فانلة سكاي

فيلم أجنبي – إنتاج 2001 – بطولة توم كروز وبنلوبي كروز (ملحوظة: اتصاحبوا و اتجوزوا بعد الفيلم) المهم . . .

قيل لي إن الفيلم تحفة , و إن الفيلم جامد و انه مستوحى من لوحة اسمها السماء بلون الفانيليا لمونيه.

قصة الفيلم ببساطة وبشكل سريع تفصيلي ممل.

واحد صايع . زير نساء (وهو بالطبع توم كروز) , قرب من الاربعينات ومازال كما هو , كل ليلة مع واحدة شكل , لحد ما وقعت في أرابيزه واحدة مجنونة , وبعد ما فضل معاها فترة صغيرة شاف واحدة تانية حلوة (من وجهة نظره) اللي هي بينولوبي كروز , وكانت صديقة صاحبه الانتيم , فبدأ يلف حواليها ويحاول يسحرها بإبتسامته الرائعة و قفاشته اللذيذة و سحره المغري و هلم جرا من أدوات إغرائه القوية (كما يفترض صناع الفيلم) وهي يا عيني المسكينة مش قادرة تقاوم و الحوار دا بدأ في نفس اللحظة اللي هو بدأ فيها الأخ كروز يطنش الأخت المجنونة.

الأخت المجنونة طبعا ولعت خالص و نار الغيرة قادت في قلبها و بدأت تمشي وراه , لحد ما قفشته تاني يوم نازل من بيت الأنسة الفاضلة بينولبي , قالت له تعالي نقضي وقت مع بعض , و لأن ديل الكلب عمره ما يتعدل راح معاها , وفي العربية اتخانقوا مع بعض , وقالت له إنها بتحبه فعشان كدا هي فكرت في إنهم يموتوا مع بعض فراحت ناطة من على كوبري بسرعة 160 كم/ساعة

الاخت المجنونة ماتت , والأخ كروز تشوه وجاله كساح في ايده اليمين , وبقا عامل زي المسخ , و فقد اسلوب و وسيلة حياته اللي بيعيش بيها و مش هيعرف يجيب بنات تاني , فيعمل ايه المسكين ؟ ؟ ؟

هنا بدأ يفرض نفسه على الآنسة بينلوبي اللي سارعت في رفضه , وبعد ما نام في الشارع ليلة قدام بيتها صعب عليها وقالت يا مسكين تعالى عيش معايا وعاشوا في تبات ونبات وراح للدطتور و ظبط ليه وشه , هو بقا بعد كدا اتجنن و جاله فصام في الشخصية , وبقا يشوفها في صورة الأخت المجنونة , فراح قتلها بوسيلة بشعة ,و دخل السجن , وقعد مع دكتور نفسي يفتكر اللي حصل.

في اخر الفيلم نكتشف انه كان بيحلم و إن الانسة بينولبي معبرتهوش اساسا بعد ما دلقته و إنه كان بيحلم بكل دا , وانه كان متجمد في تلاجة بقاله 150 سنة وكان بيحلم جواها بالحاجات اللي فاتت كلها والناس اللي كان يعرفها كلهم ماتوا.

وبح . . .

يعني أنا ضيعت ساعتين وربع 2.15 عشان فيلم قصته هايفة , بدون أي إضافة , لا تدفق أحداث , ولا أي حاجة , المعلومة اللي طلعت بيها من الفيلم على رأي واحد صاحبي اللي شافه معايا : دا توم كروز طلع بيعرف يبوس زي ما بيعرف يضرب.

لا أكثر ولا أقل . . .

أهلا بيكم وسهلا مع ابتسامة كروز الساحرة من الأذن للأذن لمدة ساعتين و ربع , وكام حركة إغراء منه للبنات المساكين.

أنا ضيعت ساعتين و ربع وانتم ضيعتم 10 دقايق تقروا المقالة الهايفة.

لا أنا استفدت حاجة سوى إني تأخرت عشان أروح البيت , ولا أنتم استفدتم حاجة سوى إن كوباية الشاي أو النسكافيه بردت

ودمتم سالمين

خير خير خير

محدش عارف الخير فين

كان معكم نادما على إضاعة وقته

فتوح أبو المفاتيح – ميكروباص طنطا – بجوار مصنع توشيبا العربي