الثلاثاء، نوفمبر 27، 2007

مجلة حلوة . . . مجلتي


مجلة حلوة । . . مجلتي (بسكوتة) .

المجلة كان اسمها :

افعل ما تشعر في أعماق قلبك انه صحيح

لأنك لن تسلم من الانتقاد بأي حال

النهاردة أخيراً و بعد شهر من اللف و الدورانو إمضاءات و اعتراضات , علقت مجلتي وعليها 54 إمضاء و توقيع . . . يعني بقت مشوهة من الآخر .

المهم أنا كنت مبسوط جداً .

علقت المجلة (لونها بمبة 200 * 70 سم) .

وفضلت واقف جنبها عامل زي أبو العروسة اتلقى التهاني و التعليقات .

كان موقف رائع , الناس اتلمت و عمالة تقرأ و ناس كتيرة عجبها حاجات , و ناس تسلم عليا , و ناس تناقشني . . . كانت لمة جامدة جدا .

احلى حاجة في الموضوع إني كما اعتدت دوماً بتتفهم مقالاتي غلط (هههه) إلا من رحم ربي و هم قلة , هي مش بتتفهم غلط , هو الي بيقراها بيفهمها زي ما هو عاوز , يعني بيتجاهل حاجة هوا عارفها عشان يصدق حاجة تانية, حابب يوهم نفسه بيها , خير محدش عارف الخير فين .

مفاجأة الموسم , على الساعة اربعة 4 كان فيه واحد واقف يقرأ المجلة , صحابه عمالين يشدوا فيه عشان يروحوا , اصلهم اتأخروا و عاوزين يروحوا و هو مش عاوز يتحرك من قدام المجلة قبل ما يخلص المقالة , يشدوا فيه و هوا يقولهم "ثواني قربت أخلص" , لطعهم جنبه لحد ما خلص المقالة .

بجد دي احلى حاجة حصلت النهاردة .

من امام المجلة – أبو العروسة

فتوح أبو المفاتيح – منتظراً

السبت، نوفمبر 24، 2007

Brain Shooting

أفكار في بالي و آآآه من بالي ده


الانترنت . . . أصبحت اعشقك .


استنتاج طلعت بيه قريب جداً جداً . . . خلى اتصالك الفعال عبر النت . . . تواصل عبر النت لأن رسائلك تصل عن طريقه بأسلوب أسرع و أحسن , و بدون حتى أن تعلن عنها فإنها تصل . . . خير خير . . . الله أعلم . . . تعتقدوا . . . ؟ ولا ايه ؟
خير . . . محدش عارف الخير فين .

=========================

ماما . . كم أحبك .

النهاردة في الميكروباص (الاستاد - المحطة) اكتشفت شئ من أروع و أجمل حاجة خلقها ربنا .
احكيلكم الموقف من الأول . . .
أبطال الحكاية : طفلة صغيرة (5 شهور) - خالتها - أمها .
الطفلة وخالتها ركبم من الجامعة , و النونو كانت بتزمزء دا غير إنها اتخبطت في راسها و هما بيركبوا الميكروباص فراحت معيطة ,فقعدت اشاغلها لحد ما هديت شوية .
عند أول النحاس أمها ركبت (كانت منتقبة) دخلت و قعدت جنب خالتها , و أول ما اتكلمت لاقيت البت بتتنطط في إيد خالتها و انشكحت , و اديرت لمامتها و مدت ايديها ليها .
كانت عاملة زي عصفورة صغيرة بتصوصو كانت "بسم الله ما شاء الله" رائعة , كل اللي كانت عاوزاه دلوقت انها تاخد مامتها بالحضن , و لما راحت في حضنها كانت طايرة من الفرح . . . مبسوطة جداً عارفين لما عيل صغير يتنطط من الفرح , دي كانت كده
كل ده حصل بس لما سمعت صوت مامتها , من صوتها بس عرفتها قبل حتى ما تشوفها (سبحان الله) شئ رائع و جميل - آآه - على فكرة يا جماعة حبيبة وحشتني جدا . . .
يارب "اللهم ارزقني الهدى و التقى و العفاف و الغنى"
و حبيبة و أمها ياااارب
يااااارب

=========================

بتاع النت .

أنا واقع يا جماعة في حيرة . . .
حد يقدر ينقذني منها ؟
عمال أدور في كتب القانون على نص مش لاقيه . . . شكله مش موجود .
أنا بقترح نضيفه للدستور .
من رأيي هيكون ليه فايدة كبيرة للشعب .
القانون اللي بقترحه انه يسمح بإعدام بتاع النت شنقاً في ميدان عام . . . عشان أنا خلاص اتخنقت منه .
مش عارف أنزل ولا تدوينة ولا مقالة .
انا خلاص بقيت عامل زي اللي بيدون على نفسه .
عمال اكتب في قصاقيص ورق .
و عايز ابعت رسالة لسين من الناس و مش عارف .
و سين هيفهمني غلط عشان اتأخرت في بعث الرسالة .
أنا خلاص جبت آخري منه .
هااه يا جماعة , مين معايا في الحوار ده ؟؟
نعمل مظاهرة و يكون شعارها (اعدموا كل بتوع النت) .
أنا عمال اتصل عليه دلوقت , و لا راضي يرد عليا و لا يعبرني .
خير . . . خير .

=========================

اسبرين أطفال .

مزيل الصداع الفعال و الأكيد . . . جبت النهاردة شريط اسبرين أطفال , أصلي كنت بأشعر بالصداع الشديد و حل المشكلة دي إنك تاخد حباية اسبرين أطفال . . رائعة . . خرافية . . طعمها جبااار
لازم تجربوها و عليها ضمان شخصي مني . . .
كوباية نسكافيه لكل حباية اسبرين متعجبكمش . . . أوكشن .
بس ده بس لأول واحد يجرب أو لـ . . .
لأ لأ بلاش أو دي خليها سر .
خييير خييير . . . محدش عارف الخير فين .

=========================

من أنا (1) ؟؟؟

ممكن سعات أعرف نفسي بإني خبيث و لئيم , خصوصاً إن دي طريقة اساسية في التعامل مع الأطفال .
يعني تعمل عملاية باين عليها البراءة و الناس كلها فاهمة غرض معين من وراها . بينما انت ليك غرض تاني بعييد خااالص .
بس بعد اذنكم طبعاً . . . ممكن أعمل عملاية صغنونة خالص مالص .
ممكن أصف نفسي فيها بإني شخص خبيث مكسوف جداً .
يعني إذا سمحتم ليا ممكن أعمل الحركة دي ولا انتم ليكم رأي تاني ؟؟

=========================

بخيل ؟ أم مسرف ؟

انا اساسا ً لا أحب السعة في الصرف , ولكن في لحظات عدم التوازن وفقدان الهدف ببقى متخلف في المصاريف .
بصرف 3 أضعاف المصروف بتاعي .
المفروض . . . المفروض ميكانيزم مصروفي = المواصلات اليومية + 2.0 جنيه زيادة بشرقة .
زمان (يعني من كام شهر) كنت بحوش 80 % من المصروف - كل مواصلاتي و انتقالاتي إما مشياًَ أو ميكروباصاً - عشان كان عندي هدف و كنت بتعب نفسي عشان اوصل ليه .
- تتخيلوا - بقيت بركب تاكسيات أكتر ما بركب ميكروباصات .
- تتخيلوا - ركبت النهاردة تاكسي عشان مشوار يدوب ياخد من دقيقة إلى دقيقة و نصف مشي خستعة , و على فكرة دا كان آخر جنيه في جيبي .
بس خير . . . محدش عارف الخير فين .

=========================

محدش عارف الخير فين .

أنا حبيت الكلمة دي جداً جداً جداً . . .
أصل فيه سين من الناس , كتبها لي في موقف صعب جداً , فجلبت لي الابتسامة الواسعة , ومازلت محتفظاً بالابتسامة كلما تذكرت الموقف , وما زلت أيضا حافظاً للورقة التي كتب لي عليها هذه العبارة :
"محدش عارف الخير فين"
فيارب لك الحمد ولك الشكر انك الهمته كتابة هذه العبارة .

=========================

بتاع الشاورما .

النهاردة الأربع ليلاً , طلعنا من لقاء ما مهم , وكنا جروب (مجموعة يعني) .
قولنا لازم نحتفل , طلع اقتراح إننا نروح مؤمن و انا كنت مؤيد بس باقي البني آدمين رفضوا و قالوا ناكل عند العمدة . . . شكلهم كانوا مفلسين , بأمارة إن كتير منهم طلب حواوشي . . . خير . . . خير أوي , ما أنا أول مرة كنت مفلس و طلبت كشري مش حواوشي , بس أنا المرادي طلبت ساندوتش كلب سخن مصري و ساندوتش كلب سخن مكسيكي .
آآآه افتكرت حاجة .
كنت وعدت شخص من الجروب إني أوصفله ساندوتشه كان بيتعمل إزاي . . . أقولك يا سيدي (هو كان ساندوتش فراخ شبه الشاورما - دا وصف الشخص اللي أكله) .
وهو بيستوي كان شبه مجموعة خنافس طخينة و مكلبظة أوي , بس متقشرة و عليها مايونيز مختلط بسلطة طحينة فيها بقدونس . . . تمام كده , أنا وفيت بوعدي .
نرجع بقا للحدوتة , كان فيه راجل بتاع الشاورما , كان راجل سكرة عسل اتصاحبت عليه - المهم - كنت واقف على بعد 2 متر منه , فجأة راح بصلي و قام مركز اوي و قال "استنى . . . ايوه . . . خليك باصص لفوق" و قعد يتفرس في ملامح وجهي و يبص يمين و يبص شمال و فجأة قال "أممم انت شغال في مشروع كبير . . . أممم انت في آخر سنة في الكلية و نفسك تنجح السنادي"
المهم في الآخر الراجل طلع بيزاولني و بيمثل عليا انه بيقرالي الوش , و هو مستنتج دا كله من :
إننا كنا جروب واقف قدام المطعم - كان كلنا لابس بدل - أنا و أنا بكلم الكاشير قلت إني في كلية هندسة .
خير . . . بعد كده اتصورت معاه و زمايلي اتصوروا معاه , و خلى واحد فيهم يقف مكانه و يمسك السكينة كأنه بيقطع شاورما و أنا عملتله قرنين .
خير . . . راجل زي العسل . . . أنا ناوي أطبع الصور اللي اتصورناها معاه و لما أروح ناحيته اديهاله ذكرى لليوم الرائع جدا ده (على فكرة روعة اليوم مش بس في اللقاء و الراجل بتاع الشاورما ) و اسأله عن اسمه لأني نسيت اسأله .
خير خير . . . محدش عارف الخير فين برضه .

=========================

زغروتة للعروسة .

النهاردة الخميس .
ودي أول مرة في حياتي أحضر كتب كتاب .
ألف ألف مبروك يا أبو العروسة .
ألف ألف مبروك يا أبو العريس .
النهاردة كتب كتاب بنت عمي .
ألف ألف ألف مبروك يا بنت عمي .
إن النهاردة ليوم سعيد .
لاحظت حاجة جديدة عليا . . . إني غيرت ردي على اللي بيقولي "عقبالك" (معناها العقبى لك) .
كنت بقوله "قول يا رب . . كلها سنتين . . هااانت" (أصلي عاوز أتجوز في الشتا , و لا رأيكم ايه ؟)
زمان أوي أوي كنت بقول : الله أعلم .
من زمان مش أوي كنت بقول : بعد الشر .
دلوقت بقول : يااارب . . . ادعولي انتم كمان .
كله خير صح ولا ايه ؟ . . . محدش عارف الخير فين .

=========================

بابا عمل حادثة .

النهاردة الخميس (برضه) .
وهو مروح بليل من البلد (أصله كان بيروح بنات عمي - على فكرة أنا ليا 3 أعمام على ما أتذكر) .
داد اساساً مش بيعرف يسوق في الضلمة - اللي حصل إن عربية في المقابل بتاعه اديته النور العالي , فهو حود لجنب عشان يوسعلها , لجنب دي كان فيها كوم تراب (سن - دولوميت) العجلة الشمال طلعت عليه , فالدركسيون لعب في ايد بابا , قام داخل في شجرة . . . بس خير , ربنا ستر و طلعت سليمة .
بابا طاع سليم بحمد الله وفضله , بس لعربية بوزها تدشدش و الشاسيه بتاعها اتشرخ و محور العجل اتعوج . . . بس و خلاص .
المهم إن بابا رجع سليم و زي الفل , بس فيه شوية رضوض و كدمات و خدوش . . . غير كده هو سليم وزي الفل , بس هوا نايم في السرير .
خير خير . . . محدش عارف الخير فين .

=========================

أشعة .

النهاردة الخميس (برضه) .
مسكت في ايدي أشعة بتاعة بابا اللي عملها النهادرة بليل (لونها اسمر و فيها عضم) و قعدت أبص عليها كأني دكتور , و ألفها يمين شمال و من فوق ومن تحت , ساعتها افتكرت موقف صعب جداً .
في مرة كنا واقفين عند مستشفى الجامعة , فحت واحدة ست , اعتبر نفسي بأمدحها و اسبغ عليها من الصفات الكثير و بأنافقها لما أقول عليها غلبانة . . . كانت مسكينة جداً .
الست كانت ماسكة أشعة في ايديها و عمالة تدور على حد يفهم فيها يقولها أي كلمة يطمنها . . . أصل بتوع المشفى رمولها الأشعة و مشيوا . . . الست جت تسألنها بإستجداء وتعطف "و النبي يا داكتور تشوفلي الأشعة دي و تقولي الواد عنده ايه ؟" زميلي قالها "معلهش يا حاجة إحنا مش دكاترة" فسابتنا و مشيت تشوف حد غيرنا تسأله , وكان شكلها بيقول (طب مادام انتم مش دكاترة ايه اللي وقفكم هنا) .
بصراحة كنت هعيط من الملامح المرسومة على وشها متشحتفة و تحس انها ماسكة نفسها بالعافية .
كنت هجري وراها آخدها لأي حد من الدكاترة أصحابي النواب بس افتكرت إن مفيش حد منهم مناوبة النهادرة .
الست فضلت ماشية تسأل الناس اللي في الشارع لحد ما اختفت . . . ربنا يكون في عونها .

=========================

دمنهور - طنطا .

النهادرة قررت إني أعرف مكان كفر الزيات .
أنا أساساً مش رايح دمنهور عشان أعرف مكان كفر الزيات .
أنا رايح أدي دورةتبع اليونيسيف .
المهم . . . أنا كنت معتقد إن كفر الزيات ما بين طنطا - القاهرة , الرائع إنها طلعت بين طنطا - اسكندرية , و بما إني مسافر على السكة دي , فا بالمرة أعرف مكان كفر الزيات .
المهم . . . و إحنا راكبين الميكروباص عدينا على حتة كده إتهيألي إنها كفر الزيات - فسألت الي جنبي فقال "لأ دي الدلجمون" فقلتله ماشي , سرحت شوية و بعد كده سألته دي كفر الزيات؟ فقال "ياااه دي عدت خلاص" .
قلت خير , و أنا راجع ابقا ابص عليها .
و أنا راجع قلت بقة افنجل عيني و أركز عشان اشوفها .
كان فيه واحد قاعد في الكرسي اللي قدامي مش عارف شغال ايه , بس كان عمال يحكي حكاية حلوة للاتنين اللي قاعدين جنبه , ملخص الحدوتة انه في نا س بتضحك عليه في بيع وشرا الحمير (وأنا أول مرة أشوف بياع حمير فركزت معاه أوي) و على ما خلص الحدوتة سألت اللي جنبي باقي قد ايه على كفر الزيات فقال "ياااه دي عدت خلاص" .
شكل كفرالزيات دي هيبقا ليها حدوتة معايا .
خير . . . محدش عارف الخير فين .
شكلي لازم انزلها مخصوص من طنطا عشان اشوفها , يا إما حد يبعت ليا كام صورة ليها . . . أصلهم بيقولوا عليها حلوة .
خير .

=========================

من أنا (2) ؟؟؟

تكملة لمين أنا ؟؟ اعتقد إني ممكن أصف نفسي اثناء الكتابة بالخبث المغلف بالفلسفة , يعني ممكن أكتب مقالة الناس تحبها و كل حاجة , بس اللي يفهمها شخص واحد بس وهو اللي أنا باعتله الرسالة المدمجة داخل المقالة , هوا مش حوار كلام ما بين السطور , هوا كلام بتجمعة من السطور نفسه .
بجد . . . محدش عارف الخير فين .

=========================

حلم

النهاردة حلمت حلم غريب جداً . . .

معذرة إني مسحت الحلم
بس سمعت حديث عن سيدنا النبي (عليه الصلاة والسلام)


(الرؤيا الصالحة من الله والحلم من الشيطان ، فمن رأى رؤيا يكره منها شيئا ، فلينفث عن يساره ثلاثا ، وليتعوذ بالله من الشيطان فإنها لا تضره ولا يخبر بها أحدا . وإن رأى رؤيا حسنة فليستبشر ولا يخبر بها إلا من يحب)



فكان المفروض إني مش كنت أقول عليها لأي حد أو حتى اكتبها على المدونة , بس حصل خير واهي اتكتبت و شافها يجي رقم كدا .
استغفر الله العظيم , مش عارف , ربنا يسامحني بقا .

خييير . . . محدش عارف الخير فين .

=========================

فلوس .

بابا إداني فلوس عشان اجيب لبس شتوي ليا , بس المشكلة غن مش بفهم في موضوع اللبس كويس , يعني موش بعرف انقي لبس بس ليا رأي حواليه , وهو بالمناسبة صعب إرضاؤه , ماما و اخواتي البنات بيحاولوا ينقوا ليا لبس , فأنا بقولهم "لأ مراتي بس هي اللي تنقيلي لبس" , عشان دي تكون واحدة من مميزاتها أو بمعنى أخر فوايدها .
المهم دلوقت إني حيران اعمل ايه ولا اشتري ايه .
أنا جت في دماغي فكرة .
أنا معايا 600 جنيه و و أعمل جمعية ب 1000 جنيه على فلوس اللبس وابيع الكمبيوتر بتاعي و اشتري لاب توب .
هااااه ايه رايكم يا جماعة , اعتقد انه حل حلو , صح ولا ايه ؟؟؟

=========================

مقالات .

سعات الواحد بيبقا في دماغه حاجات يتكلم عليها و عاوز يكتبها في مقالة بشكل معين بعد كده مش يكتبها وبرضه سعات فيه ناس بتستنى منك مقالات تقراها و انت مش كتبتها , المهم دلوقت إن فيه عليا رصيد 3 مقالات , اتنين منهم كتبتهم بس مش بالصورة اللي متوقع انها تكون مكتوبة بيه , بصراحة بصراحة , أنا خايف اطلعهم اساساً , أو أفكر إني اطلعهم , المقالة التالتة شبه مكتوبة في دماغي بس خايف منها برضه لأنها ممكن تتفهم على انها إمعان في الذاتية , و دي حاجة أنا بتخنق منها , بس خير .
أنا بقترح حل إني ممكن اعيد كتابة المقالتين الأولانيين , و دا أمر صعب لأني في الحالة دي هتصنع مقالة , في المعتاد بتتطلع ماسخة (هههه) بس اليومين دول بقيت محترف و بتطلع امسخ (ههههه) .
خييييييييييييير محدش عارف الخير فين . .

بسم الله الرحمن الرحيم

إن إعتدت على قول بسم الله الرحمن الرحيم عند شروعك بكل عمل تقوم به، فغداً أيضا يوم القيامة و عندما تعطى صحيفة أعمالك بيدك، فستقول قبل قراءتها بسم الله الرحمن الرحيم، جرياً على ما اعتدت عليه فى الدنيا، فإذا بذنوبك قد محت، فتسأل ماذا حدث
فيأتي النداء: يا عبدي، لقد دعوتني بالرحمن الرحيم، فعاملتك بدوري وفق هذه الرحمة.

السبت، نوفمبر 17، 2007

كلمة

الشجاعة هو عمل ما تخشاه
لا يمكن أن تكون شجاعاً مالم تكن خائفاً

الجمعة، نوفمبر 16، 2007

عظيمة يا مصر


عظيمة يا مصر

يا أرض المحن

يا مهد القذارة

يا أرض الفتن

نيلك ملوث

قمحك مسرطن

فظيعة يا مصر

مقدمة مناسبة جداً للي حصل و اللي هنعرفوه مع بعض حالاً . . .

أولا : نقر مجموعة من الأسس اللي لازم نعترف بيها ونتفق عليها قبل ما نخش جوا المقالة .

- إحنا شعب جباان (وأنا من الشعب ده) بيخاف من ضله , واللي راكبينا عارفين ده .

- إحنا شعب جاهل و الجهل زي ما انتم عارفين مسألة نسبية (راجعوا مقالتي يا جاهل) بس نوع الجهل اللي انا هنا بتكلم عليه , هوا الجهل المسموح به و الطبيعي في أي مكان سواء في مصر أو في أروبا و الدول المتكدمة , و الجهل ده مش غلطة الشعب دي غلطة اللي راكبينا برضه .

أصلكم مش فاهمين الفولة , أصل طول ما هما راكبين شعب جبان و جاهل يبقا هيعرفوا يعملوا فيه اللي هما عاوزينه (اغسله – أكويه – أتف عليه . . ) مش فارقة , أصلهم في كل مرة هيطلعوا ليك بحجة ومعاها عينهم الحمرا , وهنخاف ونجري و محدش يقدر يتكلم , هوا فيه حد يقدر يقول للغولة "عينك حمرا يا غولة !" .

وادفع يا مركوب و خد في جيبك يا راكب – أصل إحنا شعب مراكيب .

المهم . . . هنحط فرضية ظريفة أو لنقل حدوتة .

انت مش لابس جزمة (شوز) – روحت لمحل جزم و اشتريت جزمة لونها اسمر , وانت بتشتري محدش قالك حاجة خااالص . . . تمام .

مش لقيت غير جزمة واحدة في المحل كله - لبست الجزمة و جربتها فلقيتها مش مريحة فقلت "مش فارقة أحسن من مفيش" يعني انت مجبر عليها عشان انت حافي ومفيش غيرها .

نزلت في شارع عمومي و مشيت بيها ساعة . . . ساعتين , بعد كده قام عسكري المرور مسكك من قفاك وقالك "هاااع . . . انت مخالف . . . ادفع غرامة 10 جنيه" – "انت خالفت قانون المرافق العامة فقرة 10 مادة ج" وقبل ما تفتح بقك أو تتكلم , قال "يا تدفع الغرامة يا هنعملك محضر وتلبس قضية و وكيل نيابة و محكمة ولفة و هجص ومجص" وقلب ليك معدتك و خلا ركبك تسيب و تخبطت في بعض و حاجت من دي .

تقوم انت تعمل ايه يا باشا , تخاف وتترعب و تدفع الغرامة (هوا أنا حمل بهدلة) ما هو أنت بتثبت إن الانسان أصله فرخة .

فرضا طلعت شجاع شوية وحبيت تسأله ايه اللي انت خالفته .

عسكري المرور "يمنع طبقاً لقانون المرافق العامة فقرة 10 مادة ج السير بحذاء جديد لونه اسمر في الشارع حيث انه مقلق لراحة المواطنين , كما انه تنبعث منه روائح وسوائل خطرة مما يؤثر على راحة وأمن وسلامة ومتانة المواطنين" .

تقوله "طب انا مش كنت اعرف" . . . يقولك "مش مشكلتي"

تقوله "طب ليه خلتوني اشتريها من الاول" . . . يقولك "أنا اشوفك بتشتري دا عادي انت تعمل اللي انت عاوزه دي مش مشكلتي . . . إنما لما تلبسها وتطلع بيها من المحل وتمشي في الشارع يبقا انت بقيت مخالف و أطبق عليك نص القانون و آخد منك الغرامة" .

و النتيجة غباااء مطبق مطلق , و تمسك بالركوب حتى آخر لحظة , وذل ليك و مهانة لأنك جاااهل , و اللي راكبينك هما المسئولين عن الموضوع ده , المفروض يحطوا تنبيه في محلات الجزم (ممنوع الأحذية السوداء الجديدة) .

بس ايه . . . دا احنا هنا في مصر – أرض الفراعنة . . . هوا الفرعون يعمل حاجة و يتقاله انها غلط . . . أبداً . . . هوا يعمل اللي في بداله . . . برضه لازم يصعب علينا , دا بيتعامل مع شعب مراكيب , ربنا يكون في عونه .

ايه بقا اللي حصل ؟؟؟

العبد لله كا ن في القاهرة , وهناك لابد وأن يركب وسيلة المواصلات الأكثر شعبية وشهرة , و التي وفرتها لنا حكومتنا المجيدة حتى تسهل للشعب (دافع الضرائب وطافح الكوتة) (على فكرة أنا مش أعرف يعني ايه كوتة) انتقالاته و ترحاله و توفر له أمواله الثمينة (وسيلة المواصلات هي المترو) .

ركبت المترو و أنا شايل شاشة "17 بوصة (فلاترون) وكان معايا ابن خالي , عديت من بوابة المترو اللي عليها كاشف المعادن البايظ و زمر وانا شايل – روحت قطعت تذكرة من شباك التذاكر وانا برضه شايل – عديت من مكنة التذاكر بس كان ابن خالي هوا اللي شايل لحد ما عديت وقام . . هوب . . مناولني الشاشة من فوق المكنة – نزلت على السلم الكهربي وفضلت واقف على رصيف المحطة حتى جاء المترو – ركبته , وفي محطة الوصول طلعت السلالم و عديت من مكنة التذاكر , و واحد شال ليا الشاشة لحد ما عديت , و أنا طالع من بوابة المترو جالي عسكري وقال "يا استاذ تعالى في واحد عاوزك" المهم قعدت اجادل فيه لحد ما طلع عسكري تاني بنجوم على كتفه من نقطة الشرطة وقالى تعالى و هنا دار الحوار التالي :

العسكري ابو نجوم : انت مخالف طلع 10 جنيه – (وراح مكلم العسكري التاني) – خده معاك للخزنة عشان يدفع .

فتوح : استنى يا عسكري . . . هوا أنا خالفت ايه ؟

العسكري ابو نجوم : اصلك خالفت القانون لما أخذت الشاشة معاك في المترو ودي حاجة خطر على الركاب .

فتوح : خطر !!! إزاي خطر يعني ؟

العسكري ابو نجوم : مش دي حاجة مقفولة . . . وانت نازل تحت الأرض . . . الضغط في المترو عالي 4000 فولت يعني ممكن الشاشة تنفجر منك و تعور حد من الركاب .

(هنا انا مسكت نفسي من الضحك بالعافية – المفروض انه قصده بدلا من فولت كلمة بار و هي وحدة الضغط الجوي و كمان الشخص دا لو فاهم , المترو فيه نظام ضبط ضغط الهوا على (واحد بار) عشان الناس تعرف تمشي و تشتغل فيه طبيعي و إلا الناس هتصدع وتخر دم من فتحات جسمها – بس خير – أصل هما دول اللي راكبينا .)

فتوح : طب مادام هي مخالفة ليه محدش منعني من الدخول بيها في المحطة اللي انا جيت منها , و ليه العسكري اللي على رصيف المحطة مكلمنيش ؟

العسكري ابو نجوم : مسئوليتي إني لما اشوفك مخالف امسكك , يعني انت واقف برا في صالة محطة المترو مش هقولك حاجة , تعدي مكنة المترو يبقا انت كده بقيت مخالف , امسكك أنا بقا و ادفعك الغرامة .

فتوح : طب أنا المفروض اعرف منين إن الحاجة اللي معايا دي مخالفة , مش لازم يبقا فيه لافتة تحذيرية أو حاجة متعلقة زي بتاعة (ممنوع التدخين) عشان أعرف منها .

العسكري ابو نجوم : (وبقلاطة) أنا مش هيئة إعلام انا هيئة تنفيذ , و كمان دا قانون بلدك , لازم تكون حافظ قانون بلدك يا محترم .

(هنا كنت خلاااص وصلت لآخري , و كنت على اتم استعداد إني أقول ألفاظ غير لائقة يعاقب عليها القانون – بس ستر ربنا مسكت نفسي) .

فتوح : أنا مش غلطت في حاجة و انتم اللي غلطانين , أنا مش هدفع غرامة اعمل ليا محضر و أنا هعرف آخد حقي .

المهم . . . نهايته عمل ليا محضر و مضيت عليه , و أنا الآن على أتم الاستعداد إني آخد المشوار لحد آخره مع ولاد . . . (لفظ غير لائق) .

بس برغم هذا أنا سعيد । . . ليه ؟ . . . الموقف اللي حصل دا أثبت كثير من نظرياتي و بيدعم افكاري تجاه بلدي العظيمة ميصر .


1- البلد رايحة للكلاب (سواء اللي راكبينا أو شرذمة من المركوبين و اللي بيركبونا بمساعدة اللي راكبنا) .

2- المصرية جنسية يجب التخلص منها سريعاً إن لم يكن فوراً .

3- علم في المتبلم يصبح ناسي (يعني انسى انك تغير حاجة في البلد دي)

4- يجب الهجرة إلى أي بلد (كازخستان - كندا) في اقرب فرصة .

("إِنَّ الَّذِينَ تَوَفَّاهُمُ الْمَلآئِكَةُ ظَالِمِي أَنْفُسِهِمْ قَالُواْ فِيمَ كُنتُمْ قَالُواْ كُنَّا مُسْتَضْعَفِينَ فِي الأَرْضِ قَالْوَاْ أَلَمْ تَكُنْ أَرْضُ اللّهِ وَاسِعَةً فَتُهَاجِرُواْ فِيهَا فَأُوْلَـئِكَ مَأْوَاهُمْ جَهَنَّمُ وَسَاءتْ مَصِيراً ") آية 97 سورة النساء .

5- فلتكن بطة مادمت تعيش في هذا البلد , و لكن إن وقف شئ أمامك فلتكن له أسداً , لأنك في الأساس أسد .

6- كتها نيلة اللي عايزة خلف في بلد زي دي .

7- الناس عارفة الخير فين بس بتستعبط وعاملة نفسها مش عارفة مكانه .

فيه نقطة خطيرة فكرت فيها – مش ممكن يكون ده مخطط لطرد أهل مصر من مصر عشان تخلى ليهم باللي فيها ويهيصوا مع القلة الباقية من رعاع الشعب ؟؟

("أَمْ حَسِبْتُمْ أَن تَدْخُلُواْ الْجَنَّةَ وَلَمَّا يَأْتِكُم مَّثَلُ الَّذِينَ خَلَوْاْ مِن قَبْلِكُم مَّسَّتْهُمُ الْبَأْسَاء وَالضَّرَّاء وَزُلْزِلُواْ حَتَّى يَقُولَ الرَّسُولُ وَالَّذِينَ آمَنُواْ مَعَهُ مَتَى نَصْرُ اللّهِ أَلا إِنَّ نَصْرَ اللّهِ قَرِيبٌ") آية 214 سورة البقرة .

مش عارف . . . الله أعلم , بس الموضوع محتاج عزيمة – ناس معاه – نتيجة وحاجة نوصلها – هدف – فعل و مش كلام زي الناس اللي موجودين دلوقت كل اللي بيعملوه كلام كلام كلام (أنا اتخنقت ليهم سلف)

المهم . . . خير خير محدش عارف الخير فين.

("الم {1} أَحَسِبَ النَّاسُ أَن يُتْرَكُوا أَن يَقُولُوا آمَنَّا وَهُمْ لاَ يُفْتَنُونَ {2} وَلَقَدْ فَتَنَّا الَّذِينَ مِن قَبْلِهِمْ فَلَيَعْلَمَنَّ اللَّهُ الَّذِينَ صَدَقُوا وَلَيَعْلَمَنَّ الْكَاذِبِينَ {3} أَمْ حَسِبَ الَّذِينَ يَعْمَلُونَ السَّيِّئَاتِ أَن يَسْبِقُونَا سَاء مَا يَحْكُمُونَ {4} ") سورة العنكبوت .



من وراء قضبان غباء راكبي مصر

فتوح ابو المفاتيح – و أغنية "حيران كدا ليه"


الأربعاء، نوفمبر 07، 2007

الفستان الأبيض



الفستان الأبيض
اغنية رائعة جدا
ماشي على دماغي اليومين دول
إني اسمعها كتير كتير كتير
وسعات ودي برضه كتير
بأمسك المايك الكبير بتاعي

واقعد اغني معاها
وألعلع
لحد ما جيراني اللي فوق اشتكوا
بس اعتقد إني عندي حق
الاغنية تستحق
صح ولا ايه


يعني أكمل إزعاج الجيران
انتم بس تأشروا

ده لينك عشان اللي عاوز يحمل الأغنية الخرافية دي


سلااااااااام

كان معكم من فرحه المستقبلي
فتوح أبو المفاتيح - منتشياً بشكل رائع




الجمعة، نوفمبر 02، 2007

ثم ماتت و هي تحلم

اتفرجت لتاني مرة على الفيلم ده
ولتاني مرة أعيط اكتر من خمسة مرات في الفيلم
وآخر مرة عيطت لحد ما بليت نفسي

فيلم رائع
الفيلم اسمه "متاهة بان" وهو فيلم اسباني
pan`s labyrinth
فيلم شديد الروعة
قصته مؤثرة جدا
تخليك تحب تكون موجود في احداث القصة رغم حزنها الشديد
على فكرة الفيلم مصنف للأطفال
وعجب فرح "فرختي" جدا جدا

العنوان اللي أنا حاطه للتدوينة دي هوا تعليقي وسط بكائي على هذا الفيلم عندما شاهدته للمرة الأولى

حطيت ليكم بعض مشاهد من الفيلم من الاول للآخر
آآآآآه
رائع شديد الروعة

معكم باكيا من فرط التأثر
فتوح أبو المفاتيح












توضيح صغنووون خااالص


اقرأ و قول رأيك بحرية – عمري ما هزعل منك