الاثنين، يناير 04، 2010

انتا مسافر ليه


سؤال مهم جدا . . . نادراً ما حد فينا بيجاوب عليه بصراحة

او ممكن نقول انه نادرا ما حد مصري سافر برا مصر سأله لنفسه وجاوب عليه بصراحة و التزم بالصراحة دي.

أنا حاليا تم اعتباري من المغتربين , سافرت برا مصر , روحت ليبيا اشتغل هناك , ضمن فريق مصري للاشراف على مشروع ما.

قبل ما اسافر سألت نفسي السؤال دا , و بإجابته اقنعت نفسي بالسفر , وعليه سافرت وسبت مصر . . . حبيبتي.

و وصلت ليبيا وقعدت في ليبيا , مكانش في بالي انا هرجع امتا, اهم نقطة في السؤال دا انك تعرف الاجابة دي , لحد امتا هتفضل برا؟

اوك انت مسافر تجيب شقة , انت مسافر عشان تتجوز , انت مسافر عشان كذا , طب ايه بالضبط اللي انت عاوزه عشان تعمل الموضوع دا , مش مجرد أنه زمن مفتوح بلا نهاية.

كنت بكلم واحد من المصريين , لسا واصل , سألته "انت ناوي تقعد هنا قد ايش؟" قالي معرفش انا جاي هنا عشان احوش فلوس عشان اتجوز , سالته "طب انت عاوز كام؟" ولا هي كدا ملهاش اخر؟

فضل ساكت شوية محترمين كدا وقال:

كل اللي يجيبه ربنا كويس , حد يرفض الزيادة؟

المشكلة ان الواحد لما بيوصل هنا بيمتلكه الطمع , انا شوفت واحد شغال هنا في ليبيا , قاعد في مكان اقل ما يقال عنه انه قذر , الراجل دا بقاله عشرين سنة , وبيقبض كويس جدا , ولاده كلهم اتخرجوا من كليات محترمة , جوزهم واشتغلوا وعنده عمارة بس بينزل مصر كل سنتين مرة واحدة و بيقعد بكتيرها اسبوعين , طب انت قاعد هنا ليه ؟ ما تروح بلدك اقعد وسط ولادك و احفادك , دا حتى انت هنا مبهدل نفسك و مهملها لأقصى درجة , ولو حصلك حاجة مش هتلاقي حد ياخد باله منك.

واعرف واحد تاني منزلش مصر بقاله 7 سنين , ومهمل في نفسه لدرجة انك متقدرش تقرب منه خوفا من الابخرة السامة المتصاعدة منه , الراجل دا مرتبه اكبر من مرتب مهندس اشراف معانا في المشروع.

يعني وبشكل واضح جدا , هي البداية جرة رجل , انت كنت بتاخد قرش في بلدك , وكان مكفيك , بس انت محتاج تعمل حاجة معينة , سافرت عشان خاطرها , و بقيت بتاخد 10 قرش , تشوف الفلوس عينك تزغلل , تقول كمان , ومفيش مانع من كذا , و خلاص تعمل الحاجة اللي انت عاوزها , طب نعمل حاجة كمان و حاجة تالتة ورابعة و خامسة , مكانوش موجودين اساساً في قائمة احتياجاتك , لم تكن لتوجد سوى انه الطمع.

ويضيع العمر يا ولدي وتصبح مجرد أداة لجلب الفلوس.

اعرف اسرة , والدهم سافر لمدة سنتين , اولاده كبار , في الجامعة , كانوا الاول مش بيقدروا يبعدوا عنه , سافر , الفلوس كترت , حاول ينهي عمله برا ويرجع ليهم , لقا حاجة تانية , ولاده اهم حاجة عندهم الفلوس , و بقا بالنسبة ليهم مش بابا بقا البنك , مش يكلموه غير عشان الفلوس , زي اعلان بنك مصر البنت بتكلم ابوها عشان يبعت ليها فلوس بس.

احنا بني ادمين . . . مش مكنة طبع فلوس , الفلوس مجرد اداة وسيلة عشان تعيش في حياة افضل , عشان تساعد اللي بتحبهم , بنفسك مش بفلوسك , بوجودك معاهم جنبهم كتف بكتف , بأنها تخليك مستريح و مبسوط , قاعد وسط اهلك حاسس بيهم متطمن على نفسك.

اهم حاجة لأي واحد ادميته , انه يحترمها و يقدرها وانه يحترم عقله وشخصيته ويحترم اللي حوليه , واحترامهم انه يقدر حاجتهم النفسيه ليه , مش حاجتهم لفلوسه.

غلط ان الواحد يضيع لحظة من عمره في حاجة مش مخطط ليها و لم توجد امامه سوى لمجرد الطمع فمشي فيها.

غلط انك تضيع عمرك و فرص احسن ليك في الحياة لمجرد انك عاوز قرش زيادة مكنتش عاوزه و مكانش ليه عندك احتياج.

غلط و غلط و غلط

اكبر غلط

دي صرخة , دمعة حزينة اوي مني

لأي واحد مضيع عمره برا مصر

بعيد عن اهله

بعيد عن اللي بيحبهم

بعيد عن كونه انسان

بعيد بعيد بعيد عن كل حاجة.

ارجع بلدك ملكش غير نفسك . . . ارجعلها

كان معكم باكيا

فتوح ابو المفاتيح – حزيناً

هناك 3 تعليقات:

  1. يارب ترجعلنا بالسلامة

    ردحذف
  2. للاسف.. دة اللى بيحصل
    كل كلمة حضرتك قلتها صح
    الاولويات اتغيرت ..لو كل واحد عارف اولوياته ايه واهدافه ايه وهو قيمته ايه بالنسبة لغيره والتانيين دول قيمتهم ايه بالنسباله
    ولو هو انسان عنده مبادئ
    ماكنش اتخلى عن كل اللى فات دة
    بكررررره الغربة
    بكرههااااااااا
    ربنا يهون على حضرتك غربتك

    ردحذف
  3. السلام تحية الاسلام وبعد
    اما بالنسبة لموضوع السفر والله دي حاجة ممكن اختلف معاك فيها شويتين
    قال علية الصلاة والسلام "منهوما لا يشبعان ... طالب علم وطالب مال " صدق النبي الكريم صلي الله عليه وسلم
    المال من شهوات الدنيا ... وانكار الشهوات يعني انكار الذات عموما اكيد الانسان اللي سايب مصر سابها لسبب عظيم والله ده شئ اعتقده في رايي
    انا عن نفسي شاب وعاوز اسيبها بس لعلة ما الصراحة انا عاوز اتعلم عاوز افيد الناس عاوز اعمل حاجة تاثر ايجابيا في حياة الناس محدش بيختار قدره بس فيه حاجات بتبقي صعب انك تحققها وانت في مكانك هنا ممكن تحس انك كويس ومتفوق ومعاك فلوس وعايش ... بس لو بصيت من زاوية تانية هتلاقي الشخص اللي في مستواك في دولة تانية عايش زي الملوك ... انا عارف ان الدنيا مش بيضاء اوي كده زي ما انا بقول بس علي الاقل الانسان بياخد علي قد ما بيشتغل ومتتوقع من انسان بيحب شغلة لاي سبب انه يسيب الشغل ويرجع علشان يتعذب هنا
    باختصار البلد بتنذف من زمان وامل حياتي ورجوايا الوحيدة في الحياة اني اكون سبب في ايقاف النذيف في بلدي بس بالنسبة للشخص اللي ساب مصر ومش ناوي يرجع لها ده زي الابن العاق
    اخيرا واسف جدا للاطالة احب اشكرك علي المدونة الجميلة جدا وعلي فكرة ده اول موضوع ليا هنا واتمني لك انسان ان تكون لبلده ولو جزء بسيط من احلامه زيك تمام!!
    امضاء طريد

    ردحذف

وخلي بالك من كلامك
حبيبي النبي بيقول:
"إن الرجل ليتكلم بالكلمة من رضوان الله ما كان يظن أن تبلغ ما بلغت ؛ يكتب الله له بها رضوانه إلى يوم يلقاه وإن الرجل ليتكلم بالكلمة من سخط الله كان يظن أن تبلغ ما بلغت ؛ يكتب الله له بها سخطه إلى يوم يلقاه".

إضغط على:
الاشتراك عن طريق البريد الإلكتروني
ليصلك بريد الكتروني عند قيام احد بالتعليق
وشكر

توضيح صغنووون خااالص


اقرأ و قول رأيك بحرية – عمري ما هزعل منك