كن سعيدا ترى الكون سعيداً

السبت، فبراير 16، 2008

أنا زعلان


أنا النهاردة زعلان

مش عارف ليه

هو زعل بسيط

لا يرقى لكونه اكتئاب لأن في حالة معتدلة و الحمد لله

بس أنا حاسس دلوقت إني الزعلان

(الساعة 7.30)

روحت البيت و حسيت إني زعلان

أعتقد هي مجموعة حاجات حصلت ورا بعض

خلتني ابقا زعلان

وهي تتنوع بين

إن واحد زعلان على نفسه

زعلان من نفسه

زعلان من ناس تانية

زعلان عشان حاجة كان نفسه فيه و محصلتش كما توقع

نيجي بقا و نفصصهم

أول حاجة : إن واحد زعلان على نفسه , وهي تفرق إن واحد صعبان عليه نفسه , و انا طبعا ً ما هقولكم ليه ان زعلان على نفسي .

تاني حاجة : زعلان من نفسه , و الواحد بيزعل منها عشان عملت حاجة هو معتقد إنها يا إما سخيفة يا إما مش كويسة , بس عشان هي دماغها بطيخة فهي بتعمل و بتتكل على ربنا و مبتاخدش رأيي في حاجة أو بتقولي هش انتا بلاش كتر كلام , و بعد ما تعمل العملة تيجي تقولي هااا ايه رأيك ؟ أقووم أنا بقا زعلان منها و مقدرش أعاقبها , ما أنتم عارفين إن قلبي رهيف و بدلعها كتير .

تالت حاجة : زعلان من ناس تانية , و دي بقا أنا زعلان من ييجي كوبشة ناس (مجموعة يعني) , من يومين واحد صاحبي من قايمة أصدقائي سابلي أوف لاين غريب مش فهمت منه حاجة , عمال يشتمني فيه و يقولي "أنت بتضحك على نفسك , فاكر نفسك بتكسب بس أنت بتخسرحاجات كتييير" و عمال يقول إني ندل و جبان وخسيس و شوية كلام كتير , المهم انه بعت الأوف لاين دا بعد ما بعتله لنكات آخر ثلاث مقالات ليا (عيد ميلاد أبو فصادة – طرد العظماء خارج الكتلة السكنية – Back to School) وأنا مش عارف إيه علاقة دا بالموضوع , وريت ماما الكلام دا وحكيتلها على الموضوع , قالت "لا يا محمد مالهاش علاقة بالمقالات دى , ده مبؤوء منك بأه وحشه قوى , أكيد فى حاجة حصلت" , طبعا أنا مش قولت لكم كلامه صاحبي كله . دا واحد من الناس اللي زعلوني , باقي الناس بقا ربنا يسامحهم , مش أقدر أقولكم هما مين و عملوا ايه , لأحسن تصعب عليا نفسي و أبدا أعيط (أنا شكلي هعيط) , هما بس كده خليهم استاتيكين , وزي ما بيقول المثل (أعمل صينية الجلاش باللحمة المفرومة , و أرميها في البحر) .

رابع هام و الأخير:

زعلان عشان حاجة كان نفسي فيها و مخصلتش كما توقعت , لما حاجة زي دي بتحصل ببقا مخنوق جدا , بحس إني مش عارف أتنفس , بحس إن حركتي تقيلة جدا , كأني عام في برطمان مولاس , بتحرك بصعوبة , ونفسي باخده بالعافية , مع إن الحاجة اللي أنا بعملها , أنا بحبها جداً و بستمتع إني اشتغل فيها , بس لما تحصل حاجة زي كدا , بكره نفسي وبكره اللي حواليا وبكره الشغل اللي أنا فيه , مش كراهية بمعنى الكراهية , لأ ببقى مخنووووق ومش عاوز أكلم حد , عشان كدا أنا بزعل , بزعل لأن الناس دي و الشغل أنا بحبهم جداً جداً جداً .

خير . . . محدش عارف الخير فين .

انا مش عارف أنا بفكر فيه ايه دلوقت .

بس انا في المعتاد لما بكون زعلان ببقا فاقد للطاقة ولكن ليس بقدر كبير , وببقا عاوز انام وخلاص مهما كان سبب النوم .

بس انا دلوقت مش هنام , ورايا شوية شغل عاوز أخلصه , و أنا مستمتع بهذا الشغل رغماً عن كل الحاقدين والمغرضين و الجعانين وأي حد تاني نفسه يكون الشغل دا رغماً عن عينه .

خيييير أوي

محدش عارف الخير فين

كان معكم زعلاناً

فتوح أبو المفاتيح – اللي كان زعلان

التسميات:

12 تعليقات:

Blogger أخـت فـى الله يقول...

لا اله الا الله
ليه يابنى كده
شكلك اخدت عين كبيرة ومدوره
قل اعوذ برب الفلق

16 فبراير 2008 في 5:49 م  
Blogger الـسـيـدة نـون يقول...

ارمى ورا ضهرك وماتزعلش
محدش واخد منها حاجة
سلام
اختك خيخة

17 فبراير 2008 في 12:21 ص  
Blogger FadFadA يقول...

عمي
الضحكة تهون أي جراح
الدنيا لو جارحة لونها لون فرحة
انسى بجد

و زي ما بتقول
ماتعرفش الخير فين
ممكن الحاجات اللي حصلت كان الخير انها تحصل حتى لو زعلتك
و الحاجات اللي ماحصلتش كان الخير انها ماتحصلش

صح ؟

محمد

17 فبراير 2008 في 10:56 ص  
Blogger MerMaid يقول...

همممممممممم

اكتر حتة اثرت فية هي انك زعلان علشان موقف سخيف انت عملته
وده بيحصللي معظم الوقت

متزعلش كتير
انا عجبني قوي اسم مدونتك
فعلا رائع
و ده بيدل علي انك شخصية متفائلة ومنفتحة ومقبلة علي الحياة
اتمني لك حظ سعيد دوما و حياة موفقة
:)
نورتني و اسعدتني بتعليقك عندي

18 فبراير 2008 في 3:32 م  
Blogger nigro يقول...

إيه يا واد يا سيجا ده؟
بقى أنا بقالي فترة بعيد عن البلد
قصدي بعيد عن مدونتك
أرجع ألاقي المود الحزايني ده
لا لا لا لا
إرمي ورا ضهرك يا عم الحاج
ما تندمش على حاجة في حياتك
غير على حاجتين بس
1-التقصير في حقوق ربنا عليك.. لإنك بكده تكون بتظلم نفسك أكبر ظلم
2- إنك تكون غلطت في واحد عمره ما غلط فيك ولا زعّلك ولسه باقي عليك
غير كده.. ما تشغلش بالك
و اسمع كلام عمك صلاح جاهين
نسمة ربيع لكن بتكوي الوشوش
طيور جميلة بس من غير عشـوش
قلوب بتخفق إنما وحدها
هي الحياه كده .. كلها في الفاشوش

18 فبراير 2008 في 4:20 م  
Blogger ftafeet يقول...

يااااااه لالالا متزعلش حقك عليا انا المره دى امسحها فيها

زبعد كده ولى بس على اللى يزعلك وانا اموتهولك على طول مافيش تفاهم

نورتنى فى المدونه عندى (وبقولك ايه اشوفك على طول هناك ماشى هيا بلطجه اه)؟؟؟
nonaaa

20 فبراير 2008 في 8:52 م  
Blogger فتوح أبو المفاتيح يقول...

شيمى هانم ساكنة الاسكندرية

انت عندك حق في موضوع إني خدت حاجة
هي مكانتش عين
هي اني مخدتش حاجة اساسا
بس خير برضه
قل اعوذ برب الفلق
محدش واخد منها حاجة

ومحدش برضه عارف الخير فين

سلاااااامون ورنجة وفسيخ

1 مارس 2008 في 6:00 م  
Blogger فتوح أبو المفاتيح يقول...

مدام خيخة
بعد اذنك
هقولك يا خوخة
لأنك بهذا القول عن نفسك تنقصين من حقك شئ كثير
رغم أفعالك الفزيعة
بس انت ليكي حقك كأنثى و كأخت

مايصير أبدا إننا نقول مثل هذا كلام عنك
المهم
كيف ما انت قولت

عذرا مو راح أعمل بنصيحتك
ومو راح أقدر أرمي ورا ظهري
أشكرك بشدة خيتي
وعساكي تكون دوما على مدونتي

هلا راح صاير أبلش

سلاااااااااام

1 مارس 2008 في 6:02 م  
Blogger فتوح أبو المفاتيح يقول...

فضفضة
هيييييه
تقول ايه على الدنيا اللي بتاخدنا وترمينا بحمل أكبر من اللي كان فينا

المهم

بس كيف ما بقول دوما
وكيف ما انت ذكرتني

الحياة حلوة بس نفهموها كويس
وكن سعيدا ترى الكون و حبيبتاك سعداء

وختاما محدش عارف الخير فين
سلااامووون

2 مارس 2008 في 2:43 ص  
Blogger فتوح أبو المفاتيح يقول...

ست هانم
MerMaid
أسعدني حضورك لمنزلي

بس زي ما انت قولتي

أصعب شعور إن الواحد يعمل تصرف سخيف
وبعد كده يعرف انه سخيف

بس أقولك مفاجأة
التصرف اللي انا عملته
مطلعش سخيف

هيييه
وصاحبي مزعلش مني

بس خييير
واشكرك على اعجابك بإسم مدونتي

2 مارس 2008 في 2:46 ص  
Blogger فتوح أبو المفاتيح يقول...

نيجرو بيه
منور بجد المدونة عندي
انت ليه مش بتطل غير كل سنة مرة
حرام تنسوني بالمرة
حراااااااام
تنسوني بالمرة

بس انا سعات بعترض على موضوع انك ترمي وراضهرك
لأن زعلك من نفسك
دا إشارة أنك تبدأ تعدل من نفسك وتحسنها و تخليها حاجة أحلى وأحسن
بس خيييييييير
محدش عارف الخير فين
سلااااام

2 مارس 2008 في 2:51 ص  
Blogger فتوح أبو المفاتيح يقول...

فتفوتة

طبعا طبعا
طبعا
انا بس شايلك لوقت عوزة
خنافة مع سرب نمل
قطيع من البراغيث المتوحشة
حاجة كدا على قدك
يا مس فتفوتة
بس الحمد لله
انا بخير دلوقت
يدوبك مصدع ودايخ ومكتئب
والزعل
خلااااااااص
رااااااااح
كله راااااااااااااااح
ههههه
خير أوي
سلااااااام

2 مارس 2008 في 2:53 ص  

إرسال تعليق

وخلي بالك من كلامك
حبيبي النبي بيقول:
"إن الرجل ليتكلم بالكلمة من رضوان الله ما كان يظن أن تبلغ ما بلغت ؛ يكتب الله له بها رضوانه إلى يوم يلقاه وإن الرجل ليتكلم بالكلمة من سخط الله كان يظن أن تبلغ ما بلغت ؛ يكتب الله له بها سخطه إلى يوم يلقاه".

إضغط على:
الاشتراك عن طريق البريد الإلكتروني
ليصلك بريد الكتروني عند قيام احد بالتعليق
وشكر

الاشتراك في تعليقات الرسالة [Atom]

<< الصفحة الرئيسية