الجمعة، نوفمبر 16، 2007

عظيمة يا مصر


عظيمة يا مصر

يا أرض المحن

يا مهد القذارة

يا أرض الفتن

نيلك ملوث

قمحك مسرطن

فظيعة يا مصر

مقدمة مناسبة جداً للي حصل و اللي هنعرفوه مع بعض حالاً . . .

أولا : نقر مجموعة من الأسس اللي لازم نعترف بيها ونتفق عليها قبل ما نخش جوا المقالة .

- إحنا شعب جباان (وأنا من الشعب ده) بيخاف من ضله , واللي راكبينا عارفين ده .

- إحنا شعب جاهل و الجهل زي ما انتم عارفين مسألة نسبية (راجعوا مقالتي يا جاهل) بس نوع الجهل اللي انا هنا بتكلم عليه , هوا الجهل المسموح به و الطبيعي في أي مكان سواء في مصر أو في أروبا و الدول المتكدمة , و الجهل ده مش غلطة الشعب دي غلطة اللي راكبينا برضه .

أصلكم مش فاهمين الفولة , أصل طول ما هما راكبين شعب جبان و جاهل يبقا هيعرفوا يعملوا فيه اللي هما عاوزينه (اغسله – أكويه – أتف عليه . . ) مش فارقة , أصلهم في كل مرة هيطلعوا ليك بحجة ومعاها عينهم الحمرا , وهنخاف ونجري و محدش يقدر يتكلم , هوا فيه حد يقدر يقول للغولة "عينك حمرا يا غولة !" .

وادفع يا مركوب و خد في جيبك يا راكب – أصل إحنا شعب مراكيب .

المهم . . . هنحط فرضية ظريفة أو لنقل حدوتة .

انت مش لابس جزمة (شوز) – روحت لمحل جزم و اشتريت جزمة لونها اسمر , وانت بتشتري محدش قالك حاجة خااالص . . . تمام .

مش لقيت غير جزمة واحدة في المحل كله - لبست الجزمة و جربتها فلقيتها مش مريحة فقلت "مش فارقة أحسن من مفيش" يعني انت مجبر عليها عشان انت حافي ومفيش غيرها .

نزلت في شارع عمومي و مشيت بيها ساعة . . . ساعتين , بعد كده قام عسكري المرور مسكك من قفاك وقالك "هاااع . . . انت مخالف . . . ادفع غرامة 10 جنيه" – "انت خالفت قانون المرافق العامة فقرة 10 مادة ج" وقبل ما تفتح بقك أو تتكلم , قال "يا تدفع الغرامة يا هنعملك محضر وتلبس قضية و وكيل نيابة و محكمة ولفة و هجص ومجص" وقلب ليك معدتك و خلا ركبك تسيب و تخبطت في بعض و حاجت من دي .

تقوم انت تعمل ايه يا باشا , تخاف وتترعب و تدفع الغرامة (هوا أنا حمل بهدلة) ما هو أنت بتثبت إن الانسان أصله فرخة .

فرضا طلعت شجاع شوية وحبيت تسأله ايه اللي انت خالفته .

عسكري المرور "يمنع طبقاً لقانون المرافق العامة فقرة 10 مادة ج السير بحذاء جديد لونه اسمر في الشارع حيث انه مقلق لراحة المواطنين , كما انه تنبعث منه روائح وسوائل خطرة مما يؤثر على راحة وأمن وسلامة ومتانة المواطنين" .

تقوله "طب انا مش كنت اعرف" . . . يقولك "مش مشكلتي"

تقوله "طب ليه خلتوني اشتريها من الاول" . . . يقولك "أنا اشوفك بتشتري دا عادي انت تعمل اللي انت عاوزه دي مش مشكلتي . . . إنما لما تلبسها وتطلع بيها من المحل وتمشي في الشارع يبقا انت بقيت مخالف و أطبق عليك نص القانون و آخد منك الغرامة" .

و النتيجة غباااء مطبق مطلق , و تمسك بالركوب حتى آخر لحظة , وذل ليك و مهانة لأنك جاااهل , و اللي راكبينك هما المسئولين عن الموضوع ده , المفروض يحطوا تنبيه في محلات الجزم (ممنوع الأحذية السوداء الجديدة) .

بس ايه . . . دا احنا هنا في مصر – أرض الفراعنة . . . هوا الفرعون يعمل حاجة و يتقاله انها غلط . . . أبداً . . . هوا يعمل اللي في بداله . . . برضه لازم يصعب علينا , دا بيتعامل مع شعب مراكيب , ربنا يكون في عونه .

ايه بقا اللي حصل ؟؟؟

العبد لله كا ن في القاهرة , وهناك لابد وأن يركب وسيلة المواصلات الأكثر شعبية وشهرة , و التي وفرتها لنا حكومتنا المجيدة حتى تسهل للشعب (دافع الضرائب وطافح الكوتة) (على فكرة أنا مش أعرف يعني ايه كوتة) انتقالاته و ترحاله و توفر له أمواله الثمينة (وسيلة المواصلات هي المترو) .

ركبت المترو و أنا شايل شاشة "17 بوصة (فلاترون) وكان معايا ابن خالي , عديت من بوابة المترو اللي عليها كاشف المعادن البايظ و زمر وانا شايل – روحت قطعت تذكرة من شباك التذاكر وانا برضه شايل – عديت من مكنة التذاكر بس كان ابن خالي هوا اللي شايل لحد ما عديت وقام . . هوب . . مناولني الشاشة من فوق المكنة – نزلت على السلم الكهربي وفضلت واقف على رصيف المحطة حتى جاء المترو – ركبته , وفي محطة الوصول طلعت السلالم و عديت من مكنة التذاكر , و واحد شال ليا الشاشة لحد ما عديت , و أنا طالع من بوابة المترو جالي عسكري وقال "يا استاذ تعالى في واحد عاوزك" المهم قعدت اجادل فيه لحد ما طلع عسكري تاني بنجوم على كتفه من نقطة الشرطة وقالى تعالى و هنا دار الحوار التالي :

العسكري ابو نجوم : انت مخالف طلع 10 جنيه – (وراح مكلم العسكري التاني) – خده معاك للخزنة عشان يدفع .

فتوح : استنى يا عسكري . . . هوا أنا خالفت ايه ؟

العسكري ابو نجوم : اصلك خالفت القانون لما أخذت الشاشة معاك في المترو ودي حاجة خطر على الركاب .

فتوح : خطر !!! إزاي خطر يعني ؟

العسكري ابو نجوم : مش دي حاجة مقفولة . . . وانت نازل تحت الأرض . . . الضغط في المترو عالي 4000 فولت يعني ممكن الشاشة تنفجر منك و تعور حد من الركاب .

(هنا انا مسكت نفسي من الضحك بالعافية – المفروض انه قصده بدلا من فولت كلمة بار و هي وحدة الضغط الجوي و كمان الشخص دا لو فاهم , المترو فيه نظام ضبط ضغط الهوا على (واحد بار) عشان الناس تعرف تمشي و تشتغل فيه طبيعي و إلا الناس هتصدع وتخر دم من فتحات جسمها – بس خير – أصل هما دول اللي راكبينا .)

فتوح : طب مادام هي مخالفة ليه محدش منعني من الدخول بيها في المحطة اللي انا جيت منها , و ليه العسكري اللي على رصيف المحطة مكلمنيش ؟

العسكري ابو نجوم : مسئوليتي إني لما اشوفك مخالف امسكك , يعني انت واقف برا في صالة محطة المترو مش هقولك حاجة , تعدي مكنة المترو يبقا انت كده بقيت مخالف , امسكك أنا بقا و ادفعك الغرامة .

فتوح : طب أنا المفروض اعرف منين إن الحاجة اللي معايا دي مخالفة , مش لازم يبقا فيه لافتة تحذيرية أو حاجة متعلقة زي بتاعة (ممنوع التدخين) عشان أعرف منها .

العسكري ابو نجوم : (وبقلاطة) أنا مش هيئة إعلام انا هيئة تنفيذ , و كمان دا قانون بلدك , لازم تكون حافظ قانون بلدك يا محترم .

(هنا كنت خلاااص وصلت لآخري , و كنت على اتم استعداد إني أقول ألفاظ غير لائقة يعاقب عليها القانون – بس ستر ربنا مسكت نفسي) .

فتوح : أنا مش غلطت في حاجة و انتم اللي غلطانين , أنا مش هدفع غرامة اعمل ليا محضر و أنا هعرف آخد حقي .

المهم . . . نهايته عمل ليا محضر و مضيت عليه , و أنا الآن على أتم الاستعداد إني آخد المشوار لحد آخره مع ولاد . . . (لفظ غير لائق) .

بس برغم هذا أنا سعيد । . . ليه ؟ . . . الموقف اللي حصل دا أثبت كثير من نظرياتي و بيدعم افكاري تجاه بلدي العظيمة ميصر .


1- البلد رايحة للكلاب (سواء اللي راكبينا أو شرذمة من المركوبين و اللي بيركبونا بمساعدة اللي راكبنا) .

2- المصرية جنسية يجب التخلص منها سريعاً إن لم يكن فوراً .

3- علم في المتبلم يصبح ناسي (يعني انسى انك تغير حاجة في البلد دي)

4- يجب الهجرة إلى أي بلد (كازخستان - كندا) في اقرب فرصة .

("إِنَّ الَّذِينَ تَوَفَّاهُمُ الْمَلآئِكَةُ ظَالِمِي أَنْفُسِهِمْ قَالُواْ فِيمَ كُنتُمْ قَالُواْ كُنَّا مُسْتَضْعَفِينَ فِي الأَرْضِ قَالْوَاْ أَلَمْ تَكُنْ أَرْضُ اللّهِ وَاسِعَةً فَتُهَاجِرُواْ فِيهَا فَأُوْلَـئِكَ مَأْوَاهُمْ جَهَنَّمُ وَسَاءتْ مَصِيراً ") آية 97 سورة النساء .

5- فلتكن بطة مادمت تعيش في هذا البلد , و لكن إن وقف شئ أمامك فلتكن له أسداً , لأنك في الأساس أسد .

6- كتها نيلة اللي عايزة خلف في بلد زي دي .

7- الناس عارفة الخير فين بس بتستعبط وعاملة نفسها مش عارفة مكانه .

فيه نقطة خطيرة فكرت فيها – مش ممكن يكون ده مخطط لطرد أهل مصر من مصر عشان تخلى ليهم باللي فيها ويهيصوا مع القلة الباقية من رعاع الشعب ؟؟

("أَمْ حَسِبْتُمْ أَن تَدْخُلُواْ الْجَنَّةَ وَلَمَّا يَأْتِكُم مَّثَلُ الَّذِينَ خَلَوْاْ مِن قَبْلِكُم مَّسَّتْهُمُ الْبَأْسَاء وَالضَّرَّاء وَزُلْزِلُواْ حَتَّى يَقُولَ الرَّسُولُ وَالَّذِينَ آمَنُواْ مَعَهُ مَتَى نَصْرُ اللّهِ أَلا إِنَّ نَصْرَ اللّهِ قَرِيبٌ") آية 214 سورة البقرة .

مش عارف . . . الله أعلم , بس الموضوع محتاج عزيمة – ناس معاه – نتيجة وحاجة نوصلها – هدف – فعل و مش كلام زي الناس اللي موجودين دلوقت كل اللي بيعملوه كلام كلام كلام (أنا اتخنقت ليهم سلف)

المهم . . . خير خير محدش عارف الخير فين.

("الم {1} أَحَسِبَ النَّاسُ أَن يُتْرَكُوا أَن يَقُولُوا آمَنَّا وَهُمْ لاَ يُفْتَنُونَ {2} وَلَقَدْ فَتَنَّا الَّذِينَ مِن قَبْلِهِمْ فَلَيَعْلَمَنَّ اللَّهُ الَّذِينَ صَدَقُوا وَلَيَعْلَمَنَّ الْكَاذِبِينَ {3} أَمْ حَسِبَ الَّذِينَ يَعْمَلُونَ السَّيِّئَاتِ أَن يَسْبِقُونَا سَاء مَا يَحْكُمُونَ {4} ") سورة العنكبوت .



من وراء قضبان غباء راكبي مصر

فتوح ابو المفاتيح – و أغنية "حيران كدا ليه"


هناك 6 تعليقات:

  1. ايه يا فتوح مكنا ماشيين كويس
    عموما ياسيدى ماحنا بناخد من ده كتير بس بينى وبينك انت عجبتنى قوى لما ما دفعتش العشره جنيه بس انا ليه حبه تعليقات كده
    يعنى مثلا
    1- انا مش معاك بان الجنسيه مصريه يجب التخلص منها اطلاقا
    2-ومفتكرش ان احنا المفروض ننسى اننا نغير حاجه فى البلد دى لان انت لما بتشتغل او بتحاول تغير انت هدفك الاساسى انك ترضى ربنا ويوم ماتقف قدامه ويسالك انت عاملت ايه تقولو انا عملت اللى عليا وملكش دعوه بقى انت بالنتيجه يعنى مش تقولى نهاجر فى اى حته مش شايف ان ده نوع من انواع الهروب ولا ايه واديك قولتها انت فى الاصل اسد مش بطه يعنى مش المفروض انك تكون بطه
    3-منين جتها نيله اللى عايزه خلف ومنين اعد تقول حبيبه وحشتك ايه انت رجعت فى كلامك ونسيت حبيبه ولا ايه؟
    4-انا معاك ان الناس عارفه الخير فين بس بتسطعبط
    5-الموضوع فعلا محتاج عزيمه وناس معاك وهدف زى مانت قولت

    فتوح بقولك ايه روق كده وروقنا معاك مش مشكله زى دى اللى هتخلينا نفكر فى الافكار السلبيه دى كلها

    ياريت بقى تعوضنا بمقاله لذيذه تفرفشنا شويه
    اوك
    منتظر المقاله القادمه وياريت تكون قريبا

    ردحذف
  2. هاى ازيك يااخ فتوح انا معجبة بمقالاتك لانى بحس انها نابعة من داخلك وحقيقيةوعلى الاخص الحب اعمى وانا عموما اول مرة اعلق على مقالاتك ولكن انا حزينة جدا على هذا المقال سيادتك هتقولى لية انا هقولك السبب طبعا احنا اكيد عندنا انتماء واللى معندوش يبقى فيه حاجة غلط المهم الموضوع انه فى هذا المقال وردت بعض الالفاظ غير اللاقة تسئ الى سمعة مصر كلنا عارفين اللى كتبته عنها لكن العيب اكيد مش فيهاالعيب فينا انا وانت وكل مصرى واللى انا عايزة اوضحولك والفت انتباهك ليه هو ان مقالك دة لو واحد امريكانى او اوروبى او اى جنسية تانية قرا المقال دة قبل ما يزور بلدك تفتكر انت ممكن يقول اية وكام واحد هيوريه مقالك دة ........اكيد طبعا حاجة تستاهل انى ابقى حزينة واحب انك تعلق على كلامى واما قنعك يا تقنعنى ......وعموما انت موضوعاتك جميلة جداااااااااا وانا بستمتع بيها وانا بقراها...... امضاء elhob akbar kedba

    ردحذف
  3. بمجرد أن قرأت ثالث فقرة لم أستطلع اكمال المقال فمهما كان فى مصر من محن انا أتفقك معك فهى كذلك من قديم الأزل وهى مازالت وستظل صامدة حتى لو كانت محنتها فى أبنائها،،، أما أن تكون مهداً للــ(......) ما ذكرت... فعذرا لا يوجد مصرى يقبل هذا

    ردحذف
  4. انا اتفق معاك فى هذه المقالة كلها واتمنى فعلاً ان اغادر مصر واتركها واتخلى عن الجنسية المصرية اهم حاجة انى اكون مسلم وموحد وخلاص بس ساعات برضه افكر طب لو كلنا سافرنا وسيبنا البلد مين اللى هايفضل فيها غير اولاد ..... اللى احنا مش طايقينهم اصلاً وكمان ها يتمتعوا بكل خيرات مصر وكمان يبقى حرام علينا احنا نشحطط ونتبهدل بره وهم قاعدين هنا مرتاحين عشان كده انا غيرت رايى وهافضل فى مصر وها اعمل زيك ومش هادفع العشرة جنية الغرامة وهايتعملى محضر على الاقل عشان احس انى محترم فى نفسى واتاكد انى اصلى اسد مش فرخة واتعلم ازاى اخد حقوقى بس برضه خايف يحصلى زى محصل لايمن نور والقضاه والصحفيين مش عارف اعمل ايه انا دماغى صدعت انا نفسى فى ثورة بيضاء انوت فيها كل حرامى مهما كان مركزه نفسى واحد زى عمر بن الخطاب فى طهارة يده ويطبق القانون بتاعه من اين لك هذا؟ ونعمل كشوف مراجعة لثروات الناس اللى اتغنت فى مصر بسرعة هل هى من حلال ولا من حرام ولا من سرقة ونهب واختلاس واحتكار وسرقة بنوك او تسهيل سرقات وخلافه نفسى يجى واحد سليم عنده ضمير انا بدعى ربنا عشان الحلم دا يتحقق وبرضه ها اعمل زيك ومش هادفع العشرة جنية الغرامة
    شكراً

    ردحذف
  5. بصراحه اول ما قرات المقاله
    غلي الدم في عروقي
    وكنت ناويه ارد رد شديد
    بس اعتقد ان معظم الناس(ماعدا الاخير) ردوا واشبعوا رغبتي


    لا بجد بقي
    لو عايز تعرف ايه اللي مش مخلي مصر في مقدمه البلاد
    بص لكلام حضرتك
    ولكلام ناس كتيييير زيك
    مش بيعرفوا غير انهم يشتموا في نفسهم وفي حكامهم
    وطبيعي جداااا
    حكامهم مش هيتغيروا طول ما هم شايفين انهم (....) وما يستاهلوش غير كده

    بص لاي دوله متقدمه دلوقتي
    وشوف تاريخها الحديث قبل تقدمها
    هتلاقي ان التقدم ده نابع اولا من ابنائها

    هتلاقيهم كانوا بيحترموا نفسهم جداااااا وبيحبوا وطنهم

    اما وان يوجد فيها الكثير ممن يتكلمون بهذه اللهجه التي تفضلت مشكورا بالحديث بها

    فاعتقد ان اماما دربا طويلاااااا للتغير




    اعاننا الله

    ردحذف
  6. غير معرف رقم واحد

    هو أنا غيرت رأيي أساسا في موضوع التخلص من الجنسية المصرية
    لأني عربي أولا و أخيرا
    و المصريو أحسن جنسية تجعلك منتمي للعرب

    وصح
    لازم منهربش من المشكلة ونواجهها و نقف قدامها

    وأنا عمري ما نسيت حبيبة
    وربنا ينولهالي ياااااااااارب

    وسعات الناس بتكون عارفة الخير فين بس بتستعبط
    وليس دائما

    و إن شاء الله نعوضوكم بمقالة ظريفة

    سلااااااااااامون

    ردحذف

وخلي بالك من كلامك
حبيبي النبي بيقول:
"إن الرجل ليتكلم بالكلمة من رضوان الله ما كان يظن أن تبلغ ما بلغت ؛ يكتب الله له بها رضوانه إلى يوم يلقاه وإن الرجل ليتكلم بالكلمة من سخط الله كان يظن أن تبلغ ما بلغت ؛ يكتب الله له بها سخطه إلى يوم يلقاه".

إضغط على:
الاشتراك عن طريق البريد الإلكتروني
ليصلك بريد الكتروني عند قيام احد بالتعليق
وشكر

توضيح صغنووون خااالص


اقرأ و قول رأيك بحرية – عمري ما هزعل منك