الخميس، يناير 28، 2010

الخوف

حينما يشتعل الخوف - فوتغرافيا فتوح ابو المفاتيح


هل اختبرت مشاعر الخوف من قبل ؟

هل تعرف معنى الخوف؟

هل عشت من قبل في مجتمع من الخوف؟

اليوم . . . الاربعاء "قبل الخميس بيوم" , كنت في وسط مجموعة من 8 مصريين , ملأهم الخوف , والرعب من المجهول , عُبقَ الجو برائحة الخوف المنبعث منهم.

النهاردة

. . . . .

. . .

. .

.

عاملة البوفيه مجتش . . . ! !

و محدش فينا "نحن المصريين" يستطيع أن يعيش بدون فنجان شاي او نسكافيه صباحي

هتقولي ليه وايه اللي ممكن يثير الخوف والرعب من عدم وجود عاملة بوفيه ؟ ؟ ؟

و لكن , , , إذا عرف السبب بطل العجب.

يكمن السر في المقاول , , , المفروض اننا ال8 مصريين بنمثل طاقم الاستشاري لمشروع ما قيمته 850 مليون جنيه مصري , والمفروض كما هو معروف ان وجود الاستشاري يهتز له جميع من يوجد في المشروع

الاخ المقاول ابن لآدم ليبي جنوبي قبلي.

ذات مرة ما واحد فينا "فتوح" ذهب نحو البوفيه في يوم ما مشمس مشرق لطيف النسمات.

المسكين فتوح بيعمل له كوباية نسكافيه عادية جدا تتكون من قهوة و سكر ولبن بودرة ابيض كالحليب

يدخل الاخ المقاول , طول من غير عرض , وعلى وشه غضب الله و تكشيرة عمري ما شفتها بتتفك

فتوح بيقوله سلام عليكم ميردش عليه و يكشر زيادة في وشه

المقاول مسك المج الحلو بتاع فتوح و دلقه في الحوض ثم رماه فيه , وزعق فيه

أنت ايش جابك هنا , ما في عامل قهوة , هي كافتريا تيك اواي هي , انت ايش جابك هنا

ولما مش رديت عليه "كان بيشغل بالي اني افسر ليه إن في كافتريا التيك اواي عامل الكافتريا هو اللي بيعمل القهوة مش الزباين" أنا طبعاً لم اتوقع ان حد ممكن يزعق فيا لأي سبب كان.

المقاول مسك المج وراح كسره في الحوض , وفتح المية عليه "مش عارف ليه" , وقال

اطلع من هنا , يلا برا.

رجعت على مكتبي , اجر ذيلي , وربما لافه حوالين دراعي عشان اعرف اوصل من غير ما اتكعبل فيه من فرط ما طول , كنت هعيط , موقف زبالة جدا و مش مبرر , لولا دخول صديقي وقعدت اتكلم معاه شوية لحد ما هديت , كان ممكن ابهدل الدنيا على نفسي طبعا عياط و نواح وما شابه.

:P

طبعا حكيت للمدير وكل من في المشروع عرف , بس محدش يقدر يعمل حاجة لسي السيد "المقاول"

النهاردة , لم تأت عاملة البوفيه , الجميع في رعب شديد , هادم اللذات ومفرق الجماعات ,و مرعب الناس الشداد وآكل لحم الفتيان و الفتيات المقاول ابن ". . . . حذف من النص" قاعد في مكتبه وفاتح الباب والمكتب جنب البوفيه.

الناس فضلت صامدة , بما فيهم مدير المشروع , لحد الساعة 11 , 3 ساعات كاملة والناس قاعدة بدون كوباية شاي واحدة , لحد ما الناس انهارت على مكاتبها , نفر شجاع منا خد عربية ,و راح الاستراحة بتاعتنا "بالمناسبة هي بتاعة المقاول وناوي يطردنا منها" جاب غلاية و شاي وسكر و زجاجة ماء 7 لتر وعاد سريعا قبل أن يموت الناس صرعى الشاي . . . لعن الله الادمان.

:P

الناس شربت الشاي من هنا , وتحس ان الحياة ردت فيهم , و بدأت بعض بوادر الشجاعة تدب في عروقهم وبدأوا يطلعوا رؤوسهم خارج مكاتبهم عشان يبصوا إذا كان المقاول موجود ولا في مكان تاني.

:)

تسلل اتنين من الطاقم للبوفيه , وتم اختلاس كوبايتين يلحقها برطمان النسكافيه يلحقه فنجانين اخرين.

بعديها بشوية , استنوا المقاول يطلع برا يشوف حاجة , تسلل اخر و اختلس برطمان الحليب البودرة , واعاد برطمان النسكافيه ناقصاً إلى قواعده.

بعد شرب النسكافيه و الشاي المييزة اعلن المصريون انتصارهم على الخوف و على المقاول الليبي "اللي يقدر يطردنا برا المكان لو عاز كدا" بأنهم شربوا الشاي و الكافيه على الرغم من انفه وانف اعداء الوطن.

عشان تعرفوا انه دايما في احلك الظروف الشجاعة المصرية بتظهر وتبرز و تتغلب على جميع المصاعب و العقبات و المغرضين و المشككين , إلى الامام يا وطن ونحن حماتك.

كان معكم مختفيا

فتوح ابو المفاتيح – مرتشفاً الكافيه

:D

هناك تعليقان (2):

  1. سبحان الله بجد والله من غير اى زعل موضوع فى منتهى البواخة والسخافة خلاص كل الكلام اللى فى الدنيا خلص علشان تتكلم على الشاى والنسكافيةاو اخد الحاجة من ورا المقاول سبحان الله

    ردحذف
  2. عزيزي استاذ غير معرف
    انت اخدت الموضوع بسطحية, الامر ببساطة هو عرض لحدث ما و ملاحظة لسلوك عينة من البشر و إزاي بتتصرف في ظرف مماثل , و إزاي الناس دي "مجموعة المهندسين" اتصرفوا بسلوك يقرب لسلوك الاطفال
    اكيد دا موضوع يحتاج التفكير
    تاني حاجة , وصف لنوعية من البشر اعتقد انك مش هتعرف تقابلهم "المقاول" اعتقد انه سلوكه يبتعد تماما عن كل تصرف ادمي ممكن
    عبارة عن نقد و استهجان لما حدث
    ربما انت بتحب المقال و التعبير واضح الفكرة الصريح في اتجاه
    ولكن عذري ان طلعت هذه المقالة مداراة لكثير من الافكار و الفلسفات وأن تكون عرض بشكل بسيط لمواطن الشجاعة المصرية وكيفية بروزها في اصعب المواقف

    اشكرك على تعليقك استاذ غير معرف
    :)

    ردحذف

وخلي بالك من كلامك
حبيبي النبي بيقول:
"إن الرجل ليتكلم بالكلمة من رضوان الله ما كان يظن أن تبلغ ما بلغت ؛ يكتب الله له بها رضوانه إلى يوم يلقاه وإن الرجل ليتكلم بالكلمة من سخط الله كان يظن أن تبلغ ما بلغت ؛ يكتب الله له بها سخطه إلى يوم يلقاه".

إضغط على:
الاشتراك عن طريق البريد الإلكتروني
ليصلك بريد الكتروني عند قيام احد بالتعليق
وشكر

توضيح صغنووون خااالص


اقرأ و قول رأيك بحرية – عمري ما هزعل منك