كمان ثلاث أيام بتوقيت القاهرة , يحل موعد عيد ميلاد
محمد السجاعي
فتوح ابو المفاتيح
مستر سيجا
محمد ميستر
السنادي عيد ميلادي مختلف , عشان حاجات كتيرة اوي اوي اوي
انا بقيت في مكان مختلف
عايش في مكان تاني , أنا دلوقت بقيت من اهل القاهرة الكبرى
اصحابي اللي من طنطا بقا اتصالي بيهم شبه مقطوع , اللهم إلا عبر الفيس توك و الماسنجر و رنات موبايل متباعدة
مفيش حد اثق فيه واقدر اتكلم معاه بحرية في اي وقت , و موثوقي الوحيد مش بعرف اتكلم معاه
ناس كنت متعود اتكلم معاهم وبفضفض , أو الصحيح هما اللي كانوا بيفضفضوا معايا , مبقيناش نفضفض
دايرة معارفي وسعت جدا , عرفت ناس جديدة , ناي حلوة بجد , ثقافات جديدة اتعرفت عليها , قفزات هائلة في مستوى الناس اللي اتعرفت عليهم
بمعنى اخر دنيا جديدة
بس انا لوحدى
السنة اللي فاتت في عيد ميلادي اللي فات
اهو فات سنة عليه فنتكلم بصراحة
كتبت لسته من الطلبات , مجاش منها حاجة , هو جالي حاجات آآآه , مثلا محمد عادل جابلي قلم رصاص بسنون وخاف يجيبلي واحد خشب , وجابلي كتاب لا تحزن اللي دلوقت مع جوز اختي , يلا خير , ربنا يسامحه
بس
خير خير خير
السنة اللي فاتت كنت متوقع من ناس كتيرة انهم يجيبوا ليا حاجة , مش لازم من القايمة اللي عاملها , بس حاجة وخلاص , محدش من اللي متوقع منهم جابلي.
لم اهتم بالموضوع دا خالص , بس أكتر حاجة زعلتني أطفالي , بقالهم معايا سنة كاملة , و بقينا جروب وكنا فيه اسرة واحدة , وكنت بهتم جدا انهم يعرفوا اعياد ميلاد بعضنا البعض عشان نحتفل بيها , غير كمان علمتهم انهم يرتبوا احتفاليه صغيرة لأي حد بحاجات بسيطة , يوم عيد ميلادي , محدش افتكره , ولا حتى كل سنة وانت طيب , على الرغم انهم عارفينه , يوميها زعلت زعل كبير أوي أوي , وصعبت عليا نفسي جدا , اكتر حاجة بحبها إن حد يهتم بيا , و ميحسسنيش اني نكره , المفروض إني بدي اهتمام و عندي توقع اني الاقي اهتمام , حتى لو بسيط
يويمها كتبت بوست أنا زعلان , واحد صاحبي غالي عليا قال (ودا كان عيد ميلاده) , بقا يوم ما انا آجي للدنيا انت تزعل الزعل دا كله
خير خير خير
هو انا عيد ميلادي يوم عيد الحب , يعني الهدايا من كل شكل لون متوافرة في المتاجر بس شكلها مش كيووت واللي مش لاقي حاجة طول السنة هيلاقيها في اليوم دا.
السنادي في اليوم دا أنا معزوم على عيد ميلاد مخرجة مسرح عرائس (مرحتوووش) , المفروض ان عيد ميلادها 20\1 بس هي كانت مأجلاه شوية , كنت عملت ليها الجرافيك ديزاين الخاص بمطبوعات آخر مسرحية عرايس بتعملها , وهي شايفة إن نهضة اطفال مصر هتكون على ايديا
:P
السنادي هكتب قايمة تانية من الطلبات , بكتبها دلوقت من مكتبي في الشغل , قاعد ماسك الماج بتاعي ونازل شرب في الكابوتشينو الخصوصي بتاعي اللي بصنعه عمولة (الاسبوع دا بطعم الجزر) طعمه ظريف
سؤال يطرح نفسه على الساحة
هل انا متوقع إن حد يجيبلي هدية عيد ميلاد ؟؟؟
كالمعتاد انا مش بقول لحد على عيد ميلادي لأني شايف ان دا نوع من طلب التماحيك , دا أول هام
تاني هام , مفيش حد أنا اعتقد انه يهمه انه يجيبلي حاجة في عيد ملادي , لأن علاقته معايا علاقة شغل , أو زمالة كويسة , محدش قريب مني عشان يعرف انا بحب ايه ومش بحب ايه
يعني انا مثلا مش بحب التماثيل و الكور الإزاز و الشمع و الانتيكات اللي بتتحط في النيش او على مكتب محدش بيقرب منه والحاجات دي , وشايف انها مش عمليه , وملهاش لازمة في الحياة غير انها تنكسر و نعيط عليها
أما عن أطفالي , فأنا هنا في مصر لسا مكونتش منهم ناس متصلين بيا اوي , ليا اطفال في اسكندرية , بس علاقتهم بيا . . . مش عارف , ممكن نقول عليها علاقة تكافلية , لأن سيجا ليه فايدة , لما تخلص الفايدة يبقا مالوش لازمة .
خير خير خير
نيجي بقا لقايمة الهدايا اللي عاوزها للسنادي
أولا : عاوز دلاية جديدة للموبايل , أخد الحبل بتاعها و احط فيه القلب الفضة اللي في الموبايل بتاعي , لحد ما اديه لخطيبتي ان شاء الله.
ثانيا : عاوز دلاية كمان , بس تكون طويلة , عشان احط فيها الاتنين فلاش ميموري اللي معايا.
ثالثا : عاوز شنطة حلوة خالص لفلتي (فلة دي كاميرتي الفوجي S700) تاخدها هي و الحامل الصغنووون خالص اللي جبتهولها
رابعا : عاوز اقضي ليلة بمركب في وسط النيل كل اللي بعمله ابص للسما , واقول هي فين الشمس يا عمو
خامسا : عاوز كتاب حلو اوي بيتكلم عن الإخراج السينمائي - مش حاجة تانية يا وحسين
سادسا : عاوز شال فلسطيني , مش زي اللي بيتباع على الارصفة , عاوز شال حلو جميل ولطيف وشبه بتوع الفلسطينيين
سابعا : عاوز اكل في مطعم صيني و بالعصيان بقا و نتعك وتبقا هيييصة
ثامنا : عاوز عروسة لعبة , تكون محشية كدا واموورة خالص واسميها حنة
بس كدا وخلاص
كفاية اوي , اكتر من كدا هكون طماااااع
واساسا , لو انا كترت أو قللت مفيش حاجة هتيجي
بس اهو . . . حلاوة نفس
بس خير خير خير
محدش عارف الخير فين
ملحوظة صغوونة كدا في الآخر : المقالة دي سواداوية , لأني مكتأب ومتنكد اليويمن دول , ودماغي فيها مليون كائن فضائي , جم فجأة واحتلوا المكان
بس ان شاءا لله التحرير قريب , يادوب ميكروباص من الدقي وتوصل
خير خير خير
سلاااااااام عليكم
كان معكم لابسا طرطورا
فتوح ابو المفاتيح – ربنا يهديه
مبدأيا .. أطال الله في عمرك وأصلح من عملك يا باشمهندس ،،،
ردحذفثانيا .. هو عرض لطيف جدا بمناسبة عيد ميلادك ، بس المفروض تضيف للإحتياجات الموجودة دي :
عزومة لكل أصحابك اللي علاقتك بيهم أصبحت رنات متقاطعة ( بس العزومة دي على حسابك بما إنك أصبحت من ساكني مدينة القاهرة الكبرى )
صباحك سكر
ردحذفكل سنة وانت طيب
ويارب عقبال 100 مليون سنة
وتكون حققت كل اللى تتمناه
بالنسبة لــ8 هدايا هههههههههه
الموضوع كبير كبير بقى
اقولك اعمل لك حمله لجمع الهدايا وهنيا لك يا فاعل الخير و الثواب ههههههههه
و نخليها بالنص يالا ما علينا
كل سنة وانت طيب
عارف و الله بكون فرحان جدا لما احسن ان الانسان اللى بحبها فاكرة اليوم مش يهمنى انها تجيب هدية بيكفينى انهم يفتكروا و يقولوا كل سنة وانت طيبة
مش تزعل من اصحابك اللى مش بقيتوا بتتقبلوا افهم من كدا انك كنت عايش فى طنطا بقى الله دا احنا ولاد بلد واحدة اهوا لا يبقى موضوع الهدية دا بالنص بقى ههههههههههههه
يارب يكون عيد ميلاد سعيد عليك يارب
تحياتى
يويو
كل سنة وانت طيب يا محمد مستر وطبعا احنا فاكرين عيد ميلادك وعمرنا ما ننساه ولو عرفت انا مين هاجيبلك الشيكولاتة اللي انا باحبها اللي قولتلك عليها
ردحذفهو الأول انا عاجبنى أوى الدعايه اللى الأخ أو الأخت اللى قابلى ده عاملها بس المفروض يدفع عليها فلوس ولا إيه
ردحذفالمهم بالنسبه لموضوع عيد ميلاد أبو الفصاد أحب أقول انه أكيد الواحد بيزعل جدا لما يحس انه لوحده وهو الوحيد اللى فاكر عيد ميلاده ومفيش حد جابله هديه ولا حتى قاله كل سنه وانت طيب وبيبقى ممكن يزعل من كل اللى يعرفهم ويكتئب لحد ما يموت
ده ممكن
بس خلينا نفكر هو ليه محدش بيفتكر عيد ميلادك ولا بيقولك كل سنه وانت طيب
شوف انت كام واحد انت افتكرته فى عيد ميلاده وكام واحد قولتله كل سنه وانت طيب وكام واحد جبت له هديه هو فعلا كان محتاجها وكام واحد حسسته انك مهتم بيه وبمشاكله وبمناساباته الحلوه
وكام واحد آثرت مشكلته عن معاد ليك مثلا وكام مره قولت كده انا هشحن بعشره جنيه بس عشان اكلم اصحابى بتوع زمان أفتكرهم ويفتكرونى وكام مره أخدت المبادره انك تجمعهم من غير مصلحه
بس لمجرد اننا نقعد مع بعض ونفتكر الأيام اللى فاتت
وأخيرا من غير تطويل
أقولك انك لوعملت أى حاجه من اللى فاتت دى مع أحد وهو ما أفتكركش ليك حق تزعل منه وتقاطعه لأنه ما يستهالك
ولو ما عملتش كده مع حد يبقى ما لك حق انك تنتظر حتى كلمة كل سنه وانت طيب
والكلام ده مش لفتوح بس
ده لينا كلنا
وكل سنه انت طيب
باااااااااااااى
محمد الصياد
كل سنه وانت طيب
ردحذفانت الفعل ذكي وموهوب ودا يبدو قوي في ملامحك
ربنا معاك وتنجح ونشوف منك شغل يوازي ذكائك ان شاء الله
اهلا بيك في القاهره ... أتمنالك كل التوفيق
السلاااااااااااااام عليكم
ردحذفكل سنة و انت طيب يا مستر سيجا
لووول...حلوة الليست بتاعة الهدايا دي
والله ما في هدية احسن من حب الناس و .....الشيكولاتة.......دة بالنسبة لي يعني
يللا علي رأيك محدش عارف الخير فين
و سلام
اه الجمال ده ياررب في تقدم علي طول
ردحذف