الثلاثاء، أكتوبر 09، 2007

الفووووووووطة



دا شعر بتاع واحد صاحبي
هوا في طب و رغم دا الشعر أو الزجل اللي جاي بيحذر فيه كل مواطن عاقل
ذاقوى عقلية كاملة و متكاملة انه يخش كلية الطب
أو يحاول يحصل على اللقب
بس خير خير
محدش عارف الخير فين

نسي الفوطه

وناس واقفه بتتريأ ومبسوطه

وناس تانيه بتستغرب ومنقوطه

ليه الدكتور نسي الفوطه

و هو يا عيني كان واقف

ووشه أحمر ولا القوطه

و قال ياجــــــــماعه سامحوني ....وقبل ما تيـــــــجوا تلوموني

تعالــــــوا أحكيلكوا أنا حكايتي..... وبعديها إبقوا حـــــــاكموني

سنــــين فــــاتت في ثانــــــويه..... كفاح دامي وعــرق ودموع

وبعد المعركـــــــــه الحــــاميه..... قدرت أنجح وأجيب مجموع

أخيراً حلمنـــــــــــــــــا إتحقق .....هخش الطــــــــب وأدّكــــتر

رســـــــــــاله جميله ومعـــاها...... مقام عالي وفلوس أكـــــــتر

و جاتلي بطاقة الترشيـــــــــح...... فيها الطب اللي بحــــــلم بيه

بتاع البوسته جابهــــــــــــالي ......وخدله حلاوه عشــــرة جنيه

في أول يوم لـــــــــبست جديد ......وشلت البالطو رحـت لاقيت

زمايلي إتحــشروا في مــدرج...... عامل ولا عــــــلبة الكبريت

ولكــن برضه مايئستش

دخل دكتور قعد يشــــــــــرح .......كلام كــــان صعب ولاتيني

و أنا متنـــح ومـــش فــــــاهم ......لاقيت النــــــــوم غلب عيني

و لسّه أنا برضه مايئستش

و قلت مادام ضــــاع النظري...... هظبّــــــــط نفسي في العملي

جريت عـ المشـــرحه بسرعه...... لكن كالـــــــــعاده خاب أملي

دخلـــــت لاقـــيت 200واحد....... بيتخــــــــانقم على الجــــــثه

وناس واقـــــــــفه من الزحمه ......على كتافـي ومـــــــش حاسه

و لسّه أنا برضه مايئستش

و طبــــــعاً حسّوا بظــــروفنا .......وحطّولنا إمتــــــحان فوزايــز

وكل أمّا آجي أحــل ســـــؤال....... أقف أدامــــــه زي الــــــزير

و لسّه أنا برضه مايئستش

وجينا في لجنة الشـــــــــفوي....... وكان أدّامي واد كــــــــــوسه

خد الfull mark مـ الدكتور....... وخد فوقهـــــــم كــمان بوسه

و لسّه أنا برضه مايئستش

دخلت انا قام مكـــــــــــشرلي .......كإن أنــــــا مش human race

سألني سؤال... مــاردّيتشي........وقاللي أخرج يا hopless case

ولسه أنا برضه مايسئتش

سنه بتمشــي وســــنه بتيجي ........مقـــالـــب بعـــدها مقــــــالب

زمايلي إتعينوا و قبـــــــضوا .......و أنا شايـــــل لـــــــقب طالب

و لسّه أنا برضه مايئستش

كبـــــــرنا شـــويه وقــــالولنا....... خلاص دلوقتي شوفوا حالات

و رحنـــــــا نشوف وكالعاده........ دا كله بيطلع إشتــــــــــغالات

و لسّه أنا برضه مايئستش

بشوف الشاب من ســــــــني........ واقـــــــــف ويّا البنات مرتاح

و لــــو عديـــــت أنا يقولــوا........ راح الدحّـــاح .....جه الدحّاح

و لسّه أنا برضه مايئستش

لحد ماخلصم السبــــــــــــعه ........وقلت خلاص هروق وهعيش

و قبل ما أفوق من الصــدمه........ خدوني عشان أخـــش الجيش

و لسّه أنا برضه مايئستش

وقعت هناك في إيــــد ظابط ........ظغرلي وقال يا بســـــــــكوته

أحب أبـــــــــــشرك إنــــــك ........معـــــــايا هتطـــــــفح الكوته

و لسّه أنا برضه مايئستش

خلااااص السبعه بقوا عشرة........ ولسه أنا ماشي جنــب الحيط

و بان السن علــــــــى وشي ........و شعري إبيـــّض و إصلعيت

و لسّه أنا برضه مايئستش

وبعد ما قـــــلت كــــــــفاره ........خلاص هرتاحلى بقى كام يوم

لاقيتهم تـــــــــانــي واخدنّي .......عشان تكليـــــــــفي في السلوم

و لسّه أنا برضه مايئستش

و قلت هنـــاك هآخد قرشين........ آكل منهم و أجيـــــــــب لبسي

فوجئـــــــت يا عيني بمرتب .......يادوب مايقضــــــنيش شيبسي

و لسّه أنا برضه مايئستش

و بعد الـــعمر دا كـــــــــــله .......رمــــــوني في وحـــده صحية

نسيت الطب أنا فيـــــــــــها ........وبقــــــــيت زي التمرمــــــجيه

و لسّه أنا برضه مايئستش

و آديني بعيش وهعمل أيـه؟؟........ ماليــــــــش ولا قوه ولا حولا

وحيد غلبان وحتى مافـــيش ........جـــــواز علـــى نفــــقة الدوله

و لسّه أنا برضه مايئستش

قام الدكتور صعب عـ الناس....... و فــــــضلم يـــبكوا على حاله

و حتى الفوطة نســــــــيوها........ ولموا فلــــــــــوس وسابوهاله

و قال دكتورنا عـ الفوطــــه........ تعــــــالوا هشـــــيلها أنا بكرة

لكن اهل المريض قالــــــوا........ خلاص........ سيبهالنا للذكرى


هناك تعليقان (2):

  1. هههههههههههههههههههههههه بس بجد جمييييييل قوي أنا بقراه وبضحك بس عنده حق والله و أحلي جزء


    سنــــين فــــاتت في ثانــــــويه..... كفاح دامي وعــرق ودموع

    وبعد المعركـــــــــه الحــــاميه..... قدرت أنجح وأجيب مجموع


    آديني بنكافح كفاح دامي وفيه عرق من كتر المرواح والمجي من الدروس الخصوصية للأسف..وبرضه فيه دموع فعلاً واقربها النهاردة
    وربنا يقدرنا ونجيب مجموع إن شاء الله
    وسلاااام

    ردحذف
  2. ربنا يوفقك يا . . . .
    انا مش عارف أقرأ اسمك
    ياريت تكتبيه بالعربي عشان اقدر اخاطبك
    بس عشان انت من اسكندرية
    هقولك يا سكندرية
    ربنا يوفقك
    وتتجيبي مجموع وتعملي حاجات حلوة
    انت ناوية على كلية ايه ؟؟

    ردحذف

وخلي بالك من كلامك
حبيبي النبي بيقول:
"إن الرجل ليتكلم بالكلمة من رضوان الله ما كان يظن أن تبلغ ما بلغت ؛ يكتب الله له بها رضوانه إلى يوم يلقاه وإن الرجل ليتكلم بالكلمة من سخط الله كان يظن أن تبلغ ما بلغت ؛ يكتب الله له بها سخطه إلى يوم يلقاه".

إضغط على:
الاشتراك عن طريق البريد الإلكتروني
ليصلك بريد الكتروني عند قيام احد بالتعليق
وشكر

توضيح صغنووون خااالص


اقرأ و قول رأيك بحرية – عمري ما هزعل منك