معانا النهاردة في الفترة الحرة في إذاعة مراسيل شخص لطيف جداً و بسيط أوي , هو ذكر , نقدر نقول عليه راجل لأنه في السن اللي الذكور بيتوصفوا فيه انهم رجالة.
هنطلق على ضيفنا اسم مستعار , هنسميه هشام.
ونسمع حكاية هشام . . . .
الموقف الاول – قبل الزواج :
هشام مروح البيت آخر الليل . . . تعبان بعد يوم شغل طويل و قرفان اخر حاجة , والدة هشام عاملة عشاء زي الفل , لما دخل البيت والدته بتقوله تعالى اتعشى يا ميشو . . . عشا مخصوص عشانك.
رد ميشو : معلش يا مامتي أنا تعبان خالص ومش هقدر اتعشا , أنا هخش أنام.
ميشو دخل نام . . . و ماما قعدت برا زعلانة.
¯ ¯ ¯
الموقف التاني – بعد الزواج:
هشام برضه مروح البيت آخر الليل . . . تعبان بعد يوم شغل طويل و قرفان اخر حاجة , زوجة هشام عاملة عشاء زي الفل , لما دخل البيت زوجته بتقوله : تعالى اتعشى يا ميشو يا حبيبي . . . عاملة عشا مخصوص عشانك.
رد ميشو : معلش يا حبيبتي أنا تعبان خالص و مش هقدر اتعشى , أنا هخش أنام.
ميشو دخل نام . . . و زوجته قعدت برا زعلانة
¯ ¯ ¯
نسيب ميشو في جنب ونتكلم "نهجرس" مع بعض:
الموقفين دول شبه بعض تمام , و نقدر نستنتج إن العامل المشترك بينهم هو بطلنا هشام (ميشو) و نلاقي إن والدة ميشو وزوجته الاتنين طلعوا نفس رد الفعل انهم زعلو نتيجة نفس الفعل , ونقدر نستنتج سبب زعلهم كالتالي:
أولا : سبب زعل أم ميشو:
زعلت أوي لأن هشام دخل نام يا ولداه من غير ما يتعشى , بعد يوم عمل مرهق و طويل جدا , و يا عيني ياكبدي الولد على لحمه بطنه من صبحية ربنا , هو يعني باكو البسكوت ولا كيس الشبسي اللي بياكله هيفيده بحاجة ! ! !
أنا الصبح اوي ما يصحى هعمله فطار جامد عشان ياكل كويس , أحسن يا ضنايا الواد يقع من طوله , انا ملاحظة انه اليومين دول وشه اصفر من اللف والدوران . . . يا عيني على ولاد اليومين دول , محدش بيعرف ياخد باله من نفسه.
ثانيا سبب زعل زوجة ميشو:
زعلت أوي لأنها تعبت أوي في عمايل العشاء (و من حقها) و هشام و لا بص عليه و أكل منه اي حاجة حتى و لو جبر خواطر , وهي المسكينة فضلت قاعدة مستنياه كل دا وفي الاخر ميعبرهاش و يخش ينام و ميقعدش معايا و لا يسألني عملتي ايه النهاردة "إهئ إهئ" دمعتين.
هشام دا طلع اناني اوي , أنا هخاصمه ومش هكلمه لحد ما يعرف غلطه و يجي يصالحني.
وفي نهاية الحلقة نقدر نستنتج شوية حاجات :
1- ميشو بيرجع البيت متأخر قبل و بعد الجواز و اغلب الظن انه شخص فاسد وبيلعب بديله , ولازم حد يقفشه و يظهره على حقيقته عشان يبطلوا يعملوا ليه عشا.
2- ميشو مش بيتعشا , يبقا والدته يوفروا تمن العشا.
3- ميشو بيحب ينام كتير.
4- العشا دا العشاء الأخير في حياة ميشو لأن مراته مش هتعشيه تاني.
5- حب الأم و اهتمامها مفيش زيه أبداً و ميتعوضش , ودايما مصلحتك و راحتك أهم عندها من أي حاجة تانية , و بتنتحل ليك دايما الاعذار وعمرها ما بتفهمك غلط , عشان كدا عمرها ما بتزعل منك.
ملحوظة :حدث بالفعل – أنا لما كنت شغال في القاهرة , و بروح طنطا آخر الاسبوع , ماما كانت بتجمعلي أكل الاسبوع كله (لحمة فراخ سمك جمبري بط) ومكرونة بالباشميل "مكرونة كيكة" و تقعد تزغطني جمعة و سبت على أساس اني دايما لوني اصفر و مش لاقي اكل في القاهرة.
خير خير خير
محدش عارف الخير فين
كان معكم على الهواء مباشرة
فتوح ابو المفاتيح – إذاعة مراسيل – الفترة الحرة
محمد الصياد
ردحذفقصه جميله وواقعيه جدا
وهو ده الطبيعى لأن حب الأم ما لإبنها لا يختلف عليه اثنان
وكذلك هى دى عقلية النساء (زوجته)
بتزعل بسرعه وتفكيرها محدود ودايما بتبص تحت رجليها وبنظره غير موضوعيه
عشان كده زعلت منه من غير ما تعرف أسباب
وبسرعه أخدت قرار انها مش هتعمله اكل تانى
ده غير انها اتهمته انه انانى من مجرد موقف
كما قال رسولنا الحبيب صلى الله عليه وسلم
فيما معن الحديث " لو أحسنت إليها الدهر كله ثم أسأت إليها مرة واحدة لقالت ما رأيت منك خيرا قط "
أنا مش بدخل على مدونات كتير
ردحذفواول مره مدونة تعجبني
جميل اوي اوي عنوانها "الحب هو الاحتواء"
ناس قليلين أوي اللى عارفه المعنى ده
بنوتك ما شاء الله لا قوة الا بالله زي العسل وهي عندها ساعه ونص :-)
ربنا يباركلك فيها ويصلح ذريتك يارب
غير معرف
ردحذفربنا يخليك يارب
انا مبسوط جدا لأن مدونتي عجبتك
انا عندي تدوينة بأسم الحب هو الاحتواء , بشرح فيها وجهة نظري عن الحب
و مرسيه على الدعوة الحلوة دي
ادعلي ربنا يرزقني بيها إن شاء الله
هي لسا مجتش على فكرة
دي صورة للتمني لا غير
:D
السلام عليكم ورحمة الله وبركاته
ردحذفطريقة عرضك للموضوع كانت رائعة
وتوضح اختلاف نظرتنا للامور
الام بطبيعتها تختلق الاف الاعذار لابنها وهذا هو الحب الغير مشروط وباعتقادي ان الام هي اكثر الناس قدرة على تطبيق هذا الحب
اما الزوجة , فربما كان عليها ان تختلق بعض الاعذار من اجل زوجها, ثم في جلسة (رواق, توضح له وجهة نظرها , بانها (تعبت وهيه بتجهز بالعشا وبلاخر عل فاضي)
كلمة حانية وجميلة من زوجها كانت ستنسيها .
شكرا على هذا الطرح الذي يجعلني انتبه اكثر واكثر
لشيئين
1- الحب اللامشروط
2- خلق الاعذار
"التمس لاخيك سبعين عذرا"
تحياتي ^-^