يارب استجب يارب

قال تعالى : {{ وإذا سَأَلَكَ عِبادي عَنِّي فَإَنِّي قَريبٌ أُجَيبُ دَعْوَةَ الدَّاعِ إِذا دَعانِ فَلْيَسْتَجيبوا لِي وَلْيُؤْمِنوا بِي لَعَلَّهُمْ يَرْشَدونَ }} سورة البقرة

***

بتدعيلي ولا لأ ؟؟؟
**

ويا ترى بتدعيلي بإيه ؟؟

سيدنا النبي بيقول

إن الله يحب الملح في الدعاء

عيد ميلاد أبو فصادة

عيد ميلادي قرب

هييييه

14/2/1986

يوم عيد الحب

ال 6 ميليار نسمة في العالم كل بيحتفلوا بعيد ميلادي

أمال لما أبقا حاجة مهمة وآخد نوبل هيعملوا ايه ؟؟

الله يبارك فيكو يا جماعة

كفاية تهاني

انا خلاص مش قادر

الفرحة مش سايعاني

كل دول ناس افتكرت عيد ميلادي

ألف شكر يا جماعة

(فتوح كان بيحلم و صحي من النوم)

كيف الحال يا جماعة

أنا كنت كاتب مقدمة ظريفة للمقالة دي بس أنا نسيت مكانه ومش عارف هو موجود فين

المفروض دي قايمة الحاجات اللي نفسي تجيني في عيد ميلادي

أو نفسي عموما أجيبها

و أكيد مخطط ليها إزاي اجيبها

المهم نبدأ مع القايمة :

1- كتاب (عرسنا في الجنة) شوفت عنوانه و البوستر بتاعه وعجبني جداً ، نفسي أقراه جداً جداً .

2- كتاب (قلمين) قرأت مقدمة الكتاب و عجبتني جداً فمقدرتش أحوش نفسي عنه ، لسه لحد دلوقت بحوش في تمنه عشان أروح أجيبه .

3- عاوز قلم رصاص بسنون ، بس يكون حاجة محترمة وبلاش روترنج .

4- عاوز شقة في اسكندرية ، في أي مكان في اسكندرية مش فارقة عندي ، بس يكون جنبيها مواصلة توديني للكورنيش ، عشان أتمشى عليه كل يوم و أفكر و أفكر و أفكر و أتبل من الموج .

5- عاوز قلم رصاص خشب ، عشان دا هيبقى بالنسبة ليا حاجة جامدة جدا جدا جدا و هعمل بيه روابط نفسية من هنا لبكرة الصبح ، وعشان كدا مش هقبله من أي حد، أنا هقبله من شخص واحد بس في دماغي ، ولا مؤخذة لو أي حد تاني جابه هقبله طبعاً ومش هقول لأ ، بس هاخده وأحطه في الدرج ومش هعمل بيه أي حاجة أو أية روابط و لن يكون له أي أستخداام . . .

و الشخص دا محدش ليه دعوا بيه ومحدش يسألني مين هوا ، لأني ممكن مكونش عارف . . .

محدش عارف الخير فين .

6- عاوز جراب حلو للموبايل بتاعي (i-mate jam) يكون عامل زي جراب الكاميرا مبطن وحلو و ظريف (على فكرة يا جماعة أنا خلاص اشتريت جراب جلد طبيعي مبطن إنما ايه حاجة خرافية) .

7- كتاب الفاجومي للشاعر الكبير أوي أوي أحمد نجم ، أصلي قريت له شعر كتييير و اتفرجت على أكثر من مقابله ليه ، دا غير إني كمان معجب بمسار حياته و انه رجل صلب .

8- عاوز كتاب يتكلم عن اليبرالية الصرفة بدون وجود رأي لكاتب الكتاب عنها أو وجهة نظره حولها ، يعني حاجة مثلاً زي (تاريخ الليبرالية) .

9- عاوز كتاب (ابنة القدر) لبناظير بوتو ، أصل انا قريت مقالة حلوة ل (أيمن نور) كان بيتكلم فيها عن بوتو ، و اتكلم عن الكتاب بتاعها .

بصراحة . . . شكله كتاب حلو ، وكمان بوتو بتتكلم فيه عن تجربتها ، وأن من زمان من أيام ما كانت ماسكة الوزارة في باكستان ، كنت معجب بيها جداً ، و اللي يقول (ما أفلح قوم ولوا أمرهم امرأة) دا ما بيفهمشي ، و أخزق عيناه الاثنتان ، عشان هوا مش فاهم معنى الحديث ، بس دا كله طبعاً بعد ما أفهمه معنى الحديث و ميرضاش يقتنع .

10- تتخيلوا إني بدأت أقرأ لفاروق جويدة بعدما قررت ألا أمس شيئاً عليه اسمه ، كمت كرهته لدرجة إني نسيت لماذا أكرهه لهذه الدرجة، ولكن هذه الأيام بدأت أقرأ له ، وتخيلوا المفاجأة أعجبت به و بدأت أقتبس عباراته ، ودا بعدما اقتنصت كتاب كنت جايبه هدية لواحد صاحبي , يعني مش هديه حاجة . محدش عارف الخير فين ، أنا عاوز أي كتاب فيه أعمال نثريه له ، لأني حتى الآن جاهل في فاروق جويدة ، أما عن قصايده فأنا ممكن أجيبها من النت ، بس أنا بحب أقرأ من الورق أكثر من استمتاعي من القرائة عبر الحاسوب ، ويا سلام لما كون الورق أصفر و قديم ، دي تبقى عيشة تانية خااالص .

تعرفو أنا عندي كتاب عمره يزيد عن 90 سنة ، مش عارف بتاع مين ، خرافة الطباعة بتاعته زبالة وزي الزفت ، بس حاجة جبااارة .

خير خير خير

محدش عااارف الخير فين . . . صح ولا ايه ؟

تعرفوا أحلى حاجة إن الواحد عيد ميلاده يبقى في أول السنة كدا

أنا السنة اللي فاتت أحتفلت بعيد ميلادي في شبين

و أصحابي وقفوني على كرسي وداروا حواليا زي الهنود الحمر

وهاتك يا غنا

كنا في اسبوع شباب الجامعتا

وكنا لسه راجعين بالدروع اللي واخدنيها عن جدارة و كوسة و استحقاااق

خير برضه

صح ولا ايه

كان معاكم طافيا شموع عام مضى

فتوح أبو المفاتيح – مغمضا عينه متمنياً عاماً أفضل

Back to school

الحمد لله بدء الترم التاني على خير . . . ولسه لحد دلوقت مخدناش أي حاجة , ولا حتى في أسناننا .

الترم ده (بإذن الله) آخر ترم ليا في حياتي كطالب (Under Graduate) (مؤقتاً حتى الآن) , و حيث أني قضيت الترم اللي فات بزرميط و في تكاسل كطة تخطو خطوات بخطوات وئيدة نحو حاجة هي مش عارفاها .

لذا فإني أضع هضا الجدول , و أبتكر هذا السيستم , حتى أحاول السير عليه و الالتزام به إن شاء المولى عز وجل , بس قبل ما نبدأ نقر مجموعة مبادئ (أنا اليومين دول بحب أفكر في المبادئ كتييير) :

1- العقل السليم في الجسم السليم .

2- الصراحة مع النفس لا غنى عنها .

3- لا أتذكره بس كان فيه مبدأ ثالث .

جدولي اليومي بإذن الله هيكون كالتالي :

- الاستيقاظ باكر في الساعة السادسة صباحاً .

- صلاة الصبح .

- تمارين الصباح 5 ضغط ، 5 بطن ، 10 نط الحبل .

- توضيب أدواتي حتى يجهز الفطار (أنا اللي بعمله) و ارتداء ملابسي .

- الإفطار أمام التلفاز مشاهداً الاخبار على قناة الجزيرة .

- مغادرة البيت في تمام الساعة السابعة والنصف .

- ركوب ميكروباص من الجملة حتى المعرض .

- الهرولة من المعرض حتى الكلية (فوائد المشي الرياضي)

- تقضية اليوم في الكلية – محاضرات ، سكاشن , مشروع و هلم جرا .

- أروح للبيت و اتغدا غدا خفيف .

- أنام لمدة تتراوح بين ساعة إلى ساعة ونصف .

- الاستيقاظ ثم المذاكرة حتى العاشرة مساءاً .

- ساعة نت ترفيه من العاشرة مساءاً حتى الحادية عشرة إلا ربع .

- الذهاب لجيم من الساعة الحادية عشرة حتى الساعة الثانية عشرة .

- النوم من الساعة الثانية عشرة حتى الساعة السادسة (12 : 6) .

وكل عامن وانتم بخير

اعتقد انه جدول ظريف ، ويارب يوفقني و اقدر انفذه .

عشان كده انا ليا طلب من كل أصدقائي و أحبائي و زملائي ، انهم يساعدوني على تنفيذ هذا الجدول , وأن يحثوني عليه , وألا يرتكبوا أي فعل أو تصرف قد يبعدني عنه أو يجعلني أحيد عن التصرف وفقاً لما هو مخطط بإذن الله, وأنهم يطمنوا عليا كل شوية ماشي عليه ولا . . .

قولوا ياااارب يوفقنا و يوفقكم , وكل واحد يعمل اللي هوا عاوزه , و الدنيا تبقى ربيع والجو يصير بديع و هييييه . . .

خير خير خير

محدش عارف الخير فين

كان معكم راجيا نجاح تخطيطه

فتوح أبو المفاتيح – مفكراً بعمق و استغراق

تاريخ 11/2/2008

في البيجوا أثناء سفري للزقازيق الساعة 10 صباحاً

ليلة بلا ملامح

كنت اقلب في بعض أوراق فتوح , فوجدت هذه المقالة
و اعتقد ان موضوعها مناسب جدا لحالة فتوح وما يمر به وما يعانيه في هذه الآونة
ارجوكم الدعاااء لفتوح
انه الآن في الانعاش يهذي و يخطرف
يحدث نفسه حينا و يؤنبها حينا
يضحك تارة ويبكي الاخرى
كما يقول المثل (حالته تصعب على الكافر) عندما اقارن ما كان فيه من تقافز و فرح و ما يعانيه الآن لا ادرى ماذا اقول و لا ادرى كيف اصف حالته الآن , تعجز كل الكلمات المعروفة بجميع اللغات عن وصف مدى المأساة التي يعيشها فتوح
آآآه . . . لنا الله
مع المقالة بلا تعديل أو إضافة بعنوان

ليلة بلا ملامح
العيش في الخيال , متعة لا توصف , لا يمكن لأي كان لم يجربها ان يشعر بها , حاجة جامدة جدا , تحس معاها إن كل حاجة انت عاوزها موجودة معاك , على كيف كيفك وزي ما تريد و زي ما تطلب
في يوم كنت عاوز انبسط و افرح , تخيلت حاجات حلوة و استرسلت و شغلت اغنية الفستان الأبيض و قعدت اغني و ألف حوالين نفسي وأدور بسرعة و اتنطط لحد ما جبت جاااز ولمست السقف
بقيت عمال اغني "ولمست السقف – ولمست السقف" كل اللي فات ده حصل من لا شئ من الفراااغ مجرد خيااال
مفيش أي حاجة واقعية , مجرد إني عشت في الخيال , تصورت حلم جميل جدا و عشته
كنت نزلت مقالة بعنوان (احبك زوجتى) في الكلية (منزلتش على المدونة) بس هي كانت بتحكي عن تجربة شخص في فترة الخطوبة أو تصرفاته , المفترض فيا إني لسه مش خطبت ولكن لأنه أنا نفسي أخطب , فتخيلت الموقف و قعدت أحلم و أحلم و أحلم و طلعت فوق , و نزلت تحت وكسرت يمين و مشيت طوالي
كانت سكة طويييلة , بس حصل خير في آخر الحلم كنت خلاص خطبت و بقى يتقال عليا اللقب المحبب "يا جوز أختي" حاجة حلوة صح
وهلم جرا على هذا , حاجات كتير وكلام كتير بكتبه من حالات عايشها في الخيال
يحضرني في راسي البطيخية أغنية (واحد من الناااس زي كل الناااس) , على فكرة يا جماعة أنا بعشق الإغنية دي , المهم جاي على بالي أغنيها بكلمات تانية "أحلام الناس زي كل الناس حلم مالوش لااازمة و اهو شغال وخلاااص" و على رأي المثل الآخر (كتها نيلة اللي عاوزة دماغ زي دماغك) يعني أهو حاجة تسند الزير بدل ماهو نايم على جنبه متل عم الحاج جلمبو
المهم في الموضوع إني لست بحانق على الموضوع و إن كنت مشرنقب منه (محدش يسأل يعني ايه مشرنقب لأني مش عارف) هيييه . . . دنيااا
وكما أؤمن بشدة بالحكمة القائلة و القاعدة الراسخة القائلة بأن (الكدب مالوش رجلين) , يبقا مفيش احلى و لا أحسن من الصراحة معاكم جمهوري العزيز (كأن فيه حد اساساً هيقرأ التدوينة دي) بس أعمل ايه
داء اللف والدوران في دمي , كما اني اعشق التورية و الكلام اللي بين السطور , اللي بجد المرادي بجد بجد بجد مش عارف ايه هي التورية ولا أعرف هو رايح لمين ولا أنا قصدي بيه ايه
كما أقول دوما "ما هي إلا خطرفة عقل اثقلته الهموم" وزي ما احنا عارفين إن دماغي دماغ بطيخة وعشان الدنيا دلوقت شتا و مفيش بطيخ فإن دماغي البطيخة سعرها بيزيد , دا غير كمان إن دماغي بطيخية و بتخطرف دي لوحدها مصيبة تانية لوحدها
خير خير خير
بجد المرادي محدش عارف الخير فين
انتم عارفين
أنا والله العظيم ما عارف الخير فين
اللهم ارزقنا الهدى
في دعوة كنت قلتها مرة واحدة في سنة تانية كلية
اللهم ارزقنا التفكير قبل العمل
خييير أوي
وكتير و مرطرط
ويعم علينا كلنا و يغرقنا , لحد ما هدومنا تتبل
والناس تقول علينا "المبلولين اهما" ويمشوا ورانا في الشوارع
و نفتح حزب جديد او نعمل حركة جديدة و نسميها (مبلولون من اجل السمكون) اصل انا بحب السمك المشوي مع العيش و سلطة الطحينة
بيبقا حاجة رائيعة جيدا
ايه بقا اللي حصل بعد ما فتحية قابلت فتحي عشان تديه صينية البطاطس و تقوله "في بيتنا رجل" قام عماد حمدي خد نفسه وراح لإحسان عبد القدوس و قاله "هو بجد في بيتنا رجل" إحسان قاله ايون طبعا , قام سي عماد رايح للبوليس السياسي و قاله دا في بيتهم رجل , البوليس السياسي مكدبش خبر و اخد ديله في سنانه و طلع على السعودية , اصله جاله عقد عمل في ليبيا , وانتم عارفين إن الشغل برا احسن من الشغل في مصر , و بعد دا كله فضل في بيتهم رجل
حد يقدر يخمن من هو هذا الرجل
طرد الناس كلها براه وفضل قاعد
ويتصل على زيرو هبلومية و هبلومين
يكسب مشرنقب جنيه بحااله وطبعا خالصة من الضرائب
بدأت أنام على نفسي و الدنيا غيمت و شايف الكيبورد اتنين و الشاشة اتنين و الدنيا بتضلللم والإفكار اللي متتسماش مش عارف اوقفها
خير جدا
محدش عارف الخير فين
صح ولا ايه
كان معكم مشغلا خياله
فتوح أبو المفاتيح – في سااابع نومة

كانت هذا نص المقالة التي و جدتها في أوراق فتوح
نقلها لكم من أوراق فتوح
مستر سيجا

مع ضحى

صورتي مع ضحى - من أروع أطفالي

بالأمس 11 محرم

ادعوا لتوتة عرفت اخيرا تسيطر على فتفوتة وتخليها تحلق دقنها

ليلة بدون قمر

ليلة بدون قمر

هل جرب أحدكم من قبل

- البكاء حتى تنفذ دموعه ؟

- البكاء حتى تبتل ملابسه ؟

- السير في الشوارع بعد منتصف الليل على غير هدى تبكي ؟

- الحديث مع نفسك و البكاء عليها في نفس الوقت ؟

- السقوط متهالكا ليس من الإعياء ولكن لأنك لا تستطيع السير من البكاء ؟

- منع نفسك من البكاء حتى تستطيع الكتابة ؟

كانت هذه هي الليلة التي انتحروا فيها فتوح .

ليلة بلا قمر , ليلة 7 محرم .

لا أدري ما الذي دفع فتوح لإعلان نحره .

الله اعلم . . . اربما كان نداء استغاثة .

لا اعلم

كل ما أعلمه انه الآن في ابعد مكان يحتاج فيه إلى عطف أو شفقة . . . لا أدري ماذا ألم به .

حاله غريبة . . . مسكينُ فتوح .يلفظ الآن انفاسه الأخيرة . . . لا يستطيع الكتابة .

لا يستطيع شيئاً .

لنا الله

إلى اللقاء فتوح .

عن فتوح

مستر سيجا

فتووح

سأنتحر فتووح

Dear Friends Fatooh has been terminated

ما قتلوه ولكنهم انتحروه


إنا لله و إنا إليه راجعون

لا إله إلا الله وحده لا شريك له
و أن محمد عبده و رسوله

لا إله إلا أنت سبحانك إني كنت من الظالمين

يوم مسحت السُلَمَ

على فكرة دي مش مقالة , دا تقرير حالة و تهنئة بالعيد فقط

النهاردة الوقفة وكل عام وانتم بخير وبصحة وسعادة و ربنا يعود علينا بكل خير كل سنة , وبكره (غداً) أول أيام عيد الأضحى (هو المفروض دلوقت بقينا بكره , بس عشان انا لسه صاحي ومش نمت بفترض إن إحنا لسه النهاردة) .
و بمناسبة هذه المناسبة السعيدة , قمت بعمل بطولي و هو (مَسحُ السُلَمَ) بتاع البيت اللي انا قاعد فيه (البيت الجديد) , هو عبارة عن دور اول وأرضي ,لأحسن تفتكروا اني قمت بعمل خارق للعادة (دي رابع مرة امسح فيها هذا السلم) بس دي اول مرة امسحه فيها منذ جاء جيراني اللي فوق .
المهم . . . بدأت هذه العملية الخطيرة شديدة السرية (محدش فيكم يخبص عليا) باني حطيت ستاتيو ماسج في الياهو "ادعولي يا جماعة عما امسح السلم دلوقت انا مش على الجهاااز" .
طلعت برا وشمرت رجلي اليمين و دراعي اليمين وبس , بدات بالكنس طبعاً , بعد كده مسحت السلم كله كله بـ 8 أسطال من المااء (سطل=دلو=جردل) يعني بالضبط 80 لتر مااء من ماء النيل الحكومي (إحنا في المنطقة بنسحب من بير جوفي- مش بير ارتوازي) .
دي أول مرة أعرف إن مسح السلم بيعور , أنا ايدي من ناحية صباعي الكبير (الإبهام) اتعورت من اثر مسكة المساحة (الممسحة) وتحريكها لفترة طويلة (ايه ده , دا انا طلعت فافي) . . . دي كمان ورمت , ربنا يستر .
المهم . . . أنا مسحت السلم بطريقتين , الطريقة الأولانية خصصتها للسلالم نفسها (النوايم بتوع السلم) , ووصفي لهذه الطريقة (يجري الماء ويجري ويأخذذ ما امامه ويجري) .
طلعت ومسحت من الدور الأول لحد تحت خالص بالمساحة لحد ما وصلت للمدخل .


المدخل بتاعنا حاجة كبيرة (3.5متر في 10متر) , دا بقى مسحته بالطريقة المعتادة , تدلق المياه مرة اولانية وتمسح , ثم تدلق الميه مرة تانية وتمسح , وهكذا تحصلون سيداتي آنساتي على أرضية أكثر نظافة و أكثر بريقاً (تصفيق حاد) , وصلنا بقى لقدام العمارة , استخدمت معاه نفس النظام الأولاني بتاع (و هو يجري وأنا اجري) مسحته بـ 3 أسطال من الماء الصافي .
بعدما خلصت المدخل , أبص على السلالم ألاقي عليها مية متجمعة و مش نضيفة .


هنا فهمت نقطة مهمة جداً لطالما حيرتني و أثارت فضولي , ليه أم كلبظ (عشان انا بس مش عارف اسمها) لما تيجي تمسح السلم عندنا في البيت القديم (عمارة 6 ادوار) بتمسح عادي الأول وبعد كده تمسح بخرقة (خرقة=حتة قماشة) ؟؟
الله يرحمك يا ام كلبظ , روحت دخلت الشقة , جبت خرقة ومسحت بيها السلم , من فوووق لحد تحت تاني , وانا عمال اقول "آآآآه يا ضهري" .
آآآه نسيت أقولكم إني زعفت سقف وحيطان المدخل عن طريق النط . . . كانت لعبة حلوة أوي أوي , لازم تجربوها .
الحمد لله انتهيت من مهمتي الجبارة بنجاح , ودخلت الشقة وقلت لازم اكنس وامسح الصالة , روحت طلعت فوق عند الجيران واستلفت منهم مقشتهم (لا تعتقدوا إني رنيت عليهم الجرس الساعة 2 الفجر عشان مقشة) هي كانت قدام باب الشقة , أصلي حرقت المقشة بتاعتي على البوتجاز (ومحدش يسألني ليه) , إن شاء المولى اشتري مقشة جديدة .
الحمد لله انتهت الجولة الأولى , وقلت آخد رست حتى غد وابدأ الجولة التانية .


على فكرة أنا عمال اعطس و شكلي خدت برد ودور انفولنزا وحش اوي , آآآه دماغي مصدعة وبتلق , انا ادوار البرد بتاعتي وحشة خالص , استر يا رب , انا ورايا مذاكرة ومش ناقص نوم في السرير .
بس الحمد لله السلم انتهى على خير و بأمان و بدون خسائر في الأرواح , ووصل لبر الأمان بقيادة الربان كابتن طيار عقيد مجاهد فاتح غازي فتوح بن أبي المفاتيح المان ابن الجان .
على فكرة المهمة اللي فاتت من كنس وتزعيف (من فعل زعف) ومسح السلم و المدخل خد مني بالضبط 58 دقيقة و 38 ثانية فقط , عشان تعرفوا مقدار العمل البطولي الذي بذلت . . . أنا دلوقت اروح بقا البيت القديم , عشان افطر , أصلي فطرت النهاردة على طنجرة (حلة) استلفتها من جيراني , وعملت فيها مكرونة (اندوغي) و أكلت 3 تمرات لقيتهم برضه عندي (انا مش عارف ايه حكاية التمر اللي بلاقيه كل شوية دا) و 2 كوباية شاي و 450 مللي لتر مياه , اعتقد كفاية كدا عليا .


سلاااااااام
كان معكم مبتلةً رجله اليسرى
فتوح أبو المفاتيح – هيذبح العجل بكرا

مجلة حلوة . . . مجلتي

مجلة حلوة । . . مجلتي (بسكوتة) .

المجلة كان اسمها :

افعل ما تشعر في أعماق قلبك انه صحيح

لأنك لن تسلم من الانتقاد بأي حال

النهاردة أخيراً و بعد شهر من اللف و الدورانو إمضاءات و اعتراضات , علقت مجلتي وعليها 54 إمضاء و توقيع . . . يعني بقت مشوهة من الآخر .

المهم أنا كنت مبسوط جداً .

علقت المجلة (لونها بمبة 200 * 70 سم) .

وفضلت واقف جنبها عامل زي أبو العروسة اتلقى التهاني و التعليقات .

كان موقف رائع , الناس اتلمت و عمالة تقرأ و ناس كتيرة عجبها حاجات , و ناس تسلم عليا , و ناس تناقشني . . . كانت لمة جامدة جدا .

احلى حاجة في الموضوع إني كما اعتدت دوماً بتتفهم مقالاتي غلط (هههه) إلا من رحم ربي و هم قلة , هي مش بتتفهم غلط , هو الي بيقراها بيفهمها زي ما هو عاوز , يعني بيتجاهل حاجة هوا عارفها عشان يصدق حاجة تانية, حابب يوهم نفسه بيها , خير محدش عارف الخير فين .

مفاجأة الموسم , على الساعة اربعة 4 كان فيه واحد واقف يقرأ المجلة , صحابه عمالين يشدوا فيه عشان يروحوا , اصلهم اتأخروا و عاوزين يروحوا و هو مش عاوز يتحرك من قدام المجلة قبل ما يخلص المقالة , يشدوا فيه و هوا يقولهم "ثواني قربت أخلص" , لطعهم جنبه لحد ما خلص المقالة .

بجد دي احلى حاجة حصلت النهاردة .

من امام المجلة – أبو العروسة

فتوح أبو المفاتيح – منتظراً

Brain Shooting

أفكار في بالي و آآآه من بالي ده


الانترنت . . . أصبحت اعشقك .

استنتاج طلعت بيه قريب جداً جداً . . . خلى اتصالك الفعال عبر النت . . . تواصل عبر النت لأن رسائلك تصل عن طريقه بأسلوب أسرع و أحسن , و بدون حتى أن تعلن عنها فإنها تصل . . . خير خير . . . الله أعلم . . . تعتقدوا . . . ؟ ولا ايه ؟
خير . . . محدش عارف الخير فين .

=========================

ماما . . كم أحبك .

النهاردة في الميكروباص (الاستاد - المحطة) اكتشفت شئ من أروع و أجمل حاجة خلقها ربنا .
احكيلكم الموقف من الأول . . .
أبطال الحكاية : طفلة صغيرة (5 شهور) - خالتها - أمها .
الطفلة وخالتها ركبم من الجامعة , و النونو كانت بتزمزء دا غير إنها اتخبطت في راسها و هما بيركبوا الميكروباص فراحت معيطة ,فقعدت اشاغلها لحد ما هديت شوية .
عند أول النحاس أمها ركبت (كانت منتقبة) دخلت و قعدت جنب خالتها , و أول ما اتكلمت لاقيت البت بتتنطط في إيد خالتها و انشكحت , و اديرت لمامتها و مدت ايديها ليها .
كانت عاملة زي عصفورة صغيرة بتصوصو كانت "بسم الله ما شاء الله" رائعة , كل اللي كانت عاوزاه دلوقت انها تاخد مامتها بالحضن , و لما راحت في حضنها كانت طايرة من الفرح . . . مبسوطة جداً عارفين لما عيل صغير يتنطط من الفرح , دي كانت كده
كل ده حصل بس لما سمعت صوت مامتها , من صوتها بس عرفتها قبل حتى ما تشوفها (سبحان الله) شئ رائع و جميل - آآه - على فكرة يا جماعة حبيبة وحشتني جدا . . .
يارب "اللهم ارزقني الهدى و التقى و العفاف و الغنى"
و حبيبة و أمها ياااارب
يااااارب

=========================

بتاع النت .

أنا واقع يا جماعة في حيرة . . .
حد يقدر ينقذني منها ؟
عمال أدور في كتب القانون على نص مش لاقيه . . . شكله مش موجود .
أنا بقترح نضيفه للدستور .
من رأيي هيكون ليه فايدة كبيرة للشعب .
القانون اللي بقترحه انه يسمح بإعدام بتاع النت شنقاً في ميدان عام . . . عشان أنا خلاص اتخنقت منه .
مش عارف أنزل ولا تدوينة ولا مقالة .
انا خلاص بقيت عامل زي اللي بيدون على نفسه .
عمال اكتب في قصاقيص ورق .
و عايز ابعت رسالة لسين من الناس و مش عارف .
و سين هيفهمني غلط عشان اتأخرت في بعث الرسالة .
أنا خلاص جبت آخري منه .
هااه يا جماعة , مين معايا في الحوار ده ؟؟
نعمل مظاهرة و يكون شعارها (اعدموا كل بتوع النت) .
أنا عمال اتصل عليه دلوقت , و لا راضي يرد عليا و لا يعبرني .
خير . . . خير .

=========================

اسبرين أطفال .

مزيل الصداع الفعال و الأكيد . . . جبت النهاردة شريط اسبرين أطفال , أصلي كنت بأشعر بالصداع الشديد و حل المشكلة دي إنك تاخد حباية اسبرين أطفال . . رائعة . . خرافية . . طعمها جبااار
لازم تجربوها و عليها ضمان شخصي مني . . .
كوباية نسكافيه لكل حباية اسبرين متعجبكمش . . . أوكشن .
بس ده بس لأول واحد يجرب أو لـ . . .
لأ لأ بلاش أو دي خليها سر .
خييير خييير . . . محدش عارف الخير فين .

=========================

من أنا (1) ؟؟؟

ممكن سعات أعرف نفسي بإني خبيث و لئيم , خصوصاً إن دي طريقة اساسية في التعامل مع الأطفال .
يعني تعمل عملاية باين عليها البراءة و الناس كلها فاهمة غرض معين من وراها . بينما انت ليك غرض تاني بعييد خااالص .
بس بعد اذنكم طبعاً . . . ممكن أعمل عملاية صغنونة خالص مالص .
ممكن أصف نفسي فيها بإني شخص خبيث مكسوف جداً .
يعني إذا سمحتم ليا ممكن أعمل الحركة دي ولا انتم ليكم رأي تاني ؟؟

=========================

بخيل ؟ أم مسرف ؟

انا اساسا ً لا أحب السعة في الصرف , ولكن في لحظات عدم التوازن وفقدان الهدف ببقى متخلف في المصاريف .
بصرف 3 أضعاف المصروف بتاعي .
المفروض . . . المفروض ميكانيزم مصروفي = المواصلات اليومية + 2.0 جنيه زيادة بشرقة .
زمان (يعني من كام شهر) كنت بحوش 80 % من المصروف - كل مواصلاتي و انتقالاتي إما مشياًَ أو ميكروباصاً - عشان كان عندي هدف و كنت بتعب نفسي عشان اوصل ليه .
- تتخيلوا - بقيت بركب تاكسيات أكتر ما بركب ميكروباصات .
- تتخيلوا - ركبت النهاردة تاكسي عشان مشوار يدوب ياخد من دقيقة إلى دقيقة و نصف مشي خستعة , و على فكرة دا كان آخر جنيه في جيبي .
بس خير . . . محدش عارف الخير فين .

=========================

محدش عارف الخير فين .

أنا حبيت الكلمة دي جداً جداً جداً . . .
أصل فيه سين من الناس , كتبها لي في موقف صعب جداً , فجلبت لي الابتسامة الواسعة , ومازلت محتفظاً بالابتسامة كلما تذكرت الموقف , وما زلت أيضا حافظاً للورقة التي كتب لي عليها هذه العبارة :

"محدش عارف الخير فين"

فيارب لك الحمد ولك الشكر انك الهمته كتابة هذه العبارة .

=========================

بتاع الشاورما .

النهاردة الأربع ليلاً , طلعنا من لقاء ما مهم , وكنا جروب (مجموعة يعني) .
قولنا لازم نحتفل , طلع اقتراح إننا نروح مؤمن و انا كنت مؤيد بس باقي البني آدمين رفضوا و قالوا ناكل عند العمدة . . . شكلهم كانوا مفلسين , بأمارة إن كتير منهم طلب حواوشي . . . خير . . . خير أوي , ما أنا أول مرة كنت مفلس و طلبت كشري مش حواوشي , بس أنا المرادي طلبت ساندوتش كلب سخن مصري و ساندوتش كلب سخن مكسيكي .
آآآه افتكرت حاجة .
كنت وعدت شخص من الجروب إني أوصفله ساندوتشه كان بيتعمل إزاي . . . أقولك يا سيدي (هو كان ساندوتش فراخ شبه الشاورما - دا وصف الشخص اللي أكله) .
وهو بيستوي كان شبه مجموعة خنافس طخينة و مكلبظة أوي , بس متقشرة و عليها مايونيز مختلط بسلطة طحينة فيها بقدونس . . . تمام كده , أنا وفيت بوعدي .
نرجع بقا للحدوتة , كان فيه راجل بتاع الشاورما , كان راجل سكرة عسل اتصاحبت عليه - المهم - كنت واقف على بعد 2 متر منه , فجأة راح بصلي و قام مركز اوي و قال "استنى . . . ايوه . . . خليك باصص لفوق" و قعد يتفرس في ملامح وجهي و يبص يمين و يبص شمال و فجأة قال "أممم انت شغال في مشروع كبير . . . أممم انت في آخر سنة في الكلية و نفسك تنجح السنادي"
المهم في الآخر الراجل طلع بيزاولني و بيمثل عليا انه بيقرالي الوش , و هو مستنتج دا كله من :
إننا كنا جروب واقف قدام المطعم - كان كلنا لابس بدل - أنا و أنا بكلم الكاشير قلت إني في كلية هندسة .
خير . . . بعد كده اتصورت معاه و زمايلي اتصوروا معاه , و خلى واحد فيهم يقف مكانه و يمسك السكينة كأنه بيقطع شاورما و أنا عملتله قرنين .
خير . . . راجل زي العسل . . . أنا ناوي أطبع الصور اللي اتصورناها معاه و لما أروح ناحيته اديهاله ذكرى لليوم الرائع جدا ده (على فكرة روعة اليوم مش بس في اللقاء و الراجل بتاع الشاورما ) و اسأله عن اسمه لأني نسيت اسأله .
خير خير . . . محدش عارف الخير فين برضه .

=========================

زغروتة للعروسة .

النهاردة الخميس .
ودي أول مرة في حياتي أحضر كتب كتاب .
ألف ألف مبروك يا أبو العروسة .
ألف ألف مبروك يا أبو العريس .
النهاردة كتب كتاب بنت عمي .
ألف ألف ألف مبروك يا بنت عمي .
إن النهاردة ليوم سعيد .
لاحظت حاجة جديدة عليا . . . إني غيرت ردي على اللي بيقولي "عقبالك" (معناها العقبى لك) .
كنت بقوله "قول يا رب . . كلها سنتين . . هااانت" (أصلي عاوز أتجوز في الشتا , و لا رأيكم ايه ؟)
زمان أوي أوي كنت بقول : الله أعلم .
من زمان مش أوي كنت بقول : بعد الشر .
دلوقت بقول : يااارب . . . ادعولي انتم كمان .
كله خير صح ولا ايه ؟ . . . محدش عارف الخير فين .

=========================

بابا عمل حادثة .

النهاردة الخميس (برضه) .
وهو مروح بليل من البلد (أصله كان بيروح بنات عمي - على فكرة أنا ليا 3 أعمام على ما أتذكر) .
داد اساساً مش بيعرف يسوق في الضلمة - اللي حصل إن عربية في المقابل بتاعه اديته النور العالي , فهو حود لجنب عشان يوسعلها , لجنب دي كان فيها كوم تراب (سن - دولوميت) العجلة الشمال طلعت عليه , فالدركسيون لعب في ايد بابا , قام داخل في شجرة . . . بس خير , ربنا ستر و طلعت سليمة .
بابا طاع سليم بحمد الله وفضله , بس لعربية بوزها تدشدش و الشاسيه بتاعها اتشرخ و محور العجل اتعوج . . . بس و خلاص .
المهم إن بابا رجع سليم و زي الفل , بس فيه شوية رضوض و كدمات و خدوش . . . غير كده هو سليم وزي الفل , بس هوا نايم في السرير .
خير خير . . . محدش عارف الخير فين .

=========================

أشعة .

النهاردة الخميس (برضه) .
مسكت في ايدي أشعة بتاعة بابا اللي عملها النهادرة بليل (لونها اسمر و فيها عضم) و قعدت أبص عليها كأني دكتور , و ألفها يمين شمال و من فوق ومن تحت , ساعتها افتكرت موقف صعب جداً .
في مرة كنا واقفين عند مستشفى الجامعة , فحت واحدة ست , اعتبر نفسي بأمدحها و اسبغ عليها من الصفات الكثير و بأنافقها لما أقول عليها غلبانة . . . كانت مسكينة جداً .
الست كانت ماسكة أشعة في ايديها و عمالة تدور على حد يفهم فيها يقولها أي كلمة يطمنها . . . أصل بتوع المشفى رمولها الأشعة و مشيوا . . . الست جت تسألنها بإستجداء وتعطف "و النبي يا داكتور تشوفلي الأشعة دي و تقولي الواد عنده ايه ؟" زميلي قالها "معلهش يا حاجة إحنا مش دكاترة" فسابتنا و مشيت تشوف حد غيرنا تسأله , وكان شكلها بيقول (طب مادام انتم مش دكاترة ايه اللي وقفكم هنا) .
بصراحة كنت هعيط من الملامح المرسومة على وشها متشحتفة و تحس انها ماسكة نفسها بالعافية .
كنت هجري وراها آخدها لأي حد من الدكاترة أصحابي النواب بس افتكرت إن مفيش حد منهم مناوبة النهادرة .
الست فضلت ماشية تسأل الناس اللي في الشارع لحد ما اختفت . . . ربنا يكون في عونها .

=========================

دمنهور - طنطا .

النهادرة قررت إني أعرف مكان كفر الزيات .
أنا أساساً مش رايح دمنهور عشان أعرف مكان كفر الزيات .
أنا رايح أدي دورةتبع اليونيسيف .
المهم . . . أنا كنت معتقد إن كفر الزيات ما بين طنطا - القاهرة , الرائع إنها طلعت بين طنطا - اسكندرية , و بما إني مسافر على السكة دي , فا بالمرة أعرف مكان كفر الزيات .
المهم . . . و إحنا راكبين الميكروباص عدينا على حتة كده إتهيألي إنها كفر الزيات - فسألت الي جنبي فقال "لأ دي الدلجمون" فقلتله ماشي , سرحت شوية و بعد كده سألته دي كفر الزيات؟ فقال "ياااه دي عدت خلاص" .
قلت خير , و أنا راجع ابقا ابص عليها .
و أنا راجع قلت بقة افنجل عيني و أركز عشان اشوفها .
كان فيه واحد قاعد في الكرسي اللي قدامي مش عارف شغال ايه , بس كان عمال يحكي حكاية حلوة للاتنين اللي قاعدين جنبه , ملخص الحدوتة انه في نا س بتضحك عليه في بيع وشرا الحمير (وأنا أول مرة أشوف بياع حمير فركزت معاه أوي) و على ما خلص الحدوتة سألت اللي جنبي باقي قد ايه على كفر الزيات فقال "ياااه دي عدت خلاص" .
شكل كفرالزيات دي هيبقا ليها حدوتة معايا .
خير . . . محدش عارف الخير فين .
شكلي لازم انزلها مخصوص من طنطا عشان اشوفها , يا إما حد يبعت ليا كام صورة ليها . . . أصلهم بيقولوا عليها حلوة .
خير .

=========================

من أنا (2) ؟؟؟

تكملة لمين أنا ؟؟ اعتقد إني ممكن أصف نفسي اثناء الكتابة بالخبث المغلف بالفلسفة , يعني ممكن أكتب مقالة الناس تحبها و كل حاجة , بس اللي يفهمها شخص واحد بس وهو اللي أنا باعتله الرسالة المدمجة داخل المقالة , هوا مش حوار كلام ما بين السطور , هوا كلام بتجمعة من السطور نفسه .
بجد . . . محدش عارف الخير فين .

=========================

حلم

النهاردة حلمت حلم غريب جداً . . .

معذرة إني مسحت الحلم
بس سمعت حديث عن سيدنا النبي (عليه الصلاة والسلام)

(الرؤيا الصالحة من الله والحلم من الشيطان ، فمن رأى رؤيا يكره منها شيئا ، فلينفث عن يساره ثلاثا ، وليتعوذ بالله من الشيطان فإنها لا تضره ولا يخبر بها أحدا . وإن رأى رؤيا حسنة فليستبشر ولا يخبر بها إلا من يحب)

فكان المفروض إني مش كنت أقول عليها لأي حد أو حتى اكتبها على المدونة , بس حصل خير واهي اتكتبت و شافها يجي رقم كدا .
استغفر الله العظيم , مش عارف , ربنا يسامحني بقا .

خييير . . . محدش عارف الخير فين .

=========================

فلوس .

بابا إداني فلوس عشان اجيب لبس شتوي ليا , بس المشكلة غن مش بفهم في موضوع اللبس كويس , يعني موش بعرف انقي لبس بس ليا رأي حواليه , وهو بالمناسبة صعب إرضاؤه , ماما و اخواتي البنات بيحاولوا ينقوا ليا لبس , فأنا بقولهم "لأ مراتي بس هي اللي تنقيلي لبس" , عشان دي تكون واحدة من مميزاتها أو بمعنى أخر فوايدها .
المهم دلوقت إني حيران اعمل ايه ولا اشتري ايه .
أنا جت في دماغي فكرة .
أنا معايا 600 جنيه و و أعمل جمعية ب 1000 جنيه على فلوس اللبس وابيع الكمبيوتر بتاعي و اشتري لاب توب .
هااااه ايه رايكم يا جماعة , اعتقد انه حل حلو , صح ولا ايه ؟؟؟

=========================

مقالات .

سعات الواحد بيبقا في دماغه حاجات يتكلم عليها و عاوز يكتبها في مقالة بشكل معين بعد كده مش يكتبها وبرضه سعات فيه ناس بتستنى منك مقالات تقراها و انت مش كتبتها , المهم دلوقت إن فيه عليا رصيد 3 مقالات , اتنين منهم كتبتهم بس مش بالصورة اللي متوقع انها تكون مكتوبة بيه , بصراحة بصراحة , أنا خايف اطلعهم اساساً , أو أفكر إني اطلعهم , المقالة التالتة شبه مكتوبة في دماغي بس خايف منها برضه لأنها ممكن تتفهم على انها إمعان في الذاتية , و دي حاجة أنا بتخنق منها , بس خير .
أنا بقترح حل إني ممكن اعيد كتابة المقالتين الأولانيين , و دا أمر صعب لأني في الحالة دي هتصنع مقالة , في المعتاد بتتطلع ماسخة (هههه) بس اليومين دول بقيت محترف و بتطلع امسخ (ههههه) .
خييييييييييييير محدش عارف الخير فين . .