احنا نبطل كتابة

احنا إشارة إلى : فتوح و سيجا و محمد . . . واحد فيهم يكتب

اكتب ؟ ؟ ؟ طب ليه . . . الواحد معدش ليه نفس للكتابة

او معادتش في سبب يدفعك للكتابة , نوع من البساطة والتلقائية اتلغوا من حياة الواحد وكان بيعتمد عليها كتير كتير

هو تقريبا مش دا السبب الوحيد , او السبب العجيب

الواحد بيكتب نتيجة تفاعله في الحياة الحركة و الاحداث المختلفة المتجددة سواء السعيدة او الحزينة

بقيت محلك سر . . . ومحلك قف . . . ومحلك اقعد يا تيت

الواحد بيكتب عشان يلاقي تأثير , ردة فعل لكتاباته , معدش حد بيقرالي , و اللي بيقرالي مبيعرفش يقرا , مبيعرفش يديني ردة فعل

قرا زي مقراش . . . مبتفرقش , لأن قبل زي بعد . . . تقريبا مسحوق الغسيل دا مالوش لازمة.

حاجة كمان . . . التجاهل سلاح قوي و محطم . . . خصوصا معايا وانا الشخص الرغاي اللي بيحب يتكلم عن الحاجة الي عملها لأنه سعات بيعقد الحاجة وبيهتم فيها بتفاصيل نونو صغنونة

اصلي بحب النونوز

ممكن حد يقول الدنيا واسعة شوف ودور

المشكلة اني وحيد . . . وحيد بشدة جدا , , , و لما بصرح بكدا بيتم لومي.

تقريبا اعترف وما زلت اعترف اني ماليش اصدقاء , تقريبا لأني مبعرفش اعمل صداقات , يمكن لأني بحتقر نفسي زيادة عن اللزوم , يمكن لأني عايش زي فار وتاه في الصحرا , لأني بغوص جوا نفسي سعات و بتجاهل كل اللي حواليا فجأة.

أو لأن كل اللي حواليا الدنيا خدتهم زي ما خدتني . . . الهم و الدنيا . . .شئ مقدر لنا جميعا

هيييه دنيا

عامل زي حاجة لطيفة شوفتها جنبي . . .

نخلة لطيفة شكلها حلو

طرحت بلح , محدش جه خده

البلح بقا رطب زي العسل , محدش برضه جه خده

الرطب بقا تمر سكر ومية مية , محدش جه خده

في الاخر التمر نشف وسوس ومبقاش ليه لازمة

اه ياني يا امه . . . تعاليلي يا امه . . . دي كانت احدى الكلمات الخالدة من اللي جدي كان بيقولها

نقول يارب و نخلي عندنا امل في غدا

لأنه طالما فيه غداً فأكيد فيه خير.

لأن محدش عارف الخير فين

كان معكم – مستيقظا فجأة من نومه

فتوح ابو المفاتيح – ضغطه واطي وتعباااان

دمار شامل

أنا حالتي بقت صعبة اوي , من السهل جدا اني اشعر بالسوء ناحية نفسي , بقا من البسيط اني اللوم نفسي على حاجات كتير , احرق دمي وازعل و ابقا مش عارف افكر.

بقت حاسس اني وحش واني مش بعرف اعمل حاجة , حاسس اني دلدول مليش رأي وبمشي ورا اي حاجة , بقا بسهولة جدا اقدر احس ان الدنيا سودة , وبسرعة احس ان الدنيا حلوة و زي الفل.

مش عارف الاقي مصدر تفاؤل استمد منه حاجة.

مش عارف . . . سواد في سواد في سواد

واحد امبارح متخانق معايا عشان عاوز ياكل كتير , و أنا مليش دعوا اساسا بالأكل , قاعد بلوم نفسي عشان هو عمل كدا.

اووووف

اعوذ بالله من الشيطان الرجيم

يارب اهدي الجميع

انا ضغطي وطي , دماغي مصدعة وحالتي صعبة

ادعولي

خير . . . محدش عارف الخيرفين

سلااام

كان معكم – وحش اوي

فتوح ابو المفاتيح – قاعد في مكتبه لوحده و محبط

صعايدة ليبيا و نصر الجزائر

انتهت ليلة اليوم 18-11-09 بخسارة فادحة لفريق مصر و نصر للجزائر , وبما إني من سكان هنا (سبها) في جنوب ليبيا ومش من سكان هناك – نواحيكم يعني , فلازمن انقل الصورة.



أول ما المطش خلص , عرفت من الهيصة في الشارع , مئات من الليبين (الجنوبيين) عاملين مسيرات في الشوارع بحتفلوا , وشايلين علم الجزائر اخضر منور بيرفرف , وعربيات بتفحط و بتعمل امريكاني و مطلعين التراب للسما , بس شوية عربيات تحفة جديدة آخر حاجة , عربيتين كسروا اكس العجل بتاعهم , متجمعين في ميدان وهتاف قوي جدا , جزاير جزاير جزاير , وزغاريت , وفجأة انقلب الهتاف ليبيا ليبيا , ههههه , ما هو في وسط الهيصة

:)


الناس المصريين اللي ساكنين معايا في الاستراحة , واقفين في البلكونة , دمهم محروق بيتفرجوا على الناس اللي في الميدان و نفسهم أي عربيتين يتخبطوا في بعض , واحد من تحت بصلهم وقالهم يا مصرييين , كأنه بيشتمهم , واللي كانوا عاوزين ينزلوا يشتروا حاجة خافوا ينزلوا احسن ينضربوا – دول صعايدة – وكمان ليبين . . . اللهم سلم


خير خير خير . . . محدش عارف الخير فين

ربما إن الهزيمة دي خير , ربنا بيجيب دايما الاحسن لينا , نوع من توفير الفلوس و المصاريف اللي كانت هتنصرف عشان الكاس , وفلوس شرا اشتراك القنوات المشفرة لزوم الفرجة على كاس العالم , و فرصة عشان اتحاد الكورة يتقفش ويشوف الوش التاني ونكشف شوية من فضايحه واختلاساته و الفلوس المسروقة


وفرصة عشان نكتشف إن بعبع انف وزة الخنازير مالوش لازمة بأمارة الجسر الجوي و سلملي على كوبري اكتوبر

مبروك للجزاير و هارد لك يا مصر

وعظيمة يا مصر

كان معكم مراقبا للطرفين

فتوح ابو المفاتيح – قائلا مبروك

:D

عالم شاذ

فلنتفق في البداية إن العالم بتاعنا , أو المساراللي البشر ماشيين فيه دلوقت (أو لنقل معظم البشر) هو مسار شاذ , بعيد كل البعد عن الفطرة و الحياة السليمة .

انا هنا بتكلم عن المسلمين منهم , وما يحكمهم في علاقاتهم و تصرفاتهم , لأن هما دول اللي عندي سابق خبرة عنهم.
تعقيدات لا أول لها من آخر , اضافات على الحياة زادتها تعقيدا و زادتها سهولة من ناحية اخرى , تعقيدات و معوقات و اعتقادات و شكوك في كل شئ حولنا.

آ آ آ ه

انها حقا لمسارات معقدة.

شئ بسيط جميل لطيف و هو الفطرة و شئ طبيعي , من البساطة انك تطلبه و تحصل عليه في وقته , ولكن مسارات الدنيا تعقده , افكار المجتمع تعطله , قيود الحياة توقفه

أووووف

شااااااااااذ للغاية

OUT of NORMAL

ليه , ليه كل واحد معتقد حاجة لازم يعملها , (ببساطة لأنه معتقد)

:P
ليه كل واحد عاوز حاجة في غيره يصر وبشدة انه يعملها , يطبق فكره على الاخرين (لأن سلطته تمنحه كدا) هو ليه حق انه يعمل بعض الحاجات بس الشكوك والمجتمع و المسار المعتاد في الحياة بيجبره على الشئ دا و إضافات لا أول لها من اخر
هو مش غلطان , هو ماشي مع القطيع كيفما سار , ربما يكون المسار ظاهرهُ مختلف , ولكنه مازال نفس مسار القطيع
عالم مجنون , معقد , طلبات غريبة , طلبات تافهة , بس محدش عنده استعداد يتنازل أو يستحمل عشان نوصل للضفة التانية

اووووووه

ليه مثلا , مش عارف , ربما . . . , بس ممكن . . . ؟ الله اعلم

الفكرة في ايه , اوهام , ربما طموحات , ربما اولويات , لا لا لا , هي مش كدا هي ببساطة قالب واتحطينا فيه , العصر و الوقت اللي احنا فيه حطنا فيه , ولازم نمشي فيه لأنه من الظلم حد يمشي و التاني لأ

كان زماني من 6 سنين واخد التوجيهية و افندي قد الدنيا وتكتب لي في البطاقة كمان

:P

دا أحد امثلة الشذوذ في هذه الدنيا

لييه ؟؟؟ ليه خاضعين للنظام دا ؟؟؟ ليه ماشيين فيه ؟ ؟ ؟ وما زلنا و محدش بيعترض

هنا الناس تلاتة نوع موجودين

الأول : و دول كتيير (مش معنى انهم كتير انهم صح) هو مقتنع وشايف إن دا حاجة عادية ومعندوش مانع ومؤيد بشدة , ودا جزء قوي جاي من ناحية تأثير الثقافة الغربية و المتعولمون و أنصار حروق الانسان , وعدم تمتعه بوجهة نظر خاصة بيه (أكاد ألمح تشابه قوي جدا في كل كلامهم وإن اختلفت الالفاظ و التعبيرات والأساليب) كلهم نسخة بالكربون لفكر

Out OF Service

الثاني : غير مقتنع وعارف الشذوذ وحاسه ورافضه تماما , ولكن لا معاه السلطة ولا معاه القوة اللي تمكنه من التغيير أو عمل اللي هو عاوزه , ولأن اللي هو عاوزه في ايد ناس من النوع الأول أو النوع التاني , فبيتضطر انه يمشي في نفس المسار الحرج الشاذ عشان يوصل للي هو عاوزه

الثالث : ودا الأغلب و الأعم , مش فارقة معاه بقرش ساغ , مطرح ما يوديني أنا رايح وراه , الناس بتقول شمال , يبقا شمال , يمين , مليح وايد اليمين , أنا بستغرب واحد داخل أداب قسم فلسفة هيتخرج يشتغل ايه ؟ ؟ (مع الاعتذار لأفراد هذا القسم) , اعرف ناس (بنات خصوصا) دخلوا كليه اداب قسم معين (سهل وننجح فيه بسهولة) لأن التعليم مش فارق معاهم , اللي فارق انها يبقا معاها مؤهل عالي (ومن هؤلاء كثير) , شهادة , عشان متبقاش أقل من غيرها في سوق الجواز , ولا كلمة من اللي بياخدوها بتفرق معاهم , ولكن لأن المجتمع عاوز كدا , لأن العالم الشاذ بقا كدا , ودول أكثر خضوعا و اصرارا على العالم الشاذ اكتر من النوع الأولاني

دنيا . . . و المستغطي فيها الغطا دا وهم , فروح ألبس لك حاجة لأن الجو برد

اممم

وطبقا لما سبق و لما قدمت , اتعتقد إن الأسهل لكل حاجة حوالينا أنها تمشي ببساطة

ولكن هي محض تجارة وصناعات , لازم تحرص على وجود التعقيد ده , لأن دا قوت غلابة , و فاتح بيوت وهلم جرا
اعرف واحد شغلته مصور فوتغرافيا , مش بيصور أفراح , لأ بيصور لوووف ستووريز

Love Stories

حاجة طالعة من العدم بيعملها لكل جوز عرسان , و النتيجة اسطوانه عليها فيديو و شوية صور لطيفة , ولادك مينفعش يتفرجوا عليها (لأنها عيب عيب خالص) , و التكلفة عالية جدا جدا

اهلا وسهلا بكم في تعقيدات الحياة

لأنك بما انك بتقرأ المقال دا , فإنت أكيد عايش جوا العالم دا

نفر عسكري (سواء ذكر أو انثى) تعيش وتتعايش , خاضع لدماغ العالم الشاذ , ويمين يمين وشمال شمال

وهييييه

خير خير خير
محدش عارف الخير فين
كان معكم – من نوو ويير
فتوح ابو المفاتيح – الدنيا بررررد

ليبيا . . . خير محدش عارف الخير فين

بسم الله الرحمن الرحيم
سلام عليكم

كيف حالكم . . . بكتب ليكم من براك – شعبية سبها – ليبيا
النهاردة ثالث يوم ليا في ليبيا و ثاني يوم في براك
كنت قررت اني انزل تدوينة اول ما نزلت ليبيا في طرابلس , بس اللي حصل حاجتين , كنت كتبت التدوينة على موبايلي الجديد على جزأين بس الجزء التاني طار , دا غير إن التدوينة كانت سخيفة نوعا ما , وكل اللي بتعمله انها بتوصف مشاهداتي للرحلة أثناء ما أنا في الطيارة , ودا بمناسبة إني أول مرة أركب الطيارة وأنا في كامل قواي العقلية , يعني عندي حس النقد والكتابة من غير سبب وهلم جرا , كأن دا حدث مهم يعني , و الجزء التاني من التدوينة ضاع لأني قفلت البرنامج قبل ما احفظ اللي كنت كتبته , فدا أول سبب
تاني سبب إني لما وجدت النت في طرابلس , كنت تعبان وحالتي صعبة وحالتي غريبة و أصابني الكسل و الخمووول , أصل الطيارة بتاعتي وصلت طرابلس يوم الثلاثاء الساعة عشرة ليلا (توقيت ليبيا ومصر متشابه) , وانا معييش أي وسية اتصال مع أي حد في ليبيا ولا أعرف أي اسم ولا أعرف من هيجي ياخدني ولا انا رايح فين , فضلت ألف في المطار ما يزيد عن ساعتين وانا شايل معايا الشنط , ومفيش أي حد في مطار طرابلس العالمي , استعلامات مفيش , الناس بتوع شركة الطيران مش موجودين , أخيرا على الساعة 11.30 جاني واحد يسمى بمروان آل ايه , جه الساعة 11 و وقف يدور عليا , سلامات يا اللي بيدور عليا , أنا واقف من الساعة 10 عمال ألف وأدور , أنا اعتقدت ان اللي هيجي ياخدني هيجي من سبها , ولما سألت لقيت طيارات سبها هتيجي بكرا الأربعاء صباحا , فقلت خلاص هبات في المطار واستنى اللي جاي الصبح.
خير خير خير
محدش عارف الخير فين
الأحوال جيدة و الحمد لله , أول يوم في ليبيا فطرت في الطائرة من القاهرة لطرابلس , وتاني يوم فطرت في مطار سبها , تالت يوم فطرت مع الناس اللي معايا في الشغل في براك , مكرونة وكفته بانيه و سمبوسة.
محدش أبدا يتوقع و يتهم أهل ليبيا انهم يعرفوا الاصناف دي من الأكل , دا واحد مهندس معانا كتر خيره , جايبهم معاه من مصر , خطيبته عامله ليه السمبوسة و الكفتة البانيه عشان ياخدهم معاه , دا غير انها مزوداه بحاجات تانية كتير, تقريبا دا نوع من الدلائل انها بتعرف تطبخ وانها بتفكر فيه حتى و هو مسافر
: P
خير خير خير . . . محدش عارف الخير فين
الحياة مملة جدا هنا , أو غلط إني اوصفها بكدا و انا مقضيتش غير يوم واحد عمل , بس أكيد فيه دلائل , اليوم يبتدي من الساعة 9 أو لنقل 10 و بيخلص على الساعة 4 , مفيش حاجة تانية تعملها ,البلد عبارة عن حرف تي كبير شوية , بس فيها شوية مناظر تحفة , عاوز اشتري كاميرا بما إني سبت فلتي في مصر , ومفيش نت في المكان و هكذا.
مكتئب قليلا محدش بيسأل عليا بس أكيد خير
يلا خير خير خير محدش عارف الخير فين.

كان معكم من بدايات الصحراء الكبرى
فتوح ابو المفاتيح – الكهربا قاطعة

فانلة سكاي

فيلم أجنبي – إنتاج 2001 – بطولة توم كروز وبنلوبي كروز (ملحوظة: اتصاحبوا و اتجوزوا بعد الفيلم) المهم . . .

قيل لي إن الفيلم تحفة , و إن الفيلم جامد و انه مستوحى من لوحة اسمها السماء بلون الفانيليا لمونيه.

قصة الفيلم ببساطة وبشكل سريع تفصيلي ممل.

واحد صايع . زير نساء (وهو بالطبع توم كروز) , قرب من الاربعينات ومازال كما هو , كل ليلة مع واحدة شكل , لحد ما وقعت في أرابيزه واحدة مجنونة , وبعد ما فضل معاها فترة صغيرة شاف واحدة تانية حلوة (من وجهة نظره) اللي هي بينولوبي كروز , وكانت صديقة صاحبه الانتيم , فبدأ يلف حواليها ويحاول يسحرها بإبتسامته الرائعة و قفاشته اللذيذة و سحره المغري و هلم جرا من أدوات إغرائه القوية (كما يفترض صناع الفيلم) وهي يا عيني المسكينة مش قادرة تقاوم و الحوار دا بدأ في نفس اللحظة اللي هو بدأ فيها الأخ كروز يطنش الأخت المجنونة.

الأخت المجنونة طبعا ولعت خالص و نار الغيرة قادت في قلبها و بدأت تمشي وراه , لحد ما قفشته تاني يوم نازل من بيت الأنسة الفاضلة بينولبي , قالت له تعالي نقضي وقت مع بعض , و لأن ديل الكلب عمره ما يتعدل راح معاها , وفي العربية اتخانقوا مع بعض , وقالت له إنها بتحبه فعشان كدا هي فكرت في إنهم يموتوا مع بعض فراحت ناطة من على كوبري بسرعة 160 كم/ساعة

الاخت المجنونة ماتت , والأخ كروز تشوه وجاله كساح في ايده اليمين , وبقا عامل زي المسخ , و فقد اسلوب و وسيلة حياته اللي بيعيش بيها و مش هيعرف يجيب بنات تاني , فيعمل ايه المسكين ؟ ؟ ؟

هنا بدأ يفرض نفسه على الآنسة بينلوبي اللي سارعت في رفضه , وبعد ما نام في الشارع ليلة قدام بيتها صعب عليها وقالت يا مسكين تعالى عيش معايا وعاشوا في تبات ونبات وراح للدطتور و ظبط ليه وشه , هو بقا بعد كدا اتجنن و جاله فصام في الشخصية , وبقا يشوفها في صورة الأخت المجنونة , فراح قتلها بوسيلة بشعة ,و دخل السجن , وقعد مع دكتور نفسي يفتكر اللي حصل.

في اخر الفيلم نكتشف انه كان بيحلم و إن الانسة بينولبي معبرتهوش اساسا بعد ما دلقته و إنه كان بيحلم بكل دا , وانه كان متجمد في تلاجة بقاله 150 سنة وكان بيحلم جواها بالحاجات اللي فاتت كلها والناس اللي كان يعرفها كلهم ماتوا.

وبح . . .

يعني أنا ضيعت ساعتين وربع 2.15 عشان فيلم قصته هايفة , بدون أي إضافة , لا تدفق أحداث , ولا أي حاجة , المعلومة اللي طلعت بيها من الفيلم على رأي واحد صاحبي اللي شافه معايا : دا توم كروز طلع بيعرف يبوس زي ما بيعرف يضرب.

لا أكثر ولا أقل . . .

أهلا بيكم وسهلا مع ابتسامة كروز الساحرة من الأذن للأذن لمدة ساعتين و ربع , وكام حركة إغراء منه للبنات المساكين.

أنا ضيعت ساعتين و ربع وانتم ضيعتم 10 دقايق تقروا المقالة الهايفة.

لا أنا استفدت حاجة سوى إني تأخرت عشان أروح البيت , ولا أنتم استفدتم حاجة سوى إن كوباية الشاي أو النسكافيه بردت

ودمتم سالمين

خير خير خير

محدش عارف الخير فين

كان معكم نادما على إضاعة وقته

فتوح أبو المفاتيح – ميكروباص طنطا – بجوار مصنع توشيبا العربي

حدث ولا حرج . . . نحن همج متوحشون

الشيشان . . . فلسطين . . . البوسنة . . . كشمير . . . افغانستان . . . كوسوفا . . . تركستان . . . العراق . . . سربرينــيـــتــيشا (مذبحة جماعية ل 8000 مسلم) . . . المسلمون إرهابيون همج لذا يتم ذبحهم . . . قوم هدامون للحضارة لا يفقهون شيئا في هذه الدنيا و من مصلحة العالم القضاء عليهم , ومن أجل هذا تتضافر الجهود لإبادتهم . . . أمام كل هذا تتضائل تفاهتنا . . . هل لدينا عقل , أم ضاق هذا العقل فقط ليحوي مشاكلنا اليومية التافهة و نضع نصب أعيننا فقط صراعتنا التافهة و أفكارنا الغبية عمن حولنا . . . ونقضي أيامنا وليالينا نفكر فيها . . . ونعمل ونتعب من أجل متع ذاتية دنيوية زائلة . . . ليس لشئ سوى . . . أنا عاوز كدا .
ربما نتلقى النصيحة بشكل سئ , ولكن هذا لا يمنعنا من أن نعمل العقل بدلا من انعدام العقل.

خير خير خير خير
أنا و انت و نحن كمسلمون حملنا الأمانة منذ أن رضينا بأن نكون مسلمين , قبلنا على أنفسنا هذه الديانة بكل تبعاتها و بكل مهماتها, ولتعلم أن الله يحاسبنا على اعمالنا و تصرفاتنا و ليس على ظروفنا الصعبة المسكينة المؤلمة , التبعات و الهموم منها أن تحمل هم اختك و اخوك المسلم , بأن تحمل هم من هو ليس بمسلم , لأنك بصورة أو بأخرى ستتحمل جزء من ذنبه لأنك لم تعرفه ما هو الإسلام الرائع المذهل , لأنك لم تحاول أن تحسن صورة الإسلام المشوه في بصره , لأنك لم تفكر للحظة واحدة بأن تستغل قدراتك المدهشة الرائعة التي لم تتكرر سوى لك , التي لم يمنحها الله سوى لك , وفضلت بأن تستغلها في التفاهات و الصغائر من حب و كره و توهان و حيرة , في طرقات ضائعة ليس لسوى المتعة وفقط.
أنت تحمل أمانة ما وهبك الله , لأنه ما وهبك إياها سوى لكي تكون خادما للإسلام , مساهما في رفعته وعزته و أمله, ناشرا لدين الله.

بسكوتك وصمتك أنت أناني.
بجلوسك مكانك دون حراك أنت أناني.

برفضك نصح و هداية غيرك وتغييره , تحت عذر بأنها ظروفه , ومن حقة ارتكاب الخطأ مع معرفته بالخطأ , أنت أناني.
برفضك استخدام ما وهبك الله لدين الله أنت أناني.
بتعاليك و انخراطك في توافه امورك أنت أناني.
بإنشغالك بحربك المذهلة (لك وحدك) التافهة مع من حولك أنت أناني.

لأن الله سبحانه وتعالى أنعم عليك بالاسلام , و إن يكون مصيرك بإذن الله الجنة.
و أنت ترفض و بشدة أن تمتد هذه النعمة إلى غيرك , أن تدافع عن أخاك الذي يحاول إيصاله لغيره.
أرجوك . . .
لا تكن أنانيا.
لا تعش لنفسك.
اخرج من جحرك.

اكسر خوفك.

اكسر دائرة الأمان المزيفة التي وضعت نفسك فيها.

كن شجاعا أمام المخاوف و الأوهام الكاذبة التي وضعتها أمامك.
أنت أكبر و اعظم و أكثر قدرة مما تعتقد , أنت صنيعة الله .
لا إله إلا الله , محمد رسول الله

لإن الله لا يغير ما بقوم حتى يغيروا ما بأنفسهم

هدانا و هداكم الله

فتوح أبو المفاتيح

الاحتواء - عندما يكون طفلا

امبارح – الأربعاء – حصل موقف رائع جدا جدا . . . لطيف أوي.
كنت في دورة من دورات شركة خيالي لإعلام الطفل.
كان فيه طفل صغنون "يوسف" عنده سنة و نص نايم ولازم حد يشيله , شيلت النونو الصغنون وخدته في حضني , لف ايده حولين رقبتي ونيم راسه الحلوة الصغنونة على كتفي.

يا ا ا ا ه
شعور خرافي جدا رائع بشدة مذهل بقوة . . . خدته في حضني جامد . . . لفيت دراعي حوليه . . . حسيت بيه كأنه جوايا . . . كان دافي , حسيت بيه كأنه بيدوب جوايا وهنبقى فرد واحد . . . كنت مستمتع جدا جدا جدا لأقصى درجة ممكن تخيلها.

افتكرت حبيبة . . . بنتي الصغنونة الحلوة لما هاخدها "إن شاء الله" ونتفسح وفي اخر اليوم تكون تعبت فتنام في حضن بابا وتاخد راحتها ما هو سرير خصوصي لحد ما نروح واحطها في السرير الحلو بتاعها.
آ آ آ ه ياني

عشرين دقيقة فاتو عليا واقفين على المحور مستنين عربية وهو في حضني , كانت أروع عشرين دقيقة ممكن تخيلها . . . الاحتواء كما يجب أن يكون , حاجة جميلة جدا جدا جدا أوي خالص وبشدة.

خير خير خير
محدش عارف الخير فين
كان معكم منتشيا
فتوح ابو المفاتيح – محور 26 يوليو - محضونا

بابا اوباما ادانا أجازة :D

أي نعم . . . خدنا بكرا الخميس إجازة . . . أصل سي الريس أوباما جاي بكرا بإذن واحد احد أصله راح يزور جامعة القاهرة و يزور الاهرامات و يركب الجمل ويتصور عليه
ايه بقا سبب الأجازة ؟؟؟ أصل أنا بعيد عنكم من سكان وعاملي منطقة الجيزة . . .و لأن اوباما ناوي يلف الجيزة , فقد تم غلق المنطقة تمام . . . من الأخر اتقفلت. المهم
جاني خاطر عجيب . . . من شوية و أنا عمال ابحلق في السقف . . . سمعت صوت مخيف.
أوباما باعت تقريبا 3000 راجل من رجالة الأمن بتوعه عشان يأمنوا القاهرة ويظبطوا السكة , دا غير انه جاي بنفسه و معاه الحاشية الكبيرة خالص خالص بتاعته
وهلم جرا . . . صح ولا ايه ؟؟؟
المشكل بقا فين
مش ممكن و إذ ربما حد فيهم جاي ولاقط انفولنزا خنازير . . . طيور . . . تماسيح . . . أو عنده بلهارسيا مزمنة و يجي هنا و ميديش ضهره للترعة.
أو يكون بعد الشر . . . بعد الشر . . . أوباما نفسه عنده انفلونزا خنازير . . . ولما يجي يبوس الريس حبيبنا اوي اوي وحرمه يلقطوا من الانفلونزا ويتعبوا و ميلاقوش دوا . . . ويموتوا ويفيصوا ؛) بعد الشر طبعا
دا شئ ممكن أكيد يحصل بصفتهم ناس جاية من دولة فيها الوباء الوحش دا

السؤال الخطير اوي اوي اللي بيطرح نفسه بغلاسة

يا ترى يا هل ترى الناس دي كلها هيدخلوها الحجر الصحي في المطار ؟ ؟ ؟و بعد كدا يكشفوا عليهم و لما يطلعوا صاغ سليم يفرجوا عنهم ؟؟؟ و يا هل ترى عندنا حجر صحي يستوعب الناس الكتيرة اوي دي كلها ؟؟
ولا إحنا هنطلع بلد نامي من بلدان العالم الثالث و الحياة عندنا ماشية بالبركة و دائما نتعامل بالخيار و الفاقوس ؟؟؟
إمممم . . . سؤال صعب جدا خالص وايد . . . أنتم شو رأيكم ؟ ؟ ؟

كان معكم - مبسوط خالص بالأجازة

فتوح ابو المفاتيح - جنب الراجل اللي عطس

لا شئ . . . العدم

لا موت

لا حياة

مجرد لا شئ

ولا حتى بطيخة طعمها زي الخيار

مجرد عدم ينساب منه دم أسود ببطئ

يطغى على العالم ويحيطه بستار دموي عنيف

يسيل . . . يغرقنا . . . يغطينا

يقتلنا رويدا رويدا

اسوأ و ابشع انواع القتل البطيء

ترى كل شئ حولك يموت

اصابعك فساقاك و تفقد الحركة تماما

تموت ذراعيك , ولا تستطيع ان تحرك ساكنا

ثم يترك جثة هامدة لا حراك فيها

وتعلق لافتة

هنا كانت تنبت نخلة

اصبحت جثة هامدة بلا ثمار

واحد شاي و صلحه_ لو انت عاوز

دنيا غريبة ملهاش أمان , أو لنقل إن اللي ملهوش امان هما الناس اللي حوالينا , إذ ربما في لحظة ما تاخد منهم زربو مش متوقعة .

بس خير خير خير.

وجهة نظرهم انهم بيعملوا حاجة كويسة , حلوة خالص (الزربو) , ودا طبقا للي هما عاوزينه لنفسهم مننا , عشانهم هما بس , لرغبات غريبة و تفاعلات نفسية عجيبة عندهم.

فلنتخيل إن الدنيا دي كوباية شااي من غير نعناع , جرب تدوق الشاي كدا . . . شاي مر طبعا , دا من غير سكر خاالص.

حط فيه 3 معالق سكر بحالهم , بس متقلبش الشاي , دوق كمان مرة.

اوووووه . . . يا للصاعقة , الشاي لسا مر , أكيد ما هو احنا مش قلبنا السكر.

أقولك . . . بص للكوباية كويس , ركز عنيك عليها كدا لمدة دقيقة , دوق تاني كدا.

يوووه . . . الشاي لسا زي ما هو . . . مر , بس فيه حاجة حصلت , الشاي بدأ يبرد.

طب نجرب حاجة كمان , حط ايدك على راسك , واقعد لف حوالين الكوباية , ومفيش مانع لو قعدت تدعي ربنا إن الشاي يبقا طعمه حلو.

دوق كمان مرة الشاي , لسا زي ما هو مر , بس بدأ يبرد أكتر.

رأيكم ايه في اللي فات ؟ مجرد محاولات سخيفة منافية للعقل , وهذا في محاولة حثيثة مننا لجعل كوباية الشاي حلوة.

وايه النتيجة , ضيعنا وقت , و السكر , و الشاي مش هتشربه لأنه أولا بارد و ثانيا طعمه مر.

المغزى ايه؟

هي الدنيا كدا كوب شاي مر , قدراتك ومواهبك و الخير اللي ربنا حطه جوانا , هي السكر اللي ربنا منحه لينا عشان نخلي طعم الشاي احلى , طعم الحياة حلوة.

بس طبعا عمر ما الحياة بتبقى حلوة لوحديها , لازم تحط السكر بنفسك , وبعد كدا تحركة وتفعله وتقلبه , وتخليه يملا حياتك كلها سكر في سكر في سكر.

بس . . . وهنا تظهر المشكلة , احنا حوالينا ناس متوقعة مننا حاجات غريبة , متوافقة و ناتجة عن حاجات نفسية عندهم , بيشبعوها عن طريقك , وطبقا لرغباتهم ودوافعهم هيحركوك , مرة يخلوك تبحلق و تنسى الحاجة اللي بتهتم بيها وتبقى تايه , ومرة تانية تلف حواين نفسك , وفي التالتة ياخدوا منك السكر ويدوك ملح بفلفل , ويقولوا دا حلو جرب بس.

او تطلع انت بطة , فالشاي هيفضل مر , لأنك مكسل تجيب السكر من الرف وتحط منه حبة.

خير خير خير

محدش عارف الخير فين

كل واحد عارف هو عاوز ايه , شاي مر موجود , شاي حلو موجود , دا كمان بقا فيه شاي بحليب.

واللي بيشيل قربة مخرومة بتخر على راسه.

يارب اهدي الناس كلها يارب

كان معكم شاربا شاي بالنعناع

فتوح ابو المفاتيح – قهوة الحياة – وسط البلد

عيد ميلاد ابو فصادة_كلاكيت تانية مرة

صباحكم فل

كمان ثلاث أيام بتوقيت القاهرة , يحل موعد عيد ميلاد

محمد السجاعي

فتوح ابو المفاتيح

مستر سيجا

محمد ميستر

السنادي عيد ميلادي مختلف , عشان حاجات كتيرة اوي اوي اوي

انا بقيت في مكان مختلف

عايش في مكان تاني , أنا دلوقت بقيت من اهل القاهرة الكبرى

اصحابي اللي من طنطا بقا اتصالي بيهم شبه مقطوع , اللهم إلا عبر الفيس توك و الماسنجر و رنات موبايل متباعدة

مفيش حد اثق فيه واقدر اتكلم معاه بحرية في اي وقت , و موثوقي الوحيد مش بعرف اتكلم معاه

ناس كنت متعود اتكلم معاهم وبفضفض , أو الصحيح هما اللي كانوا بيفضفضوا معايا , مبقيناش نفضفض

دايرة معارفي وسعت جدا , عرفت ناس جديدة , ناي حلوة بجد , ثقافات جديدة اتعرفت عليها , قفزات هائلة في مستوى الناس اللي اتعرفت عليهم

بمعنى اخر دنيا جديدة

بس انا لوحدى

السنة اللي فاتت في عيد ميلادي اللي فات

اهو فات سنة عليه فنتكلم بصراحة

كتبت لسته من الطلبات , مجاش منها حاجة , هو جالي حاجات آآآه , مثلا محمد عادل جابلي قلم رصاص بسنون وخاف يجيبلي واحد خشب , وجابلي كتاب لا تحزن اللي دلوقت مع جوز اختي , يلا خير , ربنا يسامحه

بس

خير خير خير

السنة اللي فاتت كنت متوقع من ناس كتيرة انهم يجيبوا ليا حاجة , مش لازم من القايمة اللي عاملها , بس حاجة وخلاص , محدش من اللي متوقع منهم جابلي.

لم اهتم بالموضوع دا خالص , بس أكتر حاجة زعلتني أطفالي , بقالهم معايا سنة كاملة , و بقينا جروب وكنا فيه اسرة واحدة , وكنت بهتم جدا انهم يعرفوا اعياد ميلاد بعضنا البعض عشان نحتفل بيها , غير كمان علمتهم انهم يرتبوا احتفاليه صغيرة لأي حد بحاجات بسيطة , يوم عيد ميلادي , محدش افتكره , ولا حتى كل سنة وانت طيب , على الرغم انهم عارفينه , يوميها زعلت زعل كبير أوي أوي , وصعبت عليا نفسي جدا , اكتر حاجة بحبها إن حد يهتم بيا , و ميحسسنيش اني نكره , المفروض إني بدي اهتمام و عندي توقع اني الاقي اهتمام , حتى لو بسيط

يويمها كتبت بوست أنا زعلان , واحد صاحبي غالي عليا قال (ودا كان عيد ميلاده) , بقا يوم ما انا آجي للدنيا انت تزعل الزعل دا كله

خير خير خير

هو انا عيد ميلادي يوم عيد الحب , يعني الهدايا من كل شكل لون متوافرة في المتاجر بس شكلها مش كيووت واللي مش لاقي حاجة طول السنة هيلاقيها في اليوم دا.

السنادي في اليوم دا أنا معزوم على عيد ميلاد مخرجة مسرح عرائس (مرحتوووش) , المفروض ان عيد ميلادها 20\1 بس هي كانت مأجلاه شوية , كنت عملت ليها الجرافيك ديزاين الخاص بمطبوعات آخر مسرحية عرايس بتعملها , وهي شايفة إن نهضة اطفال مصر هتكون على ايديا

:P

السنادي هكتب قايمة تانية من الطلبات , بكتبها دلوقت من مكتبي في الشغل , قاعد ماسك الماج بتاعي ونازل شرب في الكابوتشينو الخصوصي بتاعي اللي بصنعه عمولة (الاسبوع دا بطعم الجزر) طعمه ظريف

سؤال يطرح نفسه على الساحة

هل انا متوقع إن حد يجيبلي هدية عيد ميلاد ؟؟؟

كالمعتاد انا مش بقول لحد على عيد ميلادي لأني شايف ان دا نوع من طلب التماحيك , دا أول هام

تاني هام , مفيش حد أنا اعتقد انه يهمه انه يجيبلي حاجة في عيد ملادي , لأن علاقته معايا علاقة شغل , أو زمالة كويسة , محدش قريب مني عشان يعرف انا بحب ايه ومش بحب ايه

يعني انا مثلا مش بحب التماثيل و الكور الإزاز و الشمع و الانتيكات اللي بتتحط في النيش او على مكتب محدش بيقرب منه والحاجات دي , وشايف انها مش عمليه , وملهاش لازمة في الحياة غير انها تنكسر و نعيط عليها

أما عن أطفالي , فأنا هنا في مصر لسا مكونتش منهم ناس متصلين بيا اوي , ليا اطفال في اسكندرية , بس علاقتهم بيا . . . مش عارف , ممكن نقول عليها علاقة تكافلية , لأن سيجا ليه فايدة , لما تخلص الفايدة يبقا مالوش لازمة .

خير خير خير

نيجي بقا لقايمة الهدايا اللي عاوزها للسنادي

أولا : عاوز دلاية جديدة للموبايل , أخد الحبل بتاعها و احط فيه القلب الفضة اللي في الموبايل بتاعي , لحد ما اديه لخطيبتي ان شاء الله.

ثانيا : عاوز دلاية كمان , بس تكون طويلة , عشان احط فيها الاتنين فلاش ميموري اللي معايا.

ثالثا : عاوز شنطة حلوة خالص لفلتي (فلة دي كاميرتي الفوجي S700) تاخدها هي و الحامل الصغنووون خالص اللي جبتهولها

رابعا : عاوز اقضي ليلة بمركب في وسط النيل كل اللي بعمله ابص للسما , واقول هي فين الشمس يا عمو

خامسا : عاوز كتاب حلو اوي بيتكلم عن الإخراج السينمائي - مش حاجة تانية يا وحسين

سادسا : عاوز شال فلسطيني , مش زي اللي بيتباع على الارصفة , عاوز شال حلو جميل ولطيف وشبه بتوع الفلسطينيين

سابعا : عاوز اكل في مطعم صيني و بالعصيان بقا و نتعك وتبقا هيييصة

ثامنا : عاوز عروسة لعبة , تكون محشية كدا واموورة خالص واسميها حنة

بس كدا وخلاص

كفاية اوي , اكتر من كدا هكون طماااااع

واساسا , لو انا كترت أو قللت مفيش حاجة هتيجي

بس اهو . . . حلاوة نفس

بس خير خير خير

محدش عارف الخير فين

ملحوظة صغوونة كدا في الآخر : المقالة دي سواداوية , لأني مكتأب ومتنكد اليويمن دول , ودماغي فيها مليون كائن فضائي , جم فجأة واحتلوا المكان

بس ان شاءا لله التحرير قريب , يادوب ميكروباص من الدقي وتوصل

خير خير خير

سلاااااااام عليكم

كان معكم لابسا طرطورا

فتوح ابو المفاتيح – ربنا يهديه