارف الخير فين
معذرة لقدر العنف الهائل اللي في المقال او الدعوة دي , بس هذا أصبح الحال من حولنا , مش عارف هو الواحد لو مغضبش منه دلوقت هيغضب إمتا.
المهم . . . اتمنى ليك قراية مستمتعة و اربط الحزام و ابتعد عن الأدوات الحادة و مرحبا بك على متن القافلة

كان معكم واقفاً
فتوح أبو المفاتيح – هو إحنا فين بالضبط؟؟

رابط التحميل :

الثلاثاء، سبتمبر 21، 2010

رفض مطلق للحياة , , , يلا نموت بقا


فيه ناس بترفض تعيش الحياة
بترفض كل فرصه تتاح ليها عشان تبقا مبسوطة و انها تبقى سعيدة
لا لا لا
الموضوع مش كدا
الناس دي بتتمتع بكم من الاستهجان و عدم التصديق و احساس بفقدان القيمة
شايفة انها "لا مؤخذة" بهيمة بتدور في ساقية , و مش هتفرق لو بقت كويسة أو بقت وحشة أو بقت مبسوطة , المهم تاكل و تشرب و تنام عشان تعرف تدور في الساقية اللي بتكرهها كويس.

هاجمني دلوقت هاجس مخيف خلاني أقوم من النوم أشغل الكمبيوتر و اتكلم عنه

فيه ناس بترفض تعيش الفكرة و تعيش اللحظة و ترفض انها تنبسط إلا بمقاييس شخصية أنانية معقدة

ناس كتير تحت ضغوط الحياة بترفض بشدة انها تستمتع بقعدة على البحر و سط الرمل تسمع الموج
ناس بترفض الفكرة مهما كانت لذيذة ومهما كانت بسيطة
ناس بتؤثر التنكيد على نفسها و تعشق التعقيد و تحول المشهد اللي فات لشمس حر و رمل مزعج سخن و دوشة البحر و ايه القرف دا و يلا نمشي من هنا و الجو ممل , و ياي دبان

ممكن تقولوا اني تافه
بس الموضوع أكبر من كدا , انا بعيط لما بشوف مشهد صعب في التلفزيون أو حتى صورة واقعد أفكر فيها , بتأثر بيه واتفاعل معاه ولازم ادي ردة فعل أو على الأقل اتكلم و اتناقش و بصدق , لأني حتى لو بعيد عن الموقف فأنا متأثر بالفكرة عشاتها مع اصاحبها.

أنا بحب أعيش اللحظة جدا و اتغاضي بشكل متطرف عن اي منغص في الموضوع
بكره اوي الناس اللي بتقعد تبكي و تشكي و تلوم و تشتم و هي بإيدها تقدر تغير اللي هي فيه , بس هي عاوزة تفضل في اللي هي فيه
بتشوه الصورة أوي , حتى لو عندهم حق , فدعونا نعمل في صمت يا جماعة
ما هو لو معملناش هتفضل الصورة زي الزفت

لما كنت في الكلية و عملنا مشروعنا و كان محوره العمارة الخضرا , كنت معتقد فيها بشدة قريت و فهمت و عشتها , كان فيه ناس معانا عارفة اللي انا عارفه بس بالنسبة ليها الحوار كله مجرد مشروع و لازم اعرف عشان اعدي و بعد ما اعدي ولا اعرفه اساساً , موصولش لدرجة الفلسفة و التشبع بالفكرة

لما اشتغلت في مسابقة مدينة المستقبل , كنت عايش معاها و موقن اني بعلم الأطفال حاجة جديدة و ان لازم الإخلاص و الفهم , كنت برفض اقول المعلومة غير بعد ما اشرح اصلها و سببيتها و إزاي استنتجتها , على العكس كان فيه مدرسين معتبرينها حاجة زي أي حاجة و علموا الطلبة التعامل مع المسابقة كأنها درس عربي احفظه و راجع الأسئلة عشان تجاوب على الامتحان و بعد الامتحان مش فاكر و لا كلمة , المدرسين دي وصلوا الطلبة انهم لما مافازوش , الطلبة كسروا الشغل بتاعهم فتافيت , لأنه لا يحمل أي قيمة لهم , نفس قيمة درس القراءة أو كتاب اللغة العربية اللي بترميه على باب اللجنة بعد الامتحان على طول

انا هنا في ليبيا لما جيت عملت نظام الجودة و الإدارة الداخلية للمشروع كنت معتقد بشدة ان دا لازم يتعمل طبقا للقواعد لأن الصح حاجة حلوة أوي و بعملها عشان المشروع يبقا كويس , مع ان المالك ميهموش الموضوع و المكتب بتاعي متفرقش في الأودية هلك المشروع , و الأدارة كل همها العائد الشهري للمشروع و الاستشاري يهمه ورقة كويسة و تحتها ايه متفرقش , أي بتنجان

سئ سئ سئ سئ سئ
سئ جدا الشخص اللي يموت فكرة

سئ جدا الشخص اللي ميقدرش مشاعر شخص ما و يستهجن بيها لأنه شايف انها اتفه مقارنة بمشكلة انه مش لاقي ميكروباص يروح فيه

سئ جدا الشخص اللي حرم نفسه من انه يستمتع بمشهد جميل أو فكرة أو لحظة حلوة لأنه مشغول و حانق جدا لأن الشمس حر أو انه جعان أو ان المرتب متأخر و مش عارف هيصرف منين

سئ جدا اللي يموت فرحة حد بحاجة بسيطة أوي , لمجرد انه مش عارف يفرح زيه أو شايفها تافهة و متسواش أو انه يشعر بالملل و القرف و مفيش حاجة حلوة في عنيه

سئ جدا اللي بيطلع غضبه و شكواه على الناس مرارا و تكرارا مع انه عارف ان الحل في ايده و هو راضي بالظلم اللي هو فيه , بس هو يفضل البكاء و العواء , انت عارف الحل كويس بتشتكي ليه بقا؟

سئ جدا شخص بيرفض فكرة , أمل , لحظة جميلة , لأنه شايف انه لازم يكون عملي و يكون مقرف و معقد

الخاطر اللي جالي و صحاني من النوم , إني خايف احسن ينتهي بيا الحال مع شخص من العينة اللي فاتت

بس الحاجة اللي لطيفة جدا , ان الأمل موجود , و ربنا موجود , و ربنا بيحب لينا الخير , و عاوزه لينا أوي و بيسرنا ليه لأن ربنا بيحبنا
ودا شئ لو تعلمون عظيم عظيم عظيم
ندي ونقول اللهم ارزقنا الهداية و التوفيق و السداد

من اللذيذ الاستغراق
من اللذيذ الاستمتاع باللحظة لأقصى درجة ممكنة سواء كانت حزنا مغرقا , تعاسة مفجعة , فرحاً يصل للصراخ , انشكاحاً بلا حدود

هتحس بطعم لذيذ جداً
من شوية قريت قصة تعايشت مع لحظات عذبة من الألم و الحزن الصافي كانت ممتعة عيطت و استمتعت بشدة , بس دا يكون في ذات نفس اللحظة , متخليش مشاعر صعبة مش حلوة تعيش جواك اكتر من الوقت اللي حصلت فيه
:)
و الأهم انك متخليش اللحظة دي تطغى على حاجات تانية , ركز و خليك مركز , لأن تركيز الفاكهة في العصير مش اكتر من 70% و الباقي مية

خير خير خير
محدش عارف الخير فين
كان معكم
فتوح ابو المفاتيح

الأحد، سبتمبر 19، 2010

السولار مان



الناس بتفكر بمنطق السوبر مان
لازم تكون من الفضاء الخارجي و من كوكب كريبتون عشان تقدر تعمل حاجة
مستنى حتة كربتونيت تخبط فيك وتقول آآي و ساعتها بقا مفعولها اشتغل و هتعمل و تسوي و اتفرج عليا يا معللللم

في نقطة حلوة جدا جدا قريتها

*********
ضيعت كل مجهودي في التردد ما بين البني آدم اللي نفسه أكونه , والبني آدم اللي الحياة واخداني في سكة إني أكونه
*********

التردد بين اللي اللي انت عاوزه و اللي انت بتفكر فيه
وبين اللي حواليك و الناس و المجتمع عاوزينك تكونه
دا حتى صحابك الأنتيخ مخلصوش من الموضوع دا
واحد من يومين بيقولي : انت بتستعبط حد يسيب وظيفة بمرتب ثابت عشان يدور على واحدة غيرها
^_*
وجهة نظرهم اللي هما شايفينها ان واحد يسيب شغلانة ب 6000 جندي عشان يروح شغلانة تانية ب 2000 جندي وممكن أقل يبقا دا مجنون
ممكن تقول لأنهم مش شايفين
يا سيدي حتى مع الشرح المستفيض , الناس خايفة , الناس مرعوبة الناس ركبها بتخبط في بعض و بتخبط على الجيران كمان لو لزم الأمر

خايفين يجربوا , خايفين يعملوا حاجة لم يجدو آبائهم عليها
خايفين من ضلهم
خايفين يفكروا أو يجربوا و بالتالي واقفني مكانهم على الحياد
لا منهم نجحوا و عملوا حاجة كويسة ولا منهم فشلوا وراحو سكة الضياع و ماشيين ورا السكة القديمة
مفيش مانع تمشي فيها لو انت دماغك فاضية و مش نفسك في حاجة و ملكش رسالة في الحياة , يبقا حلو , كويس ان حد رسملك السكة
بدل ما تقف مش عارف تعمل ايه

واحد صاحبي شغال في حاجة بيسموها الإدارة المركزية للتعمير
نص ساعة رغي وكلام معاه إني اعرف هو بيشتغل ايه فيها , هو نفسه مش عارف
جابوله التعيين و قالوله اشتغل هنا , فشتغل

كتير جدا من الناس لو لم تكن الخطوة بتاعتهم مؤمنة 120% مش هيخطوها
وفي أحيان كتيرة كمان مش بيخطوها حتى مع درجة التأمين العالية , لأنهم بيقولوا عصفور في اليد خير من عصفور تاني قدامي في القفص و مدفوع تمنه كمان , خده يا سيدي ببلاش

تييييييييت تييييت تييييييت

حتى مع نفسك , لما بتيجي تاخد خطوة جديدة , الانسان بيحب يتكلم و يقول لأنه بطبيعته كائن اجتماعي
و التغيير دا هيستدعي انك تتخلى عن عادات سيئة عندك عشان تعرف تكمل السكة
ايه دا انت بتستعبط؟
بس انت كدا بتخالف تابو المجتمع , عوووو , يبدأ الناس اللي حواليك يقنعوك انه خلاص معدش منك رجا , ومينفعش تغير العادة السيئة دي , و استنتاجا على ده فالخطوة الجديدة مش هتنفع
أحسنلك يا ابني خليك مكانك , انا بقول الكلام دا لمصلحتك

هييييه , , , دنيا - تنهيدة بحرقة خالص

خير خير خير
محدش عارف الخير فين

كان معكم
فتوح أبو المفاتيح



تعليقا على نوت , يوم السبت عمره ما هييجي
http://www.facebook.com/note.php?note_id=258685361460

السبت، سبتمبر 18، 2010

الدفا هنا , , , الدفا في مصر


الدفا هنا , , , الدفا في مصر  

قضيت أكتر من 12 ساعة اتبختر في منتدى عمرو خالد , و اعمل شوية سيرش و أجمع و افتح و اقفل و اقرا , و في الآخر جمعت الموضوع ورا بعضه متسلسل و قريته كله الحمد لله
لنك تحميل الموضوع كله

هو ايه الحوار سيادتك ؟؟؟
ارجو من الركاب ربط الأحزمة و غلق ابواب الحقائب و اخفاء أي ادوات حادة استعدادا للإقلاع

امبارح وصلني من شخص (اشكره بشدة) موضوع ما
انا في المعتاد مش ببقا انترستنج في أي حاجة تيجي برا جدول قرائاتي المعتاد بس الموضوع دا خبط في دماغي و كان كام فيوز هيلسع بس لحقناهم الحمد لله
المهم عشان مطولش عليكوا و تزهقوا مني
لقيت اني بخش على منتدى عمرو خالد في موضوع طويييييييييييل و ناس عمالة تبارك في بعض و تسلم على بعض ودا الأخ العزيز و دا الاخت الحبيبة و دا جزاكم الله خيرا و انا مليش حمل على الحاجات دي

بس الغريب اني مازلت مصراً

لفيت على النت عسى اني ألاقي الموضوع متجمع أو إني ألاقي الموضوع الأصلي مش لاقي
التحفت ملايتي و تغمدت سيفي و درعي و قلت استعنا على الشقا بالله و جمعت الموضوع و رتبته طبقا للتسلسل الطبيعي

سؤال على لسان المؤلف – مش انا طبعا
من هم المصريون ؟
المصريون هم من عاشوا في مصر وارتبطوا بها

نرجع للساني تاني :
أعرف واحدة امريكانية , تقريبا في الخمسينيات من عمرها , بقالها أكتر من 20 سن في مصر , جت مصر , عشقت الجمل , وكل حاجة في مصر و فضلت في مصر , بكدا فهي تتوصف بأنها مصرية , لأنها ارتبطت و مقدرتش تسيبها و تمشي , طبعا هي مش قاعدة حبا في الجمل , بس هي بتحبه زي ما انا بحب اشرب فيروز على الكورنيش , , , عادي جدا.

وقال المؤلف أيضا:
الاسم .. مواطن من أصل مصرى بس ماعنديش مانع اخد الباسبور الاحمر من بكره
ومش عايز أكون مصرى ..
مكان الميلاد .. يا أخى .. بلدك اللى فيها مراتك
المهنة .. جامع دولارات وريالات ودينارات وفيديوهات وعربيات

نرجع لفتوح :
هو دا اللي احنا بقينا فينا دلوقت , أكتر من 8 مليون مصري برا مصر طبقا لإحصاء 2009 , مهاجرين ما بين هجرة دائمة و هجرة مؤقته
يعني 1\10 من الشعب المصري ساب البلد بنت . . . و هج وسابها , طبعا فيه اسباب كتير و استنتاجات اكتر ليه هو عمل كدا
بس الأجابة الرئيسة القوية , أكيد عشان البرادس – الفلوس – السبسي – الموني

بس عشان نقدر نعرف نفسنا أكتر و ندرك ايه الفرق وليه الناس دي على الرغم منها انها راحت برا مازلنا بنسميهم مصريين
فالمؤلف قال :
من هم المصريون؟ المصريون هم من عاشوا في مصر وارتبطوا بها

نرجع لفتوح : اعتقد ان دا ممكن يتقال على المهاجرين الكبار , إنما أولادهم و بناتهم اللي اتولدوا و اتربوا في الغربة مش مصريين , ممكن في جواز السفر , مكتوب كدا , ميعرفوش حاجة عن مصر , ميعرفوش يعني ايه تقف في شارع فيصل بالساعتين عشان المرور واقف و برضه تيجي تاني يوم و تقف في نفس المكان , عادي يا جماعة انا بحب أقف بالعربية في شارع فيصل حد له عندي حاجة
او الوقفة يوم الخميس في شبرا الخيمة مستني مكروباص رايح طنطا و السواق يحاسبك الأجرة الضعف و تدفع غصب عنك بعد خناقة مع السواق , مع انك ممكن تروح تركب من عبود او تركب القطر , بس برضه عادي جدا , الخميس اللي بعديه تروح لنفس المكان و ممكن تركب مع نفس السواق اللي اتخانقت معاه , براحتك يا باشا اعمل اللي انت عاوزه

بس الأهم من دا كله و أهم من ذكرياتنا و أفكارنا و مواقفنا في مصر و الحاجات البسيطة اللي ممكن تكون بالنسبة لبعض المعقدين ولا ليها لازمة (زي مثلا وقفة كورنيش اسكندرية , ياااه تدوخ , تحفة) مليش دعوا بالمعقدين المنفسنين , اللي تلاقي الواحد منهم يوم فرحه مكشر
الاهم يا صاحبي العزيز – بما اني مغترب – انك ترجع تاني لبلدك (ويلكم هوم) ومتفضلش متمسمر هناك و تقول بس احوش , طب بس أجمع , طب بس مش عارف ايه , البسابس مش بتخلص
راجع النوت دي بتتكلم عن الموضوع دا:

المؤلف برضه تعرض للموضوع دا و اتكلم عنه بشكل لطيف جدا و اعتقد انه حاصل لناس منهم صاحبي اللي معايا في الأوضة و باقي طاقم المشروع اللي ساكنين في الدور اللي تحت
المهم
قال المؤلف
سافر إلى أقصى الأرض كما شئت .. عاشر و خالط كما شئت . . و لتبقى جذورك في أرضك . . فكلما اشتد عودك ونما إلى السماء . . كلما امتدت جذورك إلى أحضان أرضك ليجني أبناء وطنك يوماً ما ثمرة غربتك

عودة لفتوح
لازم اللي انت عملته برا يكون ليه أثر على بلدك جوا , أمال لا مؤخذة مين هيعمل ايه و مين هيسوي ايه؟؟ يعني لو فخامتك يا صاحب الدماغ الألعمي و التفكير البرنجي و الذهن المتوقد الصداح سبتنا و قعدت برا
او رجعت لينا متهللا بديناراتك و دولاراتك و ريالاتك , متبتخترا متعنتظاً بالأوبترا أو الفيرنا بل وربما المرسيدس
لفيت شوية في البلد و رجعت تاني من مطرح ما رجعت
فدتنا بأيه سعادتك؟ زودتنا ايه فخامتك؟
فدت دينك بأيه سيادتك؟ لو كنت بتدرس ارجع علم و انقل كل علمك للي هنا , لو كنت بتشتغل ارجع و ادي غيرك خبرتك و عرفهم , و على فكرة فرص النجاح في مصر موجودة بس للي يدور و يقول يارب
و على رأي الحزب الوطني , بلدنا هتتقدم بينا , ما هو لازم بينا احنا الشعب اللي طالع عنيه , مش بيهم هما ولاد الستين في السبعين اللي مستعبدين البلد كلها

بص يا ولدي و يابنتي و يا صاحبي و يا خويا , الدفا مش بره , الدفا مش بالمحفظة , الدفا هنا في مصر , اللي مهما كانت زبالة و بنت ستين في سبعين , هتلاقي فيها اللي يمدلك ايده ومش عاوز منك حاجة في المقابل
الدفا هنا , , , الدفا في مصر

دي كانت قراءة كاملة لمذكرات مغترب مصري بقلم د محمود رشاد نجم – دكتور مصري يدرس الطب في ألمانيا
كتبها في البداية في منتدى عمرو خالد و بعد كدا نزلت في كتاب في 2008

قولوا يارب
و تأكدوا إن الدفا هنا , , , الدفا في مصر

سلاموز
كان معكم دماغه فووووق
فتووح أبو المفاتيح – وهييييه

السبت، سبتمبر 04، 2010

أنت حر . . . متبطر على نعمة ربنا ليه؟


على فكرة اتنين من أصل خمسة في الصورة دي اتجوزوا خلاص

العزوبية

يا لها من كلمة ساحرة , , , أكيد لأنها تعبر عن سعادة لا حدود لها , ما هو مفيش أجمل من أنك تكون حر بدون مسئولية سوى نفسك الغلبانة المسكينة , و بدون زوجة تسألك رايح فين و راجع منين , أو تفتش جيوبك تشوف قبضت المرتب ولا لسه أو تلعب في موبايلك و تشوف النمر و المسجات , وتراقب أنفاسك و تحركاتك و ربما ايملاتك لو ليها في النت و الحاجات دي.

المقطع اللي فات دا بنسمعه من شباب كتير , و نلاقي إن معظمهم متفق إن حياة العزوبية رائعة و لا يجب التفريط فيها , على الجانب الآخر تلاقيهم بيسعوا انهم يتجوزوا و يدوروا يمين و شمال و يجمعوا مصاريف الزواج و تكاليفه . . . تناقض عجييب
بس سعات العزوبية دي بتبقا مفروضة عليهم بالإكراه (و دول أغلبية) , طبعاً لأن مفيش حد فيهم معاه 50,000 جنيه في البنك , فالشخص دا عليه انه يستمتع بالعزوبية إلى ما شاء الله
^_^
و نظراً لأني أنتمي إلى الفئة اللي فاتت , اللي شايفة العزوبية حاجة حلوة خالص و حلم طالما تمنيناه , و على الرغم من ذلك في سعي اني اتجوز . . . لذا و نيابة عني و عن اخواني في الكفاح , اهديكم بعض النصائح الجامدة أوي , لعزوبية سعيدة.

1- في الأول كدا , ركز , الرجالة من مميزاتهم انهم لما بيركزوا في حاجة واحدة بينسوا كل حاجة تانية , فسيادتك تفكر كدا كويس , و تحط لنفسك هدف في حياتك الفارغة و تركز كل اهتمامك انك تحقق الهدف دا , يعني فرضا انك تترقى في الشغل و تحصل على مركز جامد أوي فيه أو تشتغل في شركة مالتي ناشيونال
2- بص يا مان , عاوزك تدلع نفسك على الآخر , هاتلك موبايل جديد , ويا حبذا لو جبت عربية فيات 128 , و لاب توب , عن ما حد حوش , , , أنا اول ما ارجع مصر هجيب موتسيكل
3- شوفلك رياضة حلوة و مارسها كثيراً , أي لعبة , بس المهم انها تكون مرهقة بدنيا , و الرياضة دي ليها فوايد كتيير , أهمها انها تشغل بالك عن أحلام شهر العسل يا جميل . . . فاهمني طبعاً
4- لو كنت من بتوع المذاكرة و العلم في الراس مش في الكراس , اشغل نفسك في الدراسة الأكاديمية , روح خد ماجستير , خلصته؟ دا انت سريع أوي , روح خد دكتوراه . . . كمل , العلم لا ينتهي 
5- لازم يكون ليك شلة أصحاب حلوين , تخرج و تتفسح معاهم , و يفضل جدا , انهم ميكونوش مرتبطين أو متزوجين , لأحسن القعدة تنقلب لحديث عن مميزات الارتباط و الزواج , و يقلبوا عليك المواجع يا معلم , و يخلوك تقع في الفخ , أو واحد منهم يدور عشان يجوزك أخت مراته , ما هو عاوزك تدوق من نفس الكاس
6- بص لعيلتك يا خويا , خدهم فسحهم , خد أختك اتمشى معاها و أكلها درة و ترمس , خد والدتك و اعزمها في مطعم على الكورنيش , خد الحاج الوالد و اركبوا مع بعض مركب في النيل , دلع اسرتك و فكر إزاي تخليهم مباسيط , أطلع معاهم مطروح
7- خلي بالك من دي أوي . . . حدد علاقتك مع زميلاتك في العمل و خليها في نطاق الشغل , إحنا عارفين أنك شخص كيوت و لذيذ و لطيف , بس برضه خلي بالك و امسك نفسك مش عاوزينك تفكر انك ترتبط بحد فيهم , أو حد يفكر فيك , هتلاقي البسكوتات و الكيكات و التفاح مالي المكتب عندك.
8- حدد لنفسك مرة كل شهر تعمل حاجة جديدة , حاجة مختلفة , اعمل رحلة يوم واحد لمكان جديد متعرفوش , اطلع على محطة مصر و اركب القطر و انزل في أسيوط و لف البلد كلها و ارجع تاني , خد اصاحبك و اطلعوا رحلة سفاري مع بعض , اعمل حاجة جديدة مجنونة تكسر بيها روتين حياتك و يحسسك بمزايا الحرية اللي انت فيها
9- دماغك عاوزينها بيضاء , امسح منها كل المواقف الوحشة و القلبات اللي حصلتلك و الحب الأول و الاشتغالات دي كلها , خليك فريش
10- هات كشكول 180 ورقة و قلم و اكتب كل المواقف الوحشة اللي حصلتلك و كان سببها البنات , و ياريت يا ريس تتعلم من غلطاتك و مش كل مرة تندب على بوزك يعني خلي بالك
11- دايما على طول و كثيراً فكر نفسك بالحرية الرائعة المذهلة اللي انت عايش فيها , و انك تقدر تعمل اللي انت عاوزة وقت ما انت عاوز , تطلع من الشغل تتمشى في شوارع المحروسة لحد ما تروح الشغل تاني يوم , و تقولهم كنت بتأمل معمار البلد , انت حر و انت رقيب نفسك , افتكر دا دايما
12- لو حد فتح معاك موضوع الجواز , ممكن واحد صاحبك متجوز و شايف الجواز حلو , بس في المعتاد هتكون واحدة ست اللي هتفتح معاك الموضوع دا , والدتك , عمتك , جارتكم , المديرة بتاعتك في الشغل , عاوزك يا صاحبي ساعتها تتعامل مع الموقف بمنتهى الفكاهة و السخرية و تهرب منه على قدر المستطاع , متحاولش تفكر في الجواز غير لما تكون مستعد 24 قيراط

ملحوظة هامة خالص
مع فرضية انك قابلت بنوتة لطيفة , و لقيت نفسك يا عيني عمال تفكر فيها
1- افتكر النصايح اللي فاتت كلها و جربها واحدة تلو الأخرى , لو قدرت تعمل الحاجات دي كلها و كنت مبسوط و مية مية , يبقا تأكد ان قلبك مش مشغول بالانسة دي , يبقا كمل في طريقك و عيش حياتك زي ما كانت , , , حر
2- ادي لنفسك فرصة كبيرة , طويلة , كاملة . . . عشان تفكر في الأنسة الفاضلة , و إياك ثم إياك تستعجل في قرارك , لأنه في معظم الحالات سيادتك بتكون بتعاني من فراغ عاطفي و معنوي – زيي كدا

النصيحة الأخيرة : شوف بقا , , , أنا كدا عملت اللي عليا و زيادة , لو كل النصايح اللي فاتت دي منفعتش معاك و انت مش عارف تبعد تفكيرك و لا قلبك عنها , يبقا خلاص , سيادتك طبيت و وقعت في حب ست الحسن و الجمال , دلوقت انت محتاج تراجع حسابك في البنك و تشوف مرتبك كام و تكلم الوالدة و الحاج , , , مبرووووك هتبقا عريس و تكمل نص دينك يا معلللللم
و مقدرش أقولك أكتر من . . . محدش عارف الخير فين

كان معكم عازباً – و سعيداً على فكرة
فتوح أبو المفاتيح

الاثنين، مايو 17، 2010

المرأة الفيروزية



 وصف المرأة طبقا لفلسفة أغاني فيروز:

هي امرأة محبة عطوفة حنونة عاشقة طيبة غلبانة أوي وعلى نياتها.
تسعى لرضى حبيبها و تشتاق إليه و ترى انه من افضل الناس , لأنه حبيبها هي , و كل بنات الحي بيغيروا منها عشان هو حبيبها.
تفتخر بذكرياتها معه , وتتذكر فقط جميع اللحظات السعيدة التي كانت معه حتى لو كان مشهد رحيل.

لا وجود "للمرأة الذكر" في عالم فيروز المرأة اللوامة الزنانة التي تهدد وتتوعد حتى و إن كانت تتألم.
فالمرأة طبقاً لفلسفة فيروز دوماً رقيقة و لطيفة حتى في لحظات الفراق و البعد , صاحبة كبرياء تحترم الطرف الاخر بشدة , فقد كان في فترة ما حبيبها و تفتخر به جداً – راجعوا أغنيه امس انتهينا

المرأة الفيروزية مبتسمة على الدوام , تلقي جميع همومها وراء ظهرها , لا تلقي لها بالاً , ولسان حالها يقوم اليوم ابقى لي من الماضي.
عندما ينشغل عنها حبيبها , لا تلومه او تزعل منه وتاخد منه جنب , بل هي تبادر بالاهتمام به و إن عاتبته فهو عتاب اقرب إلى الغزل ملئ بالحب – راجعوا اغنيه تبقا ميل
حتى عندما يزعل منها حبيبها , فهي خفيفة لطيفة رقيقة تبادر بمصالحته , لأنه ليس لها سواه , مما يدفعه إلى ان يرفعها على رأسه لأنه ليس لها مثيل
وان غفلت يوم عن حبيبها فهي تتلقى لومه بأسلوب يجعله ينسى كل ما حدث – راجعوا اغنيه لا تعتب علي
وهي مطيعة له دوماً ترى انه يستحق ان تفعل له كل ما يريد , لأنه حبيبها , حتى لو اتهمها المحيطين في عقلها ولاموها على ما تفعل , فهو شئ يريده حبيبها فهو له – راجعوا حبيبي بدو القمر.

حتى عندما تحب في صمت دون علم الطرف الآخر تكون قمة في الرقة و اللطف , حتى انها عندما تحكي عن معاناتها في حبها الصامت تتحدث عنه بشكل ممتع نلاحظ منه انها تسعد عندما تفكر فيه.

على الجانب الاخر فإن حبيبها مخلص لها ملبي لطلباتها ومخليها ست البنات و مفتخر بها مبسوط بها , من الاخر مدلعها اوي , يتذكرها على الدوام و هداياه تغرقها سواء معنوية او مادية , كما انها يحافظ على خصوصيتها لأقصى درجة فهي درة تاجه وملكته المتوجة عصفورة قلبه نيساني.

في العموم فهي بسكوتة رقيقة لذيذة , تستمتع برفقتها , لو اشعلت اصابعك لها لن تكفي كم الحب الذي تمنحه لك أو توفي جزء من طريقة معاملتها اياك.

المرأة الفيروزية التي تعطي مثل هذه معاملة , , , تستحق الأفضل. , تستحق عرشاً كي تستقر عليه.

أنا أحب أغاني فيروووز , , , القيثارة
أنا احب اشرب فيروز أناناس , , , حاجة ساقعة

كان معكم مستمتعاً بفيروز – الساقع


فتوح ابو المفاتيح

الاثنين، أبريل 19، 2010

إحذر . . . التورط العاطفي



فتوح : معانا النهاردة في راديو مراسيل في الفترة المفتوحة
محمد السجاعي , أو كما يقال عنه مستر سيجا , درب اطفال اكتر من 8 سنين متتالية و اتعامل فيهم بشكل مباشر مع اكتر من 1000 طفل.
هيتكلم عن احد أخطاء عمره المتعددة والذي لم يتجاوز 24 , نسيب معاه الميك يحكيلنا:
سيجا :حاجة عرفتها و ادركتها , نورت في دماغي فجأة و انا بفتكر حاجات عملتها.
إياك و اياك ثم إياك تتورط عاطفياً مع الأطفال , سواء ولد او بنوتة.

فتوح : تورط عاطفي ؟؟؟ قصدك ايه بعبارة تورط عاطفي؟
سيجا : الأول نعرفكم يعني ايه التورط العاطفي مع الإطفال – بس دا من وجهة نظري الخاصة.
أكيد أي حد بيتعامل مع الأطفال , و شغال في احتكاك مباشر مع الأطفال بيقابل أطفال حلوة و اطفال غلسة , أطفال لذيذة و اطفال طعمها دلع . . . و هلم جرا , ولما بتحتك بالاطفال دي بتكون وسط مجموعة منهم في تدريب او ما شابه.

فتوح : حاجة حلوة , كمل.
سيجا : أنا بحب الأطفال أوي و بحب اتعامل معاهم و نفسي اتجوز مخصوص عشان أجيب بنوتة صغنونة , أحبها اوي و ادلعها جداً , واتكلم معاها كتير كتير خالص خالص , و افسحها كتير و نقرا كتير.
واجيب ولد جامد اخر حاجة , اخده معايا في كل مكان و يتكلم مع كل الناس و يتعامل معاهم و يفكر و يعمل و يخطط و ينفذ و يقود و يقرأ و يحكيلي أنا و اخته.
هفسحه , بس فسح غير بتاعة اخته , ابني هيطلع إن شاء الله شديد , حامي , راجل مش مااان.

فتوح : ايه دخل العيال اللي ناوي تخلفهم بالموضوع ؟
سيجا : استنى عليا , لو صبر الشارب على المشروب كان فار لوحده
المهم اللي فات كان شرح ضروري للي جاي , أنا لما بتعامل مع اطافيل (على رأي حنونة – 7 سنين) بتعامل معاهم كما لو كانوا أولادي (آخري في التدريب لحد سن 12 – 13 سنة) و بشتغل معاهم فترة طويلة نسبياً.
يجي هنا القلب يميل لطفل معين أو مجموعة منهم , هيحصل مني بدون قصد اهتمام زياد بالمجموعة دي , تعرف اخبارهم تتكلم معاهم اكتر من غيرهم , تركيزك بيكون معاهم.
خصوصا أن مستر سيجا بيبقا منتشي اوي لما بيكون وسطهم و بهيص كتير – بيحصل انك في الوقت اللي بتتعامل فيه مع مجموعة من 10 اطفال تركيزك اكتر مع طفل او اتنين منهم , ودا كان بيسبب غيرة واضحة لاحظتها و تجاهلتها اكتر من مرة , و بتوصل ان اطفال مجموعتي بيقولوا لأي اطفال مجموعة تانية حاجات زي:
مستر سيجا بتاعنا احسن من المستر بتاعكم , و بيبعدوا أي حد من الاطفال التانيين يجي يلعب معايا في فترة الترفيه , لأن مستر سيجا بتاعهم لوحدهم هما بس اللي يلعبوا معاه

فتوح : إممممم.
سيجا : النقطة المهمة , انه في الاول و في الاخر دول مش اولادي (رغم اني دائماً اسميهم هكذا , أولادي وبناتي) دول أطفال جم في سكتي و واجبي ناحيتهم إني علمتهم حاجة حلوة.
أنا في الفترة اللي دربت فيها أطفال , دربت اكتر من 1000 طفل و كان باحتكاك مباشر بيني وبينهم.

فتوح : عدد كبير أوي , دي حاجة حلوة , و راحوا فين ال 1000 طفل؟
سيجا : راحوا في حالهم و أنا روحت في حالي , ونسيوني و ما زلت اذكرهم. , اللي فاكرني و لسا بيتواصل معايا منهم عدد يقترب من 5 أطفال.
و في الاخر بزعل خالص لأن التواصل معاهم راح واصبح ذكرى لدرجة ان فيه ناس منهم نسيوا اسمي.

فتوح : يا عيني . . . يا حرااام
سيجا : صح عندك حق . . . الاستنتاج اللذيذ ايه؟؟؟
ضاع عليا في وسط كل دا و في حمى الاهتمام بطفل او اكثر بشكل خاص , اني ابص لباقي الاطفال و اني اوزع نفسي عليهم, اتصرفت ناحيتهم بأنانية.
اه هو أنا اديتهم حقهم كتدريب و تعليم من نايحة شغلي , بس الاهتمام و إدراك هما عملوا ايه ,اني امنحهم استحسان وتشجيع حقيقي . . . مفيش , مكنش بيحصل , مع انه كان نفسهم في حاجة زي دي.

فتوح : طب توصلت للاستنتاج العبقري دا ازاي ؟
سيجا : النهاردة كنت قاعد بتفرج (قبل ما اجي الاستوديو) على صور الحاجات اللي كنت بعملها , بدأت ألاحظ انه فيه اطفال تانية , كويسين أوي , عملوا حاجات حلوة اوي , عيونهم كانت بتبصلي بشكل حلو و أنا بصورهم . . .ولسان حالهم بيقول مستر سيجا , تعالى بص أنا عملت ايه
:( :(
أنا ازاي ملاحظتش دا , إزاي فوت إني اتعامل معاهم من قرب , و اني اقعد معاهم و لو 5 دقيقة اسمع منهم.
أنا ليه بخلت عليهم بكلمة إعجاب أو كلمة تشجيع خارج نطاق عملي.

فتوح : فرجتك على الصور دي حسستك بأيه؟
سيجا : أنا زعلان جداً , زعلان بجد , زعلان من نفسي أوي , زعلان من اللي عملته فيهم , و زعلان عشان اللي معملوتش معاهم , اتصرفت بغباء و أنانية , وكنت احمق كبير بدرجة رئيس قسم.

فتوح : زي ما شفنا كدا مع بعض , دا اللي بيجرى للواحد لو تورط عاطفيا ً مع الأطفال , و دا الاعتراف اللي حصلنا عليه من ضيف حلقتنا مستر سيجا , تحب تقول حاجة في اخر الحلقة؟
سيجا : أنا خدت قرار إني اكون عام للجميع , مبتسم لهم جميعاً سعيد للجميع , مش بتاع شخص محدد.
بس دا في حالة اني ارجع اشتغل مع الأطفال و دا أمل ضعيف يكاد يكون ميتاً نظراً للظروف الراهنة و حالة دماغي الكاسدة.

فتوح : ليه كدا يا مستر سيجا ؟ هتبطل ليه ؟
سيجا : . . . . .

فتوح : نعتذر عن عدم رد الضيف, لأنه ساب لينا الاستوديو فاضي و مشي من غير ما يرد , لأننا للأسف نسينا نمضي معاه عقد للحلقة بشروط جزائية عشان مش يجري ويسيبنا.
جري و سابنا مدرب العيال , صحيح من عاشر القوووم.

يلا . . . خير خير خير
محدش عارف الخير فين
كان معكم – على الراديو مباشرة
فتوح ابو المفاتيح – إياك و اياك ثم إياك

الخميس، أبريل 01، 2010

العشاء الاخير في حياة ميشو



معانا النهاردة في الفترة الحرة في إذاعة مراسيل شخص لطيف جداً و بسيط أوي , هو ذكر , نقدر نقول عليه راجل لأنه في السن اللي الذكور بيتوصفوا فيه انهم رجالة.
هنطلق على ضيفنا اسم مستعار , هنسميه هشام.
ونسمع حكاية هشام . . . .


الموقف الاول – قبل الزواج :
هشام مروح البيت آخر الليل . . . تعبان بعد يوم شغل طويل و قرفان اخر حاجة , والدة هشام عاملة عشاء زي الفل , لما دخل البيت والدته بتقوله تعالى اتعشى يا ميشو . . . عشا مخصوص عشانك.
رد ميشو : معلش يا مامتي أنا تعبان خالص ومش هقدر اتعشا , أنا هخش أنام.
ميشو دخل نام . . . و ماما قعدت برا زعلانة.
¯ ¯ ¯
الموقف التاني – بعد الزواج:
هشام برضه مروح البيت آخر الليل . . . تعبان بعد يوم شغل طويل و قرفان اخر حاجة , زوجة هشام عاملة عشاء زي الفل , لما دخل البيت زوجته بتقوله : تعالى اتعشى يا ميشو يا حبيبي . . . عاملة عشا مخصوص عشانك.
رد ميشو : معلش يا حبيبتي أنا تعبان خالص و مش هقدر اتعشى , أنا هخش أنام.
ميشو دخل نام . . . و زوجته قعدت برا زعلانة
¯ ¯ ¯
نسيب ميشو في جنب ونتكلم "نهجرس" مع بعض:
الموقفين دول شبه بعض تمام , و نقدر نستنتج إن العامل المشترك بينهم هو بطلنا هشام (ميشو) و نلاقي إن والدة ميشو وزوجته الاتنين طلعوا نفس رد الفعل انهم زعلو نتيجة نفس الفعل , ونقدر نستنتج سبب زعلهم كالتالي:

أولا : سبب زعل أم ميشو:
زعلت أوي لأن هشام دخل نام يا ولداه من غير ما يتعشى , بعد يوم عمل مرهق و طويل جدا , و يا عيني ياكبدي الولد على لحمه بطنه من صبحية ربنا , هو يعني باكو البسكوت ولا كيس الشبسي اللي بياكله هيفيده بحاجة ! ! !
أنا الصبح اوي ما يصحى هعمله فطار جامد عشان ياكل كويس , أحسن يا ضنايا الواد يقع من طوله , انا ملاحظة انه اليومين دول وشه اصفر من اللف والدوران . . . يا عيني على ولاد اليومين دول , محدش بيعرف ياخد باله من نفسه.

ثانيا سبب زعل زوجة ميشو:
زعلت أوي لأنها تعبت أوي في عمايل العشاء (و من حقها) و هشام و لا بص عليه و أكل منه اي حاجة حتى و لو جبر خواطر , وهي المسكينة فضلت قاعدة مستنياه كل دا وفي الاخر ميعبرهاش و يخش ينام و ميقعدش معايا و لا يسألني عملتي ايه النهاردة "إهئ إهئ" دمعتين.
هشام دا طلع اناني اوي , أنا هخاصمه ومش هكلمه لحد ما يعرف غلطه و يجي يصالحني.

وفي نهاية الحلقة نقدر نستنتج شوية حاجات :
1- ميشو بيرجع البيت متأخر قبل و بعد الجواز و اغلب الظن انه شخص فاسد وبيلعب بديله , ولازم حد يقفشه و يظهره على حقيقته عشان يبطلوا يعملوا ليه عشا.
2- ميشو مش بيتعشا , يبقا والدته يوفروا تمن العشا.
3- ميشو بيحب ينام كتير.
4- العشا دا العشاء الأخير في حياة ميشو لأن مراته مش هتعشيه تاني.
5- حب الأم و اهتمامها مفيش زيه أبداً و ميتعوضش , ودايما مصلحتك و راحتك أهم عندها من أي حاجة تانية , و بتنتحل ليك دايما الاعذار وعمرها ما بتفهمك غلط , عشان كدا عمرها ما بتزعل منك.

ملحوظة :حدث بالفعل – أنا لما كنت شغال في القاهرة , و بروح طنطا آخر الاسبوع , ماما كانت بتجمعلي أكل الاسبوع كله (لحمة فراخ سمك جمبري بط) ومكرونة بالباشميل "مكرونة كيكة" و تقعد تزغطني جمعة و سبت على أساس اني دايما لوني اصفر و مش لاقي اكل في القاهرة.

خير خير خير
محدش عارف الخير فين

كان معكم على الهواء مباشرة
فتوح ابو المفاتيح – إذاعة مراسيل – الفترة الحرة

توضيح صغنووون خااالص


اقرأ و قول رأيك بحرية – عمري ما هزعل منك