الحب هو الاحتواء - بسكوتة

انا كده دلوقت كسرت الحظر المعمول عليا . . .انا كده كتبت مقالة . . . بس دي آخر مقالة بجد حتى أخلص الامتحانات تماما , بس انا مقدرتش مكتبش المقالة دي وانزلها مع الصور بتاعتها . . . تاني مرة بطلب السماح و دي آخر مقالة .

الدافع
لكل حاجة دوافع
في رأيي
الغرض من الحب هو إن شخص يتملكك
يحتويك
تكون ملكه (يعني بتاعه)
تديله صك عبوديتك يكون ليه للأبد


ليه بقا ؟؟
الواحد لما يكون معاه حاجة بتاعته بيخاف عليها . . . بيحافظ عليها . . . بياخدها معاه في كل حتة .
بيحب يطمن عليها
يمسحها بفوطة
يحط عليها ملاية عشان مش تلم تراب
يخاف عليها من الهوا اللي بيعدي جنبها
لو يطول يحطها جواه كان حطها . . . بس خير . . . يا خسارة مش يعرف


و اعتقد إن هوا دا الدافع اللي بيخلي حد يحب أو يفكر في الحب
انه يكون ملك لشخص آخر
يضع لجامه في يده , يقوده كيفما شاء
و اينما اراد – في أي حتة يروح وراه

خير
محدش عارف الخير فين . . .
بس يا جماعة دا رأي خاص بيا (مستر فتوح) .
فيه كلمة انا اعتز بها جدا
وحاططها قدم عيني دايماً
"الحب هو الاحتواء . . . أن تحتوي أحد أو أن يحتويك"


الحب هو الاحتواء
تاخده جواك
الحب
مش بس بتكلم عن حب الرجل لزوجته


لأ
انا بتكلم عن الحب عموماً
حب ربنا لينا , وحبنا لربنا
حبنا لسيدنا و معلمنا ورسولنا ونبينا محمد صلى الله عليه وسلم
وحبه لينا وخوفه علينا

حب ماما ليا وحبي ليها


حب الأم لولادها

, وحب الأب لأولاده

, وحب الصديق لصديقه


, وحب الشخص لكرسيه و الموبايل بتاعه و سريره وغرفته


, حب الشخص للشغل بتاعه و المشروع اللي شغال فيه



, حبك للدكتور اللي علمك

, وحبك للأطفال اللي انت بتربيهم وتعلمهم , وحبك لحبهم ليك وطريقة نداهم لأسمك


الحب في ذات نفسه
شعور دافي رائع جميل , بتحس جواه بمشاعر كتيرة , دفيان وسقعان في نفس الوقت , بس سقعة حلوة لذيذة , اللي تخلي جسمك يقشعر , اللي تخليك مبسوط و بتتنطط في كل مكان حواليك .
المشاعر اللي تخليك في عز ما انت زعلان , تبتسم وتضحك , وتخليك تبص لكل المواقف اللي حواليك و تضحك منها و تبقى مبسوط منها حتى لو كانت مواقف سودة وزي الزفت .

الواحد لما بيحب , بيبقى عليه إطار و غشاء من الروعة و الجمال و البهاء , تلاقيه ماشي بيلمع في كل حتة , لدرجة انه ممكن يوصل انه ينور و هو ماشي , يوزع نور وسعادة حواليه و هو بيتحرك .

ما هو خلاص دا شخص شعر بالحب واحس بيه , واحيط به , مفيش حاجة هتوصله , بقا عارف سكته ومصيره وهو ناوي يعمل ايه , محدش قده , ربنا يسعده ويهنيه كمان وكمان .


آآآآآه

ربنا يوفقنا جميعا و يهدينا لكل حاجة فيها الخير و الهنا و السعادة ويوفقنا لآخرتنا ولكل حاجة تساعدنا فيها
يااااااااارب



لقيت لكم قصة انجليزي حلوة
هي كانت مترجمة , بس انا عربتها بأسلوبي
بتتكلم عن سببية الحب

اسباب الحب (معرب بتصرف كتييير)

المرأة : عاوزة اعرف انت ليه بتحبني ؟ ايه اللي خلاك تحبني ؟


الرجل : مقدرش اقولك سبب معين . . . بس انا فعلاً بحبك .


المرأة : انت متقدرش حتى تقولي السبب !! امال ليه بتقول انك بتحبني وانت مش عارف السبب ؟
الرجل : بجد صدقيني . . . انا مش عارف سبب غير إني بحبك موووت .


المرأة : لأ مليش دعوا . . . لازم اعرف السبب . . . جوز صاحبتي دايماً بيقولها هو بيحبها ليه . . . ولا انت متعرفش ؟

الرجل : خلاص خلاص .. انا بحبك لأنك حلوة جدا - صوتك رائع - ولأنك مهتمة بيا وبتحبيني - ولأنك دايما مليانة أمل وتفاؤل - ولأن ضحتك دي اجمل ضحكة في العالم - وبعشق كل حركة بتعمليها و كل خطوة بتمشيها




لسوء الحظ .. بعد بضعة ايام حصل للمرأة حادث بليغ واصيبت فيه اصابات بالغه
عندما اتى زوجها لزيارتها .. وضع بجانبها رسالة قصيره كتب فيها




زوجتي العزيزة :

لروعة صوتك احببتك ..ولكن الآن هل تستطيعين الكلام؟

كلا

اذن . . . أنا لا استطيع ان احبك .

ولإهتمامك بيا و حبك ليا .. احببتك ، ولكن هل تستطيعين اظهار هذه المشاعر الآن ؟

كلا

اذن . . . فأنا لا استطيع ان احبك .

ولضحكتك الرائعة .. احببتكِ .. و لكل حركة تتحركينها كنت احبكِ

ولكن .. الآن

هل تستطيعين الضحك ؟ ؟ ؟ هل تقدرين على الحركة ؟

كلا

لهذا السبب فانا لا استطيع ان احبك .

زوجتى العزيزة ।

لوكان الحب يتطلب أسباباً . . . فأنت الآن لا تملكي أي سبب لكي أحبك من أجله

إذن ..فهل يحتاج الحب أسباباً ؟؟..أبداً

فأنا لا أزال احبك . . . وسأظل أحبكِ ماحييت . . . زوجتي الحبيبة

عيد أضحى سعيييد

تصميم صغنون هدية بمناسبة العيد
للتحميل اضغط هنا
على فكرة دي مش مقالة , دا تقرير حالة و تهنئة بالعيد فقط برده

الله اكبر الله أكبر
لا إله إلا الله
الله الله الله اكبر ولله الحمد
الله أكبر كبيرا
والحمد لله كثيرا
وسبحان الله وبحمده بكرة واصيلا

دي كانت تكبيرة العيد اللي بديت بيها اليوم النهاردة
النهادرة يوم عيد رائع بشدة وبشكل رائع
النهاردة روحت بدري للصلاة بعد صلاة الفجر مباشرة
صليت في النادي (خلا على رأي الأخوان)
وقعدت اكبر , وبعزم ما فيا بكبر , أصلي بستنى العيد ييجي عشان أكبر , دا انا حتى سعات لما ببقى قاعد لوحدي في البيت بقعد أكبر , بحب التكبير جدا , بحس إني رايح أجاهد , داخل على العدو وبرعبه بالتكبير و التهليل بتاعي , وحش داخل عليهم , ديناصور مفترس , عاااااااااااااو .
المهم , النهاردة و لأول مرة في حياتي صليت صف تاني في صلاة العيد ورا الإمام , وأنا سعيد ومبسوط عشان كده .
طلعت من الجامع لفيت في النادي شوية أسلم على الأصدقاء والأصحاب , وقد كان و بسبب روعة اليوم قابلت 3
من أطفال الرائعين , من أحب الأطفال ليا , هما كمان عندهم مستر سيجا دا حاجة جامدة جدا .
عندكم مثلا نسمة ,اسم على مسمى , بتعشق مستر سيجا (وهو كامن برضه) , تجيب اسكوتر جديد تيجي تفرجه لمستر سيجا وتخليه يلعب بيه , واحدة صاحبتها جاية جديد تيجي تفرجها المستر بتاعها وتقولها بكل فخر "مستر سيجا" وشوية حاجات كتير قوي كده ودي صورتها .



عندكم نورهان , نورهان دي عشرة عمر , درستلها 3 سنوات ورا بعض , تلفونات ورنات , مستر سيجا دا مثلها الأعلى , أول ما توصل تروح تيجي تقف جنب مستر سيجا (دا لو لمحها و هي داخلة) , أما لو مشفهاش تيجي من ورا ضهره وتغمي عنيه وتقوله "أنا مين" , وتقعد تفعص في عنيه لحد ما يعترف انه مش عارفها مع انها عارفة انه عارفها , نورهان مؤلفة قصص درجة أولى , ولما تيجي مروحة تيجي تسأل مستر سيجا "أنت مروح؟" يقولها لأ كمان شوية فتقول "طب انا مستنياك نروح مع بعض" وتفضل قاعدة مستنياه , كفاية تفاصيل عليكوا دي صورتها .



آخر واحدة وأجن واحدة شيرين , أو شيري كما اخترعت لها اسماً , شعنونة مجنونة , عندها برضه داء تفعيص عنين مستر سيجا , وضربه , وخصوصا مستر سيجا مش بيعتقها , عندها ضفيرة طويلة كل ما تيجي يروح شاددها منها , تقعد تتنطط ومش تهدى غير لما تشد شعره , رسامة بريمو من الطراز الأول , وبتلعب نط الحبل ويا مستر سيجا , واجري وانا اجري , وشوية حاجات تانية كتيير , هذه هي صورتها .



روحت بعد كدا من النادي وانا مزداد سعادة , وقلت آخدها مشي لحد البيت , اصلي كنت عاوز أجرب حاجة خدناها في الفقه زماااان , وانا في ابتدائي , بيقولولك روح من سكة وروح من سكة تانية عشان تسلم على الناس الماشية وتقابل ناس أكتر , فأنا اتخذت قرار إني أروح من سكة تانية واسلم و اعيد على كل واحد اقابله في الشارع , ولقد كانت تجربة جاااااااامدة جدا , دا كان فيه ناس ماشية كتئبة ولقيتها انبسطت لما سلمت عليها , وفيه ناس مردتش عليا , ناس يدوبك حركوا بقهم بكلام غير مفهوم (شكلهم كانوا بيشتموني) .
وانا ماشي قلت فيه حاجة معملتهاش , فيه حاجة معملتهاش , افتكرت , عزمت نفسي على واحد فيروز أناناس وصلحه , أخذت الزجاجة وفتحتها ورميت الغطا في الشارع , ساعها افتكرت انه غلط رمي الزبالة , روحت موطي وجايب الغطا و حطيته في جيبي لحد ما اقابل سلة زبالة (وما أقلهم أو انعدامهم) , شربت الفيروز تاتا . . . تاتا وأنا شديد الانشكاح , وبعد كده روحت على البيت .



المفروض النهاردة هنروح نذبح الديناصور اللي احنا جايبنه عشان العيد (جاموسة) ويا ولاد أعمامي , روحنا وصلنا البد , خدنا فيها لفة , وسلمنا على كل أو لنقل معظم قرايبنا , وأكلت فول سوداني وحلبة نابتة و تمر و شوكلاتة وشربت شاي وحلبة لحد ما شارفت على الانفجار , بدأنا عملية الدبح الساعة اتنين ظهرا .



وصف عملية الذبح (الفافي يمتنعون) :
إحنا عندنا في العيلة مش بنجيب حد يدبحلنا , إحنا اللي بنخلص , كان قائد عملية اليوم هو ابن عمي "عبدو" , كنا متواجدين في المكان تبع عمي السعودي بنسموه الجرن , قمنا على الجاموسة عشان نربطها , فارحت جريت وقعدت تلف وتجري جوا الجرن واحنا نجري وراها لحد ما عبدو مسكها .
(على فكرة أنا شاركت في عملية الذبح)
ايه بقا اللي هيحصل , في الأول بنربط رجول الجاموسة بحبل ونشده عشان نعرف نكعبلها ونيمها على جنبها ,انا كنت ماسك ويا ابن عمي رضا كتفها الأمامي وجوز عمتي كان ماسك راسها .
المهم , قام عبدو بدوره وطرطش الدم على هدومي ووشي أنا ورضا , كان منظرنا خراااافي , كأننا مصاصين دماء أو طالعين من مذبحة في العراق .
في مرحلة في النص بلاش احكيها عشان دي متعبة نفسيا .
بعد كده بنمسك البقرة من رجولها الاربعة ونوقفها على ضهرها (انا كنت ماسك رجل لوحدي) , بدء عبدو ويا اخيه محمد في سلخ الجاموس , وفي الآخر سلختلي حتة أنا كمان .
بعد كده بتتوالي المراحل لحد ما وصلنا وأنا و خالد ابن عمتي ماسكين قطع الحمة وبنقطها حتت صغيرة عشان تتوزع اكياس , خلصت العملية دي الساعة 8 ليلا , ونورنا الكشافات عشان نعرف نشتغل وكانت هيييصة .
بس بجد كان يوم رائع , خرافي رهيب , بجد بجد يوم الدبح ده بيبقى حاجة حلوة خالص (إن شاء الله السنة الجاية يكون ليا اضحيتي لوحدي) , اشمعنا اعمامي , السنة الجاية اشتغل و اضحي .
روحت البيت آخر اليوم وانا مرهق تماماً , دور البرد اللي انا خدته في (يوم مسحت السُلَمَ) زاد عليا قوي , وبقت حالتي صعبة وصوتي مش طالع ودماغي بتلق وعمال أكح وبلغم وهييييصة , ربنا يستر .
خييير أوي .
على هذا انتهى أول ايام العيد بعشوة حلوة في البيت عندنا وكان خطيب اختى موجود هو كمان , و افترسنا وليمة من الكبدة والفشة والقلب و الحاجات دي محمرة بس خرافية . . . اتفضلوا (عزومة مراكبية محدش ييجي) .
سلااااام وكل سنة وانتم طيبين

كان معكم جزاراً
فتوح أبو المفاتيح - ملطخا بالدمااااء

يوم مسحت السُلَمَ

على فكرة دي مش مقالة , دا تقرير حالة و تهنئة بالعيد فقط

النهاردة الوقفة وكل عام وانتم بخير وبصحة وسعادة و ربنا يعود علينا بكل خير كل سنة , وبكره (غداً) أول أيام عيد الأضحى (هو المفروض دلوقت بقينا بكره , بس عشان انا لسه صاحي ومش نمت بفترض إن إحنا لسه النهاردة) .
و بمناسبة هذه المناسبة السعيدة , قمت بعمل بطولي و هو (مَسحُ السُلَمَ) بتاع البيت اللي انا قاعد فيه (البيت الجديد) , هو عبارة عن دور اول وأرضي ,لأحسن تفتكروا اني قمت بعمل خارق للعادة (دي رابع مرة امسح فيها هذا السلم) بس دي اول مرة امسحه فيها منذ جاء جيراني اللي فوق .
المهم . . . بدأت هذه العملية الخطيرة شديدة السرية (محدش فيكم يخبص عليا) باني حطيت ستاتيو ماسج في الياهو "ادعولي يا جماعة عما امسح السلم دلوقت انا مش على الجهاااز" .
طلعت برا وشمرت رجلي اليمين و دراعي اليمين وبس , بدات بالكنس طبعاً , بعد كده مسحت السلم كله كله بـ 8 أسطال من المااء (سطل=دلو=جردل) يعني بالضبط 80 لتر مااء من ماء النيل الحكومي (إحنا في المنطقة بنسحب من بير جوفي- مش بير ارتوازي) .
دي أول مرة أعرف إن مسح السلم بيعور , أنا ايدي من ناحية صباعي الكبير (الإبهام) اتعورت من اثر مسكة المساحة (الممسحة) وتحريكها لفترة طويلة (ايه ده , دا انا طلعت فافي) . . . دي كمان ورمت , ربنا يستر .
المهم . . . أنا مسحت السلم بطريقتين , الطريقة الأولانية خصصتها للسلالم نفسها (النوايم بتوع السلم) , ووصفي لهذه الطريقة (يجري الماء ويجري ويأخذذ ما امامه ويجري) .
طلعت ومسحت من الدور الأول لحد تحت خالص بالمساحة لحد ما وصلت للمدخل .


المدخل بتاعنا حاجة كبيرة (3.5متر في 10متر) , دا بقى مسحته بالطريقة المعتادة , تدلق المياه مرة اولانية وتمسح , ثم تدلق الميه مرة تانية وتمسح , وهكذا تحصلون سيداتي آنساتي على أرضية أكثر نظافة و أكثر بريقاً (تصفيق حاد) , وصلنا بقى لقدام العمارة , استخدمت معاه نفس النظام الأولاني بتاع (و هو يجري وأنا اجري) مسحته بـ 3 أسطال من الماء الصافي .
بعدما خلصت المدخل , أبص على السلالم ألاقي عليها مية متجمعة و مش نضيفة .


هنا فهمت نقطة مهمة جداً لطالما حيرتني و أثارت فضولي , ليه أم كلبظ (عشان انا بس مش عارف اسمها) لما تيجي تمسح السلم عندنا في البيت القديم (عمارة 6 ادوار) بتمسح عادي الأول وبعد كده تمسح بخرقة (خرقة=حتة قماشة) ؟؟
الله يرحمك يا ام كلبظ , روحت دخلت الشقة , جبت خرقة ومسحت بيها السلم , من فوووق لحد تحت تاني , وانا عمال اقول "آآآآه يا ضهري" .
آآآه نسيت أقولكم إني زعفت سقف وحيطان المدخل عن طريق النط . . . كانت لعبة حلوة أوي أوي , لازم تجربوها .
الحمد لله انتهيت من مهمتي الجبارة بنجاح , ودخلت الشقة وقلت لازم اكنس وامسح الصالة , روحت طلعت فوق عند الجيران واستلفت منهم مقشتهم (لا تعتقدوا إني رنيت عليهم الجرس الساعة 2 الفجر عشان مقشة) هي كانت قدام باب الشقة , أصلي حرقت المقشة بتاعتي على البوتجاز (ومحدش يسألني ليه) , إن شاء المولى اشتري مقشة جديدة .
الحمد لله انتهت الجولة الأولى , وقلت آخد رست حتى غد وابدأ الجولة التانية .


على فكرة أنا عمال اعطس و شكلي خدت برد ودور انفولنزا وحش اوي , آآآه دماغي مصدعة وبتلق , انا ادوار البرد بتاعتي وحشة خالص , استر يا رب , انا ورايا مذاكرة ومش ناقص نوم في السرير .
بس الحمد لله السلم انتهى على خير و بأمان و بدون خسائر في الأرواح , ووصل لبر الأمان بقيادة الربان كابتن طيار عقيد مجاهد فاتح غازي فتوح بن أبي المفاتيح المان ابن الجان .
على فكرة المهمة اللي فاتت من كنس وتزعيف (من فعل زعف) ومسح السلم و المدخل خد مني بالضبط 58 دقيقة و 38 ثانية فقط , عشان تعرفوا مقدار العمل البطولي الذي بذلت . . . أنا دلوقت اروح بقا البيت القديم , عشان افطر , أصلي فطرت النهاردة على طنجرة (حلة) استلفتها من جيراني , وعملت فيها مكرونة (اندوغي) و أكلت 3 تمرات لقيتهم برضه عندي (انا مش عارف ايه حكاية التمر اللي بلاقيه كل شوية دا) و 2 كوباية شاي و 450 مللي لتر مياه , اعتقد كفاية كدا عليا .


سلاااااااام
كان معكم مبتلةً رجله اليسرى
فتوح أبو المفاتيح – هيذبح العجل بكرا

إضحك مع الحكومة

د/ علي مصيلحي وزير التضامن و فلوس الدعم يعلن "الدعم لن يصل إلى مستحقيه إلا بعد حصر الفلاحين اللذين لا يمتلكون و العمال اللذين ليس لهم عناوين إقامة" ।

يعني حضرة الضاكتور ناوي يشيل الدعم من على العيش و أنابيب البوتجاز و بطاقة التموين , ودا طبعا نوع من أنواع السياسات الحكيمة بتاعة الحكومة ذات الرؤية الصائبة و الاهداف البعيدة و المعاني الغائرة و الكلام اللي بين السطور و الحاجات اللي احنا الشعب المسكين منكوش الشعر ضعيف الفكر و العقل منقدروش نفهموها .

انا قعدت اسبوع بحاول أفهم مقدرتش , لحد ما نزل على دماغي الوحل , فساعتها انا فهمت , طلعنا إحنا مش فاهمين الرجل عاوز يعمل ايه .

الراجل ناوي (والنية لله طبعاً) يموت الناس الفقرا و المعدمين و اللي مش لاقية تاكل بحسرتها كلهم (نفر نفر) , هوا دا قصده من حصرهم , أي أن يموتهم بحسرتهم , وهو كده هيقدر يعدهم كويس , و يعرف التعداد الصحيح ليهم , و بالتالي هيوفر الدعم بطريقتين :

1- لن يذهب الدعم إلى غير مستحقيه , عشان إحنا خلاص بقينا عارفين مستحقيه .

2- لن يذهب الدعم لأي حد لأن مستحقيه خلاص ماتوا (ربنا يرحمهم) – الفاتحة يا جماعة على روحهم .

وطبعاً من مكاني هذا , ومنبري هذا , ومقعدي هذا , و جهازي هذا , وشقتي هذا (برضه) , ابعث ببرقية وخطاب و أشدله تلغراف تهنئة وتأييد و إشادة بذكاء و حكمة وعبقرية حكومتنا الرشيدة (زي معزة بكار) و على رأسها الضاكتور وزير الدعم , فياريت يا جماعة اللي فهم قصد الراجل الطيب دا يشاركني في بعث هذه البرقية , وييجي يشد مع التلغراف اصله تقيل أوي ومش راضي يتشد .

خير . . . خير . . . محدش عارف الخير فين .

نقل لكم الخبر و ما ورائه

فتوح أبو المفاتيح – عاضاً في رغيف عيش

ربي له في كل شئ حكمة

كتبت في يوم الأربعاء, 05 ديسمبر , 2007

لا إله إلا الله وحده لا شريك له له الملك و له الحمد يحيي و يميت و هو على كل شيء قدير .

النهادرة حصل موقف صعب جدا , حاجة غريبة جدا ً أول مرة اخبرها و اجربها .

اللي حصلي النهاردة حاجة اقرب للبسترة , يسخن أوي اوي و فجأة بكل ما تعنيه كلمة فجأة من معاني يتبرد , اتحط في صندوق مليان تلج أو انفتح على اسطوانة نتروجين سائل , ايون هوا نيتروجين سائل .

النهاردة الصبح كنت في غاية السعادة أو بعمنى آخر منشكح لدرجة إني ممكن أنفجر من الفرح , و فجأة وصلني خبر إن الدكتور بتاعي في الكلية أخته الوحيدة (آخر شخص في عائلته) ماتت النهاردة الصبح .

فجأة لقيت مؤشر الفرح عندي تدنى , الصبح كنت بضحك لكل حاجة , و ابتسم ابسامة واسعة جدا لكل واحد اقابله , و عمال أحضن في زمايلي أحضان جامدة لدرجة إن مجموعة منهم ظنوا بعقلي الظنون . . . دلوقت بقيت عادي , آ ه صحيح مبسوط , ولكني أشعر ايضاً بحزن شديد على د/علاءو ما حدث له .

روحت أنا و اتنين من زمايلي (اسلام والصياد) نحضر الدفنة واستنينا لحد العزا , طول اليوم أنا عمال أفكر ليه دا حصل , في العزا ادركت الفكرة , عرفت حكمة ربنا من اللي حصل النهادرة .

الحكمة من اللي حصل النهاردة :

قال ربنا سبحانه وتعالى ("كل من عليها فان ويبقى وجه ربك زي الجلال و الإكرام") .

فيه حديث عن سيدنا النبي عليه الصلاة و السلام رواه ابن مسعود :

("اضطجع رسول الله صلى الله عليه وسلم على حصير فأثر في جنبه فقيل له الا نأتيك بشيء يقيك منه فقال مالي وللدنيا انما أنا والدنيا كراكب استظل تحت شجرة ثم راح وتركها ") .

وانت شغال دوما افتكر الجنة , وانت بتحلم احلم للجنة , حاول في كل نواياك انها تكون للجنة , الحمد لله النهادرة و أنا فرحان كنت فرحان للجنة , بس جه اللي حصل بعد كده عشان يصحيني و يركزلي على الموضوع . . . كل حاجة بتحصل حوالينا ليها حكمة عند ربنا , بس مين يشوف و مين يقرا و مين يفهم , معظمنا بياخد لموضوع بغشومية ومن غير تفكير .

اللهم ارزقنا الهدى و التقى و العفاف و الغنى .

اللهم اجعل ذريتنا عونًا لنا على طاعتك .

ياااااااااااااااارب

سلام عليكم

اسبوع افضل صديق

هل تعلم العلاقة بين عينيك ؟

فهما ترمشان معاً. وتتحركان معاً . وتبكيان معاً. وتريا الأشياء معاً. وتنامان معاَ. ومع ذلك لا يرون بعضهم......فيجب ان تكون الصداقه كذالك

فالحياة مثل الجحيم بلا اصدقاء.

فهذا هو اسبوع افضل صديق

من هم افضل اصدقائك؟

ارسل هذة الرساله لكل اصدقائك المقربين

حتى إن كنت أنا واحداًمنهم

وانتظر كم رساله ترد لك

هؤلاء هم أفضل اصدقائي

لم أضعهم بالترتيب

اي موضوعين بترتيب عشوااائي

هنا دي دعوة لكل واحد انه يعمل قايمة بأصدقائه ويبلغهم انهم في القايمة دي

كل واحد في القايمة بتاعتي يكتب و يقولي انه عرف انه في القايمة بتاعتي

كل واحد مش في قايمتي يكتبلنا و يقولنا انه عمل لنفسه قايمة وبلغ اصحابه

يارت كلنا نفتكر أصاحبنا و نسأل عليهم

خير

محدش عارف الخير فين

نبدأ بأحلى وأروع صديق ليا

......

....

...

..

.

0-فرح الفطاطري (فرختي)

1-أحمد عزايم (صديكي الصدوك)

2-إسلام قطب (إسلام سيرة)

3-محمد الصياد (تعالى ورايا نعمل توافق اجتماعي)

4-محمد ثروت (أمممم)

5-محمد ابو الدهب (أبو دودو-ريد آليرت ماينر)

6-محمد الكيلاني (كل شوية بيتوه)

7-مالك سمير (فلانتينو)

8-عمرو الحو (بقى فلانتينو)

9-أحمد ماضي (كان فلانتينو)

10-محمد أبو راضي (تيجي نروح السيما)

11-مؤمن بي إم دبليو (فوركس)

12-بهاء يوتوبيا (السفير الأمريكي)

13-محمد ابراهيم (الشاعر اللي نفسه يغني)

14-محمود إعدادية (الحزب الوطني)

15-بسكوتة (محدش له دعوا بيها)

16-بشمهندس محمد علي (منقذي من النكبات)

17-عبد الوهاب (عبدو)

18-أيمن بهجت (عبقرينو-كاره الهندسة المدنية -واضع اسم خيالي)

19-ابراهيم ابن خالتي (لاعب الجيمز الأول)

20-رضا ابن عمي علي (كان طخين ورفع)

21-محمود ابن عمي السعودي (كان نفسه يخطب بنت عمي)

22-محمود ابن خالتي (حودا -كان دماغ و الجواز طيرها)

23-مصطفى الزنتوووت (توت توت يا زنتوت)

24-محمد عادل (اللي بالي بالك-ألمانيا)

25-أحمد بتاع النت (مع اني عاوز اقتله)

26-الشيخ محمود (جارنا-وكان بتاع نت من زمااان)

27-عمرو السنيطي (خليفة المسلمين-هو حاجزلي وزارة الخارجية)

28-إسلام حجازي (العراقي-محب صدام)

29-أحمد عمارة (مستر احمد بيت)

30-وائل سند (متعصبونيش)

31-د/علاء الشرقاوي (ربنا يكون في عونه)

32-عمرو دياب (كان يساري ورجع لعقله)

33-محمد سعد (سعسع-يامزيت يا مشحم)

34-محمد حمزة (برضه مزيت ومشحم-بترووول)

35-محمد رفعت (فاكر مستر ياسين لما كان بيطلع من غير لا قميص ولا فانلة في الدرس-إعدادية)

36-أحمد الفقي (أحمد الفيل)

37-هيثم صلاح الدين (مهندس ديكور-مترجم-استاذ جامعة-مبرمج-مخترع-صناعات غذائية-رئيس نادي علوم المنصورة)

38-أحمد محمد حجازي (طيييييييييييييييييب-ونفسه في اصحاب)

39-أحمد مطاوع (استاذي)

40-عصام درويش (واخد اسكتشه ولسه مرجعتوش)

لو

لو عايز تعرف ربنا بيحبك اد ايه؟
شوف هو بيحطك فين و بيختارك فى ايه؟
متتعبش من الشغل وتقول انا تعبت
لأ افرح بيه
واعرف ان دي مهمة ربنا بيستخدمك فيها
وقول ياااااااااارب
وربنا يوفقنا ويوفقك

رجااااااااء

سلام عليكم
كيف حالكم
معذرة شديدة وكبيرة شوية
المفروض كنت انزل لكم ३ مقالات النهادرة
بس حصل خير إني مشغوووووول جدا جدا
ممكن افضى على يوم الجمعة
بس خير
ادعولي أوي
لأني سعيد
ونفسي تجربوا السعادة اللي أنا فيها
سلاااااام

تحتح أبو التتاتيح

لا يوجد وقت للعيش بسعادة - إصدار جديد

نحن نقنع أنفسنا بان حياتنا ستصبح أفضل بعد أن نتزوج، نستقبل طفلنا الأول، او طفلا أخر بعده
ومن ثم نصاب بالإحباط لان أطفالنا مازالوا صغارا، ونؤمن بان الأمور ستكون على مايرام بمجرد تقدم الأطفال بالسن، ومن ثم نحبط مرة أخرى لان أطفالنا قد وصلوا فترة المراهقة الآن، ونبدأ بالاعتقاد بأننا سوف نرتاح فور انتهاء هذه الفترة من حياتهم.

ومن ثم نخبر أنفسنا بأننا سوف نكون في حال أفضل عندما نحصل على سيارة جديدة، ورحلة سفر وأخيرا أن نتقاعد.

الحقيقة انه لايوجد وقت للعيش بسعادة أفضل من الآن، فإن لم يكن الآن، فمتى إذاً؟

حياتك مملوءة دوما بالتحديات، ولذلك فمن الأفضل أن تقرر عيشها بسعادة اكبر على الرغم من كل التحديات.
كان دائما يبدو بان الحياة الحقيقية هي على وشك أن تبدأولكن في كل مرة كان هناك محنة يجب تجاوزها،
عقبة في الطريق يجب عبورها، عمل يجب انجازه، دين يجب دفعه، ووقت يجب صرفه كي تبدأ الحياة.

ولكني أخيرا بدأت أفهم بان هذه الأمور كانت هي الحياة.
وجهة النظر هذه ساعدتني أن افهم لاحقا بأنه لا وجود للطريق نحو السعادة.
السعادة هي بذاتها الطريق ... ولذلك فاستمتع بكل لحظة.

لاتنتظر
أن تنتهي المدرسة، كي تعود من المدرسة، أن يخف وزنك قليلا، او أن تزيد وزنك قليلا، أن تبدأ عملك الجديد، او أن تتزوج، أن تبلغ مساء الجمعة، أو صباح الأحد، أن تحصل على سيارة جديدة او على أثاث جديدة، أن يأتي الربيع أو الصيف أو الخريف أو الشتاء، أو تحل بداية الشهر أو منتصفه، أن يتم إذاعة أغنيتك على الراديو، أن تموت، أن تولد من جديد، كي تكون سعيدا

السعادة
هي رحلة وليست محطة تصلها، لاوقت أفضل كي تكون سعيدا أكثر من الآن، عش وتمتع باللحظة الحاضرة " القائل مجهول "

الآن فكر واجب على هذه الأسئلة:
1- ما أسماء الأشخاص الخمسة الأغنى في العالم؟
2 - ما أسماء ملكات جمال العالم للسنين الخمس الماضية؟
3 - ما أسماء حملة جائزة نوبل للسنين العشر الماضية؟
4 - ما أسماء حملة اوسكار أفضل ممثل للسنين العشر الماضية؟
لاتستطيع الإجابة؟ أنها اسئلة صعبة اليس كذلك؟
لاتخف، لا احد يتذكرهم جميعا.
التهليل يموت ويختفي ويضمحل
الجوائز يسكنها الغبارو الفائزون يتم نسيانهم بعد فترة قصيرة

الآن اجب عن هذه الأسئلة:
- 1 أعط أسماء ثلاثة أساتذة اثروا عليك في حياتك الدراسية.
- 2 أعط أسماء ثلاثة أصدقاء وقفوا معك في وقت شدتك.
- 3 فكر في بعض الأشخاص الذين جعلوك تفكر بأنك شخص مميز.
- 4 أعط أسماء خمسة أشخاص يعجبك قضاء وقتك معهم.
هذه الأسئلة أسهل من تلك، أليس كذلك؟

الأشخاص الذين يعنون لك شيئا في الحياة، لا احد ينعتهم بأنهم الأفضل في العالم، ولم يفوزوا بالجوائز وليسوا من أغنى أغنياء العالم.
هؤلاء هم الذين يهتمون لك، ويعتنون بك، ويتحدون الظروف للوقوف إلى جانبك وقت الحاجة.
فكر بهذا للحظة الحياة قصيرة جدا
وأنت، إلى أي مجموعة من المجموعتين أعلاه تنتمي؟

دعني أساعدك
أنت لست من ضمن أولائك الأكثر شهرة في العالم، ولكنك احد الأشخاص الذين تذكرتهم
عندما رغبت في كتابة هذا الموضوع لهم।
في وقت مضى، كان هناك تسعة متسابقين في اولمبياد سياتل، وكان كل المتسابقون معوقون جسديا أو عقليا، وقفوا جميعا على خط البداية لسباق مئة متر ركض.
وانطلق مسدس بداية السباق، لم يستطع الكل الركض ولكن كلهم أحبوا المشاركة فيه.
وأثناء الركض انزلق احد المشاركين من الذكور، وتعرض لشقلبات متتالية قبل أن يبدأ بالبكاء على المضمار.
فــسمعه الثمانية الآخرون وهو يبكي.
فابطأوا من ركضهم وبدأوا ينظرون إلى الوراء نحوه.
وتوقفوا عن الركض وعادوا إليه .. عادوا كلهم جميعا إليه.
فجلست بجنبه فتاة منغولية، وضمته نحوها وسألته: أتشعر الآن بتحسن؟
فنهض الجميع ومشوا جنبا إلى جنب كلهم إلى خط النهاية معا.
فقامت الجماهير الموجودة جميعا وهللت وصفقت لهم، ودام هذا التهليل والتصفيق طويلا
الأشخاص الذين شاهدوا هذا، مازالوا يتذكرونه ويقصونه.

لماذا؟
لأننا جميعنا نعلم في دواخل نفوسنا بان الحياة هي أكثر بكثيرمن مجرد أن نحقق الفوز لأنفسنا.
الأمر الأكثر أهمية في هذه الحياة هي أن نساعد الآخرين على النجاح والفوز، حتى لو كان هذا معناه أن نبطئ وننظر إلى الخلف ونغير اتجاه سباقنا نحن جميعاً - أنا وأنت ।

قرأها لكم بسرعة بسرعة
فتوح