الأحد، سبتمبر 13، 2009

ليبيا . . . خير محدش عارف الخير فين


بسم الله الرحمن الرحيم
سلام عليكم
كيف حالكم . . . بكتب ليكم من براك – شعبية سبها – ليبيا
النهاردة ثالث يوم ليا في ليبيا و ثاني يوم في براك
كنت قررت اني انزل تدوينة اول ما نزلت ليبيا في طرابلس , بس اللي حصل حاجتين , كنت كتبت التدوينة على موبايلي الجديد على جزأين بس الجزء التاني طار , دا غير إن التدوينة كانت سخيفة نوعا ما , وكل اللي بتعمله انها بتوصف مشاهداتي للرحلة أثناء ما أنا في الطيارة , ودا بمناسبة إني أول مرة أركب الطيارة وأنا في كامل قواي العقلية , يعني عندي حس النقد والكتابة من غير سبب وهلم جرا , كأن دا حدث مهم يعني , و الجزء التاني من التدوينة ضاع لأني قفلت البرنامج قبل ما احفظ اللي كنت كتبته , فدا أول سبب
تاني سبب إني لما وجدت النت في طرابلس , كنت تعبان وحالتي صعبة وحالتي غريبة و أصابني الكسل و الخمووول , أصل الطيارة بتاعتي وصلت طرابلس يوم الثلاثاء الساعة عشرة ليلا (توقيت ليبيا ومصر متشابه) , وانا معييش أي وسية اتصال مع أي حد في ليبيا ولا أعرف أي اسم ولا أعرف من هيجي ياخدني ولا انا رايح فين , فضلت ألف في المطار ما يزيد عن ساعتين وانا شايل معايا الشنط , ومفيش أي حد في مطار طرابلس العالمي , استعلامات مفيش , الناس بتوع شركة الطيران مش موجودين , أخيرا على الساعة 11.30 جاني واحد يسمى بمروان آل ايه , جه الساعة 11 و وقف يدور عليا , سلامات يا اللي بيدور عليا , أنا واقف من الساعة 10 عمال ألف وأدور , أنا اعتقدت ان اللي هيجي ياخدني هيجي من سبها , ولما سألت لقيت طيارات سبها هتيجي بكرا الأربعاء صباحا , فقلت خلاص هبات في المطار واستنى اللي جاي الصبح.
خير خير خير
محدش عارف الخير فين
الأحوال جيدة و الحمد لله , أول يوم في ليبيا فطرت في الطائرة من القاهرة لطرابلس , وتاني يوم فطرت في مطار سبها , تالت يوم فطرت مع الناس اللي معايا في الشغل في براك , مكرونة وكفته بانيه و سمبوسة.
محدش أبدا يتوقع و يتهم أهل ليبيا انهم يعرفوا الاصناف دي من الأكل , دا واحد مهندس معانا كتر خيره , جايبهم معاه من مصر , خطيبته عامله ليه السمبوسة و الكفتة البانيه عشان ياخدهم معاه , دا غير انها مزوداه بحاجات تانية كتير, تقريبا دا نوع من الدلائل انها بتعرف تطبخ وانها بتفكر فيه حتى و هو مسافر
: P
خير خير خير . . . محدش عارف الخير فين
الحياة مملة جدا هنا , أو غلط إني اوصفها بكدا و انا مقضيتش غير يوم واحد عمل , بس أكيد فيه دلائل , اليوم يبتدي من الساعة 9 أو لنقل 10 و بيخلص على الساعة 4 , مفيش حاجة تانية تعملها ,البلد عبارة عن حرف تي كبير شوية , بس فيها شوية مناظر تحفة , عاوز اشتري كاميرا بما إني سبت فلتي في مصر , ومفيش نت في المكان و هكذا.
مكتئب قليلا محدش بيسأل عليا بس أكيد خير
يلا خير خير خير محدش عارف الخير فين.
كان معكم من بدايات الصحراء الكبرى
فتوح ابو المفاتيح – الكهربا قاطعة

هناك تعليق واحد:

  1. محمد الصياد18 سبتمبر، 2009 2:53 م

    الحمد لله انك بخير والحمد لله
    والحمد لله انك وصلت وبدأت تمارس مهام عملك بسلام ونقدر نقول انك تقريبا بدأت تستقر
    واحتسب الأجر عند الله
    كان سيدنا عمر بن الخطاب كان يريد ان يموت اما شهيد فى المعركه أو وهو يضرب فى الأرض يبتغى من رزق الله وهذ يدل على فضل طلب الرزق فى السفر
    وعلى فكره فى ناس كتيييير أوى بتسأل عليك وتحب تعرف أخبارك بس .................
    وربنا يوفقك ويوفقنا جميعا ...
    ووافينا بأخبارك من على مدونتك
    والسلام عليكم

    ردحذف

وخلي بالك من كلامك
حبيبي النبي بيقول:
"إن الرجل ليتكلم بالكلمة من رضوان الله ما كان يظن أن تبلغ ما بلغت ؛ يكتب الله له بها رضوانه إلى يوم يلقاه وإن الرجل ليتكلم بالكلمة من سخط الله كان يظن أن تبلغ ما بلغت ؛ يكتب الله له بها سخطه إلى يوم يلقاه".

إضغط على:
الاشتراك عن طريق البريد الإلكتروني
ليصلك بريد الكتروني عند قيام احد بالتعليق
وشكر

توضيح صغنووون خااالص


اقرأ و قول رأيك بحرية – عمري ما هزعل منك